Генералштабот на вооружените сили на Украина објави дека неодамнешниот напад врз руската воздухопловна база Енгелс уништил 96 крстаречки ракети кои Русија планирала да ги користи за напади врз Украина оваа пролет. Покрај тоа, погодени се и складишта за воздухопловно гориво, според украинската војска.

96 Russian cruise missiles were destroyed by the strike on Engels airfield – Ukrainian General Staff.

These missiles were intended for strikes on Ukraine this spring.

Additionally, aviation fuel was destroyed due to strikes on its storage sites.

Glory! https://t.co/60TdM7nS2N pic.twitter.com/qBhik259sU

— Anton Gerashchenko (@Gerashchenko_en) March 27, 2025

Воздухопловната база Енгелс, која се наоѓа во руската област Саратов, повеќепати беше цел на напади со украински беспилотни летала од почетокот на инвазијата. Последниот напад, кој се случи минатиот викенд, предизвика силни експлозии, а локалните власти во Русија првично признаа дека имало „инцидент“, без да наведат детали.

Базата Енгелс се користи за сместување на стратешки бомбардери, вклучително и авиони Ту-95, кои често учествуваат во ракетни напади врз украински цели.

Полската армија има доволно резерви за да се спротивстави на непријателски напад до две недели пред пристигнувањето на засилувањата на НАТО, изјави вчера за „Полсат њуз“ генерал Дариуш Луковски, шеф на полската канцеларија за национална безбедност.

„Мислам дека, во зависност од тоа како ќе се одвива оваа борба, одбраната може да се спроведува една или две недели со денешните нивоа на залихи“, рече Луковски, одговарајќи на прашањето колку долго Полска би можела да се бори сама пред да интервенираат сојузниците.

Луковски призна дека полските вооружени сили сè уште користат мешавина од модерна и застарена опрема, при што недостигот на муниција првенствено влијае на постарите системи. Тој истакна и дека новонабавените борбени возила и платформи се снабдуваат со соодветна муниција.

Полската политичка опозиција ја осуди состојбата на полското одбранбено производство, тврдејќи дека Полска ќе има доволно муниција за само пет дена војна. На прашањето дали Полска навистина има залихи само за пет дена, Луковски рече дека тоа зависи од видот на опремата и муницијата.

Полска, која ги дели границите со Белорусија и со руската високо милитаризирана енклава Калининград, се наоѓа на источното крило на НАТО и најверојатно би била меѓу првите цели во потенцијалниот конфликт НАТО-Русија.

Клучно е САД да не го извлечат рускиот претседател Владимир Путин од политичка и економска изолација, изјави украинскиот претседател Володимир Зеленски во интервју за Eurovision News.

Изјавата на Зеленски доаѓа откако Русија и Украина се договорија да спроведат делумен прекин на огнот со посредство на САД поради нападите врз енергетската инфраструктура и непријателствата во Црното Море. Во замена, САД се согласија да го прошират пристапот на Русија до глобалните пазари.

„Многу е важно Америка да не му помогне на Путин сега да излезе од оваа глобална изолација. Верувам дека ова е опасно. Ова е еден од најопасните моменти“, рече Зеленски. Тој тврди дека Путин се надева дека „ќе остане на власт до својата смрт“, но и дека неговите амбиции не се ограничени само на Украина, туку може да доведат до „директна конфронтација со Западот“.

Зеленски ги повика САД и Европа да останат обединети во вршењето притисок врз Путин.

„Рускиот лидер се плаши од европско-американскиот сојуз и се надева дека ќе го подели. Путин се плаши и од сопствената смртност“, смета Зеленски.

„Тој наскоро ќе умре, тоа е факт и се ќе биде готово“, додаде тој, според Киев Индипендент. Во изјавата објавена по последната рунда разговори со руските претставници во Саудиска Арабија, САД ветија дека ќе ги ублажат некои економски ограничувања за Русија како дел од договорот за ограничен прекин на огнот.

Зеленски рече дека ограничениот прекин на огнот во Црното Море е „дефинитивно чекор кон завршување на војната“, но ја истакна посветеноста на Украина за неодреден прекин на непријателствата. „Генерално, бевме подготвени за целосен прекин на огнот“, заклучи тој.