Свет
Шведската агенција за вработување критикувана поради неточен извештај за вработеноста на мигрантите
Шведската Агенција за вработување се соочува со сериозни критики во врска со новиот оптимистички извештај за вработување на новодојдените мигранти, при што критичарите посочуваат дека единствениот пораст е кај работните места кои се дебело субвенционирани од владата, пренесува „Брејтбарт“.
Во новиот извештај се тврдеше дека има голем пораст кај новодојдените мигранти што се запишуваат на студии или наоѓаат вработување, од 32 отсто во 2017 година на 44 отсто годинава, но критичарите го осудија извештајот бидејќи целиот раст е поврзан со програми финансирани од владата, а не од приватни претпријатија.
Ана Далберг, политички уредник на шведскиот весник „Експресен“, го критикува извештајот велејќи: „Да се нарече ова голем успех, е потполно погрешно наведувачки“ и додаде дека иако е јасно оти шведската Агенција за вработување имала тешка задача со оглед на степенот на образование и вештините на некои мигрантите, како и нивното познавање на шведскиот јазик, извештајот не треба да прикажува подобра слика од фактичката состојба.
Бројот на мигранти што наоѓаат работа без државна помош останува мал – само 4 отсто се ангажирани со некоја форма на студирање и 7 отсто се вработиле, што е непроменето од лани.
Генералниот директор на Агенцијата за вработување, Микаел Сјоберг, го бранеше извештајот, велејќи:
„Мора да се увиди дека резултатите од програмата се подобруваат, но во исто време се соочуваме со големи предизвици. Но, важно е да се биде свесен дека работите одат на добро“.
Стапката на невработеност кај Швеѓаните во споредба со мигрантите со години се разликува многу, а Швеѓаните имаат многу помала стапка на невработеност. Според извештајот од минатата година, стапката на невработеност кај Швеѓаните изнесува само 3,9 отсто во споредба со стапката од 21,8 отсто кај мигрантите.
Претходно, оваа година, беше обелоденето дека севкупната невработеност се намалила во целата земја, но јазот меѓу Швеѓаните и мигрантите и натаму останува висок со невработеност на мигранти од 19,9 отсто. Ситуацијата со невработеност е највпечатлива во Малме, каде што стапката на невработеност е двојно поголема од националниот просек, според извештајот од август.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Шефот на НАТО: Кина сака добри односи со Западот и и помага на Русија, не може да ги има и двете
Кина мора да престане да ја поддржува руската војна во Украина ако сака да ужива во добри односи со Западот, изјави денеска генералниот секретар на НАТО Јенс Столтенберг, предупредувајќи го Пекинг со невообичаено остри зборови дека не може да ги има и двете. За време на посетата на Берлин, шефот на западната воена алијанса рече дека помошта на Пекинг е од витално значење за воените напори на Москва бидејќи ја зајакнува воената економија на Русија со споделување на врвна технологија, како што се полупроводниците.
„Минатата година Русија увезе 90 отсто од својата микроелектроника од Кина, која се користи за производство на проектили, тенкови и авиони. Кина исто така работи на Русија да и обезбеди подобрени сателитски способности“, рече Столтенберг. „Кина вели дека сака добри односи со Западот. Во исто време, Пекинг продолжува да го поттикнува најголемиот вооружен конфликт во Европа од Втората светска војна. Не може да ги има и двете“, предупреди тој.
Столтенберг ги предупреди западните сојузници да не станат зависни од Кина како што беа од Русија. „Во минатото направивме грешка што станавме зависни од руската нафта и гас. Не смееме да ја повториме таа грешка со Кина и да зависиме од нејзините пари, суровини и технологии. Зависноста не прави ранливи“, додаде тој.
Кина ги зајакна трговските и воените врски со Русија во последниве години, бидејќи САД и нивните сојузници воведоа санкции и на двете, но особено на Москва, поради нејзината инвазија на Украина. Рускиот претседател Владимир Путин изјави во четвртокот дека планира да отпатува за Кина во мај, но не прецизираше точно кога.
Свет
САД градат привремено пристаниште во близина на Газа за испраќање хуманитарна помош
Соединетите Држави почнаа да градат пристаниште во Газа, соопшти денеска Пентагон, проект кој треба да ја олесни испораката на хуманитарна помош на палестинската територија. Пристаништето треба да профункционира на почетокот на мај.
Во март, претседателот Џо Бајден објави дека американската војска ќе изгради привремено пристаниште на медитеранскиот брег на Газа за да добива хуманитарна помош по море.
Изградбата е дел од напорите да се спречи гладувањето во палестинската енклава, која веќе пет месеци се наоѓа во средината на израелската воена кампања против Хамас, која го опустоши Појас Газа и ги потопи нејзините 2,3 милиони луѓе во хуманитарна катастрофа.
„Можам да потврдам дека американските воени бродови, вклучително и УСНС Бенавидез, почнаа да градат привремено пристаниште…“ изјави за новинарите портпаролот на Пентагон, Патрик Рајдер.
ОН предупредија дека Газа е во опасност од глад и се пожалија на „огромни пречки“ при добивањето помош и нејзино дистрибуирање низ енклавата.
Агенциите за помош и администрацијата на Бајден го молеа Израел да ја олесни испораката на помош во Газа и да им дозволи на нивните конвои безбедно поминување на територијата.
Рајдер рече дека Пентагон следи некој вид минофрлачки напад во Газа што предизвика минимална штета во близина на областа каде што се гради пристаништето, но додаде дека американските сили сè уште не почнале да преместуваат ништо во областа и дека нема американски сили на теренот.
Свет
(Видео) Големи поплави во Танзанија, загинаа 155 луѓе
Во поплавите во Танзанија загинаа 155 луѓе, а најмалку 236 се повредени, изјави денеска премиерот Касим Мајалива. Во поплавите оштетени се повеќе од 10.000 куќи.
Премиерот додаде дека обилните дождови предизвикани од Ел Нино и придружени со силен ветер доведоа до поплави и лизгање на земјиштето во различни делови на земјата.
„Многу луѓе загинаа. Имаше штета на посевите, куќите, инфраструктурата како патишта, мостови и железници“, рече Мајалива.
Поплави ја погодија и Кенија, која се граничи со Танзанија на истокот на Африка, при што загинаа повеќе од 30 луѓе, пишува Си-ен-ен.
Во Кенија врне силен дожд од средината на март, а врнежите се интензивираа минатата недела. Кенискиот Црвен крст изврши повеќе од 188 спасувачки операции од март. Властите вчера затворија некои патишта во главниот град на Кенија, а неколку населби беа поплавени.