Свет
Шведска со препорака: да се запре посвојувањето деца од странство, истрагата откри злоупотреби
Шведската комисија денес препорача посвојувањето деца од странство да се суспендира откако истрагата откри низа злоупотреби и измами што датираат од пред неколку децении во таа земја.
Комисијата беше формирана во 2021 година по извештајот на шведскиот весник „Дагенс Нихетер“, во кој детално е опишан проблематичниот систем на посвојување деца од странство во таа скандинавска земја.
Нејзините препораки беа испратени до министерката за социјални услуги, Камила Валтерсон Гренвал.
„Задачата беше да се испита дали имало неправилности за кои службите во Шведска знаеле, можеле да ги направат и што всушност направиле“, рече Ана Сингер, правен експерт и претседател на комисијата.
„А актерите го вклучуваат секој што имал каква било врска со активностите на меѓународното посвојување деца од Шведска“, додаде таа.
„Ова ги вклучува владата, надзорните органи, разни други организации, општините и судовите. И заклучокот е дека имало неправилности во посвојувањата од странство во Шведска“, нагласи таа.
Комисијата ја повика владата официјално да им се извини на посвоените и нивните семејства. Истражителите пронајдоа потврдени случаи на трговија со деца во секоја деценија од 1970-тите до 2000-тите.
Сингер рече дека јавното извинување, покрај тоа што е важно за оние кои се лично засегнати, може да помогне во подигањето на свеста за прекршувањата на законот, бидејќи постои тенденција да се игнорира постоењето и значењето на злоупотребите.
Истрагата на Асошиејтед Прес минатата година откри сомнителни практики на собирање деца и лажна документација во програмата за посвојување во странство на Јужна Кореја, која достигна врв во 1970-тите и 1980-тите години, поради огромната побарувачка за бебиња на Запад.
Овие наоди претставуваат предизвик за меѓународниот систем на посвојување деца од странство, кој е изграден врз моделот создаден во Јужна Кореја.
Холандија минатата година објави дека повеќе нема да им дозволува на своите граѓани да посвојуваат од странство. Единствената странска агенција за посвојување во Данска објави дека се затвора, а Швајцарија се извини што не ги спречила нелегалните посвојувања.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Лавров: Европа се подготвува за војна
Рускиот министер за надворешни работи Сергеј Лавров ја оцени состојбата на безбедносната архитектура во Евроазија на Меѓународната конференција за евроазиска безбедност во Минск, зборувајќи за „агресивните планови на Западот“, проширувањето на НАТО, перспективата за решение на конфликтот во Украина и односите со Вашингтон.
Лавров предупреди дека Русија нема да дозволи Евроазија да стане „феуд на НАТО“, обвинувајќи ги западните земји дека „се подготвуваат за нова голема војна“, објави РИА Новости.
Тој оцени дека Алијансата „ги проширува своите активности кон Арктикот и Тихиот Океан“ со цел да ја ограничи Кина и да ја изолира Русија.
„Многу пати сме рекле дека никогаш немавме, ниту имаме намера да нападнеме која било моментална членка на НАТО или ЕУ. Подготвени сме да ја вклучиме оваа позиција во идните безбедносни гаранции за овој дел од Евроазија, но лидерите на ЕУ избегнуваат да ги разгледуваат овие идни гаранции на вистински колективна основа“, рече Лавров, наведувајќи ги договорите меѓу Франција и Велика Британија за координација на нуклеарните сили и договорот меѓу Лондон и Берлин за воена соработка како доказ за милитаризацијата на Европа.
Зборувајќи за новата безбедносна архитектура на Евроазија, Лавров повика на создавање „панконтинентална структура отворена за сите земји од регионот“, заснована на принципите на суверена еднаквост и неделивост на безбедноста.
„За разлика од Западот, Русија и нашите партнери – Кина, Индија, Иран, земјите од ЗНД – се убедени дека стабилноста и просперитетот бараат еднакви права за сите земји, а не доминација на привилегираните“, рече Лавров.
Осврнувајќи се на конфликтот во Украина, рускиот министер ги обвини европските членки на НАТО за продолжување на војната со „пумпање оружје и пари за режимот во Киев“.
„Европските лидери прават сè за да го убедат Вашингтон да се откаже од решавањето на конфликтот на преговарачка маса“, рече Лавров.
Тој додаде дека Москва ги полага своите надежи на договорите постигнати меѓу претседателите на Русија и САД, Владимир Путин и Доналд Трамп на самитот во Алјаска, велејќи дека Русија очекува САД да останат посветени на тие принципи.
Зборувајќи за билатералните односи со Вашингтон, Лавров рече дека Русија предложила враќање на директниот воздушен сообраќај, но дека „американската страна не му дава приоритет“.
Тој исто така истакна дека Москва очекува одговор од САД на нејзиниот предлог за нов договор за намалување на стратешкото оружје, како и на тестирањето на руските крстосувачки ракети „Буревестник“.
„Не слушнав никаков одговор преку дипломатски канали. Сите молчеа“, заклучи Лавров, пренесува Танјуг.
Фотот: принтскрин
Свет
Пожар на крузер на Нил, евакуирани 60 италијански туристи
Денес избувна пожар на туристичкиот крузер „Емпрес“ што плови по Нил во близина на Луксор во Египет. На бродот имало околу 60 италијански државјани, но никој не е повреден и сите патници се безбедни, потврди италијанското Министерство за надворешни работи Фарнезина, објавува „Ил Месаџеро“.
Фарнезина соопшти дека внимателно ја следат ситуацијата заедно со амбасадата во Каиро и дека министерот Антонио Тајани е информиран за сè. За какви било итни случаи, италијанските граѓани ги имаат на располагање броевите на амбасадата во Каиро и на Кризната единица.
Сите патници се згрижени
Евакуираните туристи веднаш беа згрижени од туристичките оператори Corsini Viaggi и Travco Tours.
Пожар предизвикан од краток спој
Според првичната истрага, пожарот избувнал во кујната на бродот додека бил закотвен во пристаништето на селото Асфун. Причината бил електричен краток спој во еден од кујнските апарати. Пожарникарите брзо го изгаснале пламенот пред да се прошири на остатокот од крузерот, а во инцидентот нема повредени туристи или членови на екипажот.
Истрагата е во тек
Сите патници се префрлени на други бродови од безбедносни причини, додека властите започнаа со инспекција на бродот за да ја утврдат точната причина за пожарот. За инцидентот е известено и државното обвинителство, кое ќе спроведе официјална истрага.
Фото: принтскрин
Свет
Белорусија ќе распореди руски ракетни системи „Орешник“ на своја територија
Белорусија ќе распореди руски ракетни системи „Орешник“ на своја територија во декември, објави денес кабинетот на белорускиот претседател Александар Лукашенко.
Се вели дека подготовките за распоредување на ракетите се при крај, објавува Ројтерс.
Лукашенко изјави дека распоредувањето на хиперсоничните балистички ракети „Орешник“ е одговор на ескалацијата од Западот.
Ракетите „Орешник“ беа вклучени во заеднички маневри меѓу Русија и Белорусија минатиот месец.
Фото: принтскрин

