Свет
Шведска ќе потроши милиони за спас на мејнстрим-медиумите

Шведската влада ќе испорача пакет финансиска помош од 500 милиони шведски круни (57,5 милиони долари) за да им помогне на мејнстрим-медиумските компании во екот на пандемијата на коронавирусот, пренесува „Дагенс медија“.
Финансирањето е втор и поголем пакет-помош за мејнстрим-медиумите во Шведска. Првично беше предложено на почетокот на мај, но шведската министерка за култура, Аманда Линд, сега ги утврди условите за компаниите што ќе се квалификуваат.
Во соопштението за јавноста владата рече дека помошта ќе биде воведена преку измени во регулативата за поддршка на медиумите и ќе стапи во сила на 13 август. Разни медиуми може да се квалификуваат за финансиската помош, од дневни весници до веб-страници и радио и телевизиски канали.
Дел од парите за спасување ќе оди за ублажување на загубите во приходите поради падот на рекламирањето од почетокот на пандемијата на коронавирусот. Најмалку 100 весници во Шведска неодамна излегоа со барање до владата за помош поради намалените приходи од реклами.
Ова не е прв случај шведската влада да им понуди на мејнстрим-медиумите помош во милиони шведски круни. Во 2017 година владата им додели 13,5 милиони круни на медиумите за борба против т.н. лажни вести пред изборите во 2018 година. „Винова“, шведскиот државен фонд за истражување и развој, стоеше зад иницијативата.
Минатиот месец писателката Иса Линдерборг ги обвини медиумите во Шведска за голема пристрасност. Според Линдерборг, која порано работела како уредник за култура во весникот „Афтонбладет“, шведските мејнстрим-медиуми намерно го означувале секој критичар на масовната миграција како фашист.
„Секој што не сакаше отворени граници или сакаше да зборува за интеграција беше означен како фашист. За културната левица најтешко е да пронајде прогресивни одговори на прашањата за кои сакаат да зборуваат десничарските популисти. Тогаш е полесно да се каже: ‘Не треба да зборуваме за тоа!“, вели таа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Се огласи Путин по воведувањето на санкциите од страна на САД

Рускиот претседател, Владимир Путин, го даде својот прв директен одговор на американските санкции воведени врз Русија.
Тој рече дека санкциите нема да влијаат на руската економија, но ги опиша како „непријателски чин“ што не придонесува за зајакнување на односите со САД. Тој потврди дека ќе има одредени загуби, но дека руската енергетска индустрија се чувствува безбедно. Путин рече дека Русија спаѓа во групата земји кои се почитуваат себеси и немаат намера да донесуваат одлуки под притисок, додавајќи дека дијалогот е секогаш подобар од војната.
Според него, замената на руската нафта на светскиот пазар ќе трае долго и ќе доведе до пораст на цените.
Зборувајќи за откажаниот самит со Доналд Трамп во Будимпешта, Путин рече дека средбата била предложена од американската страна.
Тој додаде дека Трамп веројатно не мислел дека средбата е откажана, туку одложена, кога зборуваше вчера во Белата куќа, објави Скај.
Во меѓувреме, Володимир Зеленски одржа серија средби со неколку од 27-те европски лидери на состанокот на Европскиот совет во Брисел.
Пред своето обраќање, украинскиот претседател сподели објави на социјалните мрежи за неговите разговори со полскиот премиер Доналд Туск, германскиот канцелар Фридрих Мерц и финскиот премиер Петери Орп.
Претходно се сретна и со францускиот претседател Емануел Макрон и чешкиот премиер Петр Фиал.
Свет
Зеленски: Путин знае дека едно оружје може да го промени текот на војната

Украинскиот претседател, Володимир Зеленски им се обрати на лидерите на состанокот на Европскиот совет утрово. Украинскиот претседател рече дека постои едно оружје кое, како што истакна, може да „го промени текот на војната“.
„Само погледнете колку стана нервозен Путин кога се појави оваа тема, тој разбира дека оружјето со долг дострел може да го промени текот на војната“, рече Зеленски. Зборувајќи за видовите на такво оружје, тој меѓу другите ги спомена ракетите Томахавк.
Американскиот претседател Доналд Трамп досега одби да испорача Томахавк на Украина, но затоа синоќа потврди строги санкции против руските нафтени гиганти Роснефт и Лукоил.
Зеленски им се заблагодари на собраните лидери, но рече дека одлуката за замрзнатите руски средства мора да се донесе што е можно поскоро. Доколку биде одобрена, рече Зеленски, тој ќе искористи значаен дел од тие пари за купување европско оружје.
„Мора да ги искористиме тие замрзнати средства на начин што ќе ѝ даде до знаење на Русија дека мора да плати за сопствената војна што ја води. Затоа, ве молам да донесете одлука што е можно поскоро – руските средства треба целосно да се искористат за одбрана од руската агресија“, рече тој.
Според дипломатски извори, лидерите на земјите-членки се согласиле дека Русија не е подготвена да се вклучи во значајни разговори за постигнување мир и завршување на војната и дека е потребно да се продолжи со притисокот за да се принуди Путин да седне на преговарачка маса.
Дискусијата за Украина ќе продолжи попладне, додека за време на работниот ручек ќе разговараат за зајакнување на европската одбрана.
Унгарскиот премиер Виктор Орбан не учествуваше во дискусијата, кој остана во Будимпешта, каде што денес се одбележува годишнината од Унгарската револуција од 1956 година. Тој ќе пристигне во Брисел подоцна попладне.
Унгарија не сака да ги поддржи заклучоците од самитот за Украина, па затоа најверојатно ќе биде објавена изјавата на другите 26 земји-членки.
Свет
Русија: Отворени сме за можноста за средба меѓу Трамп и Путин

Руското Министерство за надворешни работи е отворено за продолжување на контактите со американскиот Стејт департмент за можна средба меѓу американскиот претседател Доналд Трамп и рускиот претседател Владимир Путин, изјави денес портпаролката Марија Захарова.
„Руското Министерство за надворешни работи, од своја страна, е отворено за продолжување на контактите со американскиот Стејт департмент во спроведувањето на договорите постигнати за време на телефонскиот разговор меѓу претседателите на Русија и САД на 16 октомври“, изјави Захарова пред новинарите.
Вчера, Трамп го објави откажувањето на планираниот состанок со Путин во Будимпешта.
Американскиот претседател рече дека состанокот „може да биде губење време во моментов“. Сепак, неговата администрација ја остави отворена можноста разговорите да продолжат, и покрај санкциите воведени синоќа против двете најголеми руски нафтени компании.