Свет
Чешкиот министер: По завршувањето на војната, ниеден Украинец нема да добие заштита во Чешка

Чешкиот министер за внатрешни работи Вит Ракушан денеска изјави дека Прага соработува со Полска за одлуката за статусот на Украинците, кои во моментот уживаат привремена заштита по крајот на војната.
„Чешка се подготвува за сценарија доколку во Украина биде прогласен прекин на огнот или каков било крај на војната. За тоа подготвуваме документи заедно со Полска, која претседава со Советот на Европската Унија. Сакаме тоа да биде завршено во наредните месеци“, изјави Ракушан во интервју за чешкиот портал „Новинки“.
Во тој случај, додаде тој, Прага автоматски ќе престане да дава привремен статус на Украинците, но тие сепак ќе може да останат во Чешка одреден временски период, на пример, една или една и пол година.
За да го направат тоа, истакна Ракушан, тие мора да се пререгистрираат во Чешка под друг статус, како и другите странци.
Тој објасни дека мажите што веќе имаат семејства во Чешка нема да добијат автоматска заштита, туку ќе мора да поминат низ вообичаениот бирократски процес, при што апликацијата може да биде прифатена или одбиена.
Тој објасни дека бегалците од Украина престојуваат во Чешка благодарение на привремената заштита, која секогаш се продолжува за една година.
„Доколку дојде до прекин на огнот или војната заврши на кој било начин, привремената заштита на сите бегалци во нашата земја би истекла веќе следниот ден, но тие сепак би можеле да останат во Чешка одреден временски период, на пример, една или една и пол година“, рече Ракушан.
Според него, Прага и Варшава имаат цел да подготват груба верзија на предлогот за време на полското претседателство, односно до крајот на јуни, бидејќи одлуката мора да биде донесена на ниво на ЕУ.
Освен тоа, изјави чешкиот министер, Европската Унија планира да отвори центри за враќање за Украинците, кои ќе дејствуваат како посредници при нивното враќање во татковината.
Советот на Европската Унија ја продолжи привремената заштита на Украинците до март 2026 година, пренесува „Танјуг“.
Украинците што уживаат привремена заштита во ЕУ имаат право да патуваат во Украина и да се вратат назад во Европската Унија без да ја загубат дозволата за престој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Премиерот на Гренланд: Со нетрпение ја очекувам посетата на данската премиерка

Гренландскиот премиер Јенс-Фредерик Нилсен денеска изјави дека со нетрпение ја очекува посетата на данската премиерка Мете Фредериксен во среда.
Нилсен рече дека Гренланд долго време ја посакувал оваа посета, објави Ројтерс.
Тој во неделата рече дека САД нема да го добијат Гренланд, одговарајќи на изјавите на американскиот претседател Доналд Трамп дека сака да ја преземе контролата врз оваа самоуправна автономна територија под суверенитет на Данска.
Свет
Од кабинетот на Зеленски негираат дека тој се подготвува да се кандидира за втор мандат

Од кабинетот на украинскиот претседател Володимир Зеленски го демантираат извештајот на британскиот Економист дека Зеленски се подготвува да се кандидира за втор мандат на претседателските избори во јули.
Оттаму исто така, негираа дека Зеленски одржал состанок за изборите во јули, на кој наводно, според Економист, му наредил на својот тим да ги организира изборите, пренесе УНИАН.
Извор од украинската влада изјави дека главното прашање сега е постигнување мир и дека е целосно лажно дека подготовките за изборите веќе се во тек.
Свет
Марин Ле Пен ќе поднесе жалба на пресудата

Марин Ле Пен ќе поднесе жалба на одлуката на судот со која лидерката на француската крајна десница е осудена на четири години затвор, соопшти нејзиниот адвокат.
Според одлуката, две од вкупно четирите години затвор ќе бидат условна казна. Судот пресуди и дека Ле Пен треба да добие петгодишна забрана за вршење јавна функција и треба да плати парична казна од 100.000 евра.
Ле Пен е прогласена за виновна за проневера на европски фондови.
Ова е удар за демократијата – рече нејзиниот адвокат.
– Марин Ле Пен ќе продолжи да се бори – изјави портпаролот на нејзината партија Национален собир.
Ле Пен важи за еден од фаворитите за претседателските избори во Франција закажани за 2027 година.