Свет
„Хјуман рајтс воч“: Нагло влошување на човековите права во Либан

Човековите права во Либан бележат најдрастично влошување во последните неколку децении, покажа најнов извештај на „Хјуман рајтс воч“ (ХРВ).
Стапката на сиромаштија на земјата се зголеми двојно во 2020 година како резултат на невидената економска криза, пандемијата на коронавирус и експлозијата на пристаништето во Бејрут на 4 август.
„Со секој изминат ден, животот на граѓаните, мигрантите и бегалците во Либан станува сè понеподнослив“, велу Аја Мајзуб, истражувач на ХРВ за Либан.
Колапсот на валутата на Либан, надополнет со рапидното зголемување на цените на храната и стоките, ја десеткуваше можноста на луѓето да си ги дозволат основни потреби, вклучувајќи храна, засолниште и здравствена заштита, се вели во извештајот.
Утврдено е дека маргинализираните заедници, вклучително и семејствата со ниски примања, лицата со попреченост, мигрантите, бегалците и ЛГБТК-лицата, биле непропорционално погодени од пандемијата. Утврдено е дека 88 отсто од сириските бегалци во Либан живеат во екстремна сиромаштија.
ХРВ обвинува многу проблеми се предизвикани од владата на Либан, која, како што тврди извештајот, не успеала да развие навремен, робустен или координиран план за помош за проблемите на земјата.
„Политичката елита сè уште се договара околу тоа како да се подели смалениот плен за да се збогати додека ја осиромашува земјата“, рече Мајзуб.
Владата не им ги исплатила на болниците средствата што им ги должи, со што се намалува можноста на медицинскиот персонал да одговори на пандемијата на коронавирус. Неисплаќањето на болниците и падот на валутата во земјата ги спречи медицинските центри да увезат доволно лекови за да ги задоволат потребите на населението.
Либанските власти, се додава во извештајот, не успеаја да ги заштитат жените и девојчињата од насилство и од дискриминација. Владата, исто така, потфрли во својата обврска да ги заштити домашните мигрантски работници, кои во Либан се повеќе од 250.000.
Новиот договор за работници-мигранти, кој би го заменил долгокритикуваниот систем „кафала“, беше суспендиран на крајот на октомври. Новиот договор ќе ги кодифицираше правата на странските работници, кои се исклучени од законите за работни односи во Либан.
Судот соопшти дека е донесена одлука за запирање на планираното спроведување на договорот затоа што може да му нанесе огромна штета на секторот за регрутирање работници.
ХРВ исто така ги осуди либанските власти за нивната прекумерна употреба на сила против антивладините демонстранти и континуираните напади врз слободата на говорот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Украина: Подготвени сме денеска да потпишеме клучен договор со Америка

Украина е подготвена да потпише договор за минералите со САД и тоа би можело да го направи подоцна денеска, изјави извор од украинската влада за Ројтерс.
„Мислам дека договорот би можел да биде потпишан можеби доцна навечер“, рече изворот.
Украинските власти се надеваат дека потпишувањето на договорот што го промовираше американскиот претседател Доналд Трамп ќе помогне да се зајакне американската поддршка за Киев во војната предизвикана од руската инвазија пред повеќе од три години.
Првиот вицепремиер на Украина Јулија Свириденко патува во САД за да го потпише договорот, додаде извор од украинската влада.
Двете страни потпишаа меморандум на 18 април како прв чекор кон постигнување договор за експлоатација на минералните суровини во Украина. Во меморандумот велат дека имаат намера до 26 април да ги завршат преговорите и што поскоро да го потпишат договорот.
Два дена подоцна, украинскиот премиер Денис Шмихал изјави дека Киев и Вашингтон се договориле претходната американска помош за Украина да не биде вклучена во договорот за минерали. За време на патувањето во САД минатата недела, Шмихал се состана со американскиот секретар за финансии Скот Бесент и рече дека има добар напредок во врска со договорот.
Шмихал, исто така, рече дека Киев јасно ги дефинирал своите граници во договорот, имајќи ги предвид обврските на Украина во Европа и украинските закони.
Регион
Третата најголема партија во Бугарија потпиша соработка со партијата на Путин

