Свет
Шефовите на дипломатиите на Г7: Сите страни мора да дозволат непречена хуманитарна помош за цивилите

Шефовите на дипломатиите на групата седум денеска покажаа единствен став за војната меѓу Израел и Хамас по интензивните состаноци во Токио осудувајќи ги палестинските милитанти и поддржувајќи го правото на Израел на самоодбрана, пренесува АП.
Групата седум богати земји (Г7), составена од Велика Британија, Канада, Франција, Германија, Италија, Јапонија и САД, како и ЕУ, денеска повикаа на хуманитарни паузи во конфликтот со цел да се забрза помошта за загрозените цивили во Појасот Газа. Во изјавата по дводневните разговори членките на Г7 се обидоа да ја балансираат недвосмислената критика за нападите на Хамас врз Израел со потребата од итна акција за помош на цивилите во опколената палестинска енклава, според АП.
„Сите страни мора да дозволат непречена хуманитарна помош за цивилите, вклучувајќи храна, вода, медицинска нега, гориво и засолниште, како и пристап за хуманитарните работници“, се вели во заедничката изјава.
Во документот се додава дека Г7 „поддржува хуманитарни паузи и коридори за овозможи итно неопходна помош, движење цивили и ослободување на заложниците“.
Додека шефовите на дипломатиите се состануваа во центарот на Токио, Агенцијата на ОН објави дека илјадници Палестинци во Газа одат на југ носејќи го само она што може да го носат откако останаа без храна и вода на северот на енклавата.
Израел објави дека неговите војници за време на борбата против милитантите на Хамас продираат длабоко во градот Газа, кој пред војната беше дом на речиси 650.000 луѓе и каде што, според израелската армија, Хамас има централна команда и огромен лавиринт од тунели. Конфликтот во Газа, кој следува по нападот на Хамас врз Израел на 7 октомври, во кој милитантите убија повеќе од 1.400 луѓе, главно цивили, и зедоа 242 заложници, беше на врвот на агендата на состанокот во Токио.
Министрите на Г7 се занимаваа и со голем број други кризи, вклучувајќи ги војната во Украина, нуклеарната и ракетната програма на Северна Кореја и растечките тензии меѓу Кина и нејзините соседи поради територијалните спорови.
„Нашата цврста посветеност да ја поддржиме борбата на Украина за нејзината независност, суверенитет и територијален интегритет никогаш нема да биде поколебана“, се вели во соопштението на Г7.
Во последната изјава по состанокот шефовите на дипломатијата на Г7 „најостро ги осудија повторното лансирање балистички ракети од Северна Кореја, како и трансферот на оружје од Северна Кореја во Русија, што директно ги крши релевантните резолуции на Советот за безбедност на ОН“, додаде АП.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Белата куќа: Се водат чувствителни разговори за предлогот на Трамп за прекин на војната во Газа

Белата куќа денес објави дека се водат „чувствителни дискусии“ за предлогот на американскиот претседател Доналд Трамп за прекин на војната во Појасот Газа.
„Можам да ви кажам дека се водат некои многу чувствителни разговори, но секако не сакам да ги превенирам најавите од оваа говорница. Ќе им препуштам на специјалниот пратеник (Стивен) Виткоф и на претседателот на Соединетите Американски Држави да се справат со тоа“, изјави портпаролката на Белата куќа, Каролин Ливит, на редовниот брифинг за медиумите, објави Ројтерс.
Висок функционер на Хамас изјави за Би-Би-Си дека палестинската група веројатно ќе го отфрли мировниот план на американскиот претседател, тврдејќи дека тој „им служи на интересите на Израел“ и „ги игнорира интересите на палестинскиот народ“.
Фото: принтскрин
Свет
Трамп го потпиша указот за американски безбедносни гаранции за Катар

Претседателот на САД, Доналд Трамп, потпиша извршна наредба со која САД се обврзуваат да ја гарантираат безбедноста на Катар, што претставува значајна нова обврска кон клучен арапски сојузник кој не е член на НАТО, пишува CNN.
„САД ќе го сметаат секој вооружен напад врз територијата, суверенитетот или критичната инфраструктура на Државата Катар за закана за мирот и безбедноста на САД“, се вели во наредбата потпишана во понеделник.
Оваа одлука доаѓа во време кога израелскиот премиер Бенјамин Нетанјаху, за време на посетата на Белата куќа, му се извини по телефон на катарскиот премиер за израелскиот напад врз Доха минатиот месец. Потоа, Трамп, во заеднички настап со Нетанјаху, го претстави својот план од 20 точки за мир во Газа.
„Во случај на таков напад, САД ќе ги преземат сите законски и соодветни мерки – вклучувајќи дипломатски, економски и, доколку е потребно, воени – за да ги одбранат интересите на САД и Државата Катар и да го вратат мирот и стабилноста“, се вели во документот, според медиумот.
Фото: принтскрин
Свет
Макрон: Ја потценивме Русија

Францускиот претседател Емануел Макрон изјави дека не исклучува никакви опции доколку руските борбени авиони влезат во европскиот воздушен простор.
„Во согласност со доктрината за стратешка двосмисленост, можам да ви кажам дека ништо не е исклучено“, рече Макрон во интервју за весникот „Франкфуртер алгемајне цајтунг“, одговарајќи на прашање дали би поддржал соборување на руски борбен авион доколку влезе во европскиот воздушен простор без дозвола.
Макрон истакна дека ја потцениле Русија. Тој тврдеше дека Русија е најголемата структурна закана за Европејците, наведувајќи мешање во изборните кампањи, кибернапади, атентати на противници и ширење лажни информации.
„Постои француски нуклеарен чадор“
„Наивни сме ако не препознаеме дека тајната армија на Русија се шири во нашите демократии. Таа се состои од оние мали анонимни воини што ги нарекуваме дигитални ботови. Тие ја манипулираат демократијата во Франција, Германија и низ цела Европа“, предупреди тој.
Кога беше прашан за предлогот на Европската комисија да се користат замрзнати руски средства како колатерал за исплати на воени репарации на Украина, Макрон повтори дека средствата не можат едноставно да се конфискуваат, бидејќи тоа би го прекршило меѓународното право.
Макрон, исто така, потврди дека ќе одржи говор на почетокот на следната година за француската нуклеарна доктрина, која моментално се ажурира.
„Францускиот нуклеарен чадор постои. Моментално работам на ажурирање на нашата доктрина и сакам да продолжам со продлабочување на нашиот стратешки дијалог со Европејците кои сакаат да учествуваат“, рече тој.
Фото: принтскрин