Националистичката бугарска партија „Преродба“ потпиша договор за соработка со владејачката партија на Руската Федерација „Единствена Русија“. Ова се случи и покрај фактот што Русија официјално ја прогласи Бугарија за непријателска држава по почетокот на сеопфатната инвазија на Украина, дознава „Еурактив“, а пренесува УНН.
„Договорот предвидува размена на искуства, идеи и политичка пракса меѓу двете партии и претставува важен позитивен чекор кон обновување на целосните бугарско-руски односи“, наведуваат од партијата „Преродба“.
Договорот го потпишаа заменик-претседателот Цончо Ганев, кој е и потпретседател на Народното собрание и Владимир Јакушев – заменик претседател на Горниот дом на Државната дума на Руската Федерација.
Како што пишува УНН, „Преродба“ нема ништо против тоа што Русија ја прогласи Бугарија за непријателска држава по почетокот на војната во Украина и продолжува да ги одржува односите со владејачката партија.
Според достапните информации, „Преродба“ е третата по големина партија во бугарскиот парламент: по изборите во октомври 2024 година има 33 мандати од вкупно 240. Партијата отворено се противи на членството на Бугарија во ЕУ и НАТО, се залага за неутралност во војната на Русија против Украина и шири проруски наративи на социјалните мрежи.
Претходно таа неуспешно се обиде да организира референдум за забрана на воведувањето на еврото.
Исто така, оваа партија влезе во бугарскиот парламент благодарение на нејзиниот цврст став против вакцините и карантинот за време на пандемијата на Ковид.
Свет
Најмалку тројца мртви во Шпанија поради невидениот прекин на струја

Најмалку три лица загинаа во Шпанија во инцидент поврзан со невиден прекин на струја што ја парализираше земјата во понеделникот, потврди Цивилната гарда за Би-Би-Си.
Според шпанските медиуми, станува збор за членови на семејство од северозападната општина Табоаделе. Полицијата истражува дали труењето со јаглерод моноксид од неисправен генератор на струја имало улога во нивната смрт, но Цивилната гарда не може да открие други детали.
Властите се уште се обидуваат да утврдат што го предизвикало затемнувањето што во понеделникот предизвика хаос низ Шпанија и Португалија. Според информациите на мадридскиот дневен весник Ел Паис, тројцата починати од Табоадела се брачна двојка и нивниот возрасен син. Нивните тела ги пронашла негувателката вчера наутро, пишува Ел Паис.
Други смртни случаи се под истрага, вклучително и онаа на жена во Мадрид која загина во пожар за кој постои сомневање дека е предизвикан од свеќа користена за време на прекинот на струја, објавија локалните медиуми. Жена на возраст од околу педесет години е пронајдена мртва во понеделникот вечерта, откако избувнал пожар во зграда во областа Карабанчел во градот.
Тринаесет лица побарале лекарска помош поради вдишување чад, а пет од нив завршиле во болница, соопшти градската канцеларија за итни интервенции.
Во меѓувреме, според медиумите, во Валенсија починала жена на возраст од четириесет години, но шпанските медиуми не се согласуваат за причината за нејзината смрт. Локалната полиција соопшти дека жената, која имала проблеми со белите дробови, починала откако нејзиниот вентилатор престанал да работи за време на прекинот на електричната енергија, според извештаите на медиумите.
Сепак, Ел Паис пренесува изјави од регионалната здравствена служба во која се наведува дека жената имала повеќе здравствени проблеми и починала од природна смрт. Затемнувањето предизвика огромни прекини низ Шпанија и Португалија, а делови од Франција исто така беа делумно погодени.
Во Шпанија и Португалија, семафорите престанаа да работат, метро-системите запреа, а продавниците не можеа да примат картички, што предизвика долги редици на неколкуте банкомати кои сè уште работеа. На почетокот паднаа и мобилните мрежи, па на многумина им беше тешко да добијат информации.