Европа
Шефот на НАТО: Вечерва ќе разговарам со Ердоган, ќе се обидеме да најдеме решение за Шведска

Генералниот секретар на НАТО, Јенс Столтенберг, денеска, во Вилнус, во пресрет на дводневниот самит на НАТО, изјави дека на овој состанок сè уште е можно да се добие позитивна одлука за членството на Шведска.
„Сè уште е можно да се добие позитивна одлука за шведското членство овде во Вилнус“, рече Столтенберг на заедничката прес-конференција со претседателот Гитанас Наусед, еден ден пред дводневниот самит на НАТО.
Тој додаде дека вечерва ќе има средба со турскиот претседател Реџеп Таип Ердоган и со шведскиот премиер за да се обиде уште еднаш да најде решение.
„Напорно работиме Шведска да стане членка што е можно побргу“, додаде Столтенберг.
Откако турскиот претседател неочекувано ја поврза согласноста на Турција за прием на Шведска во НАТО со влезот на Турција во ЕУ, Столтенберг коментира дека ги „поддржува амбициите на Турција“ за влез во ЕУ, но дека Шведска веќе ги исполнила условите за влез во 31-члената алијанса.
Ердоган рече дека Европската Унија треба да го отвори патот за пристапување на Турција во ЕУ пред турскиот парламент да го одобри приемот на Шведска во НАТО.
„Пред сè, отворете го патот за Турција да влезе во Европската Унија, а потоа ќе го отвориме патот за Шведска, како што ја отворивме за Финска“, рече тој додавајќи дека тој повик ќе го повтори на самитот.
Пристапувањето на Турција во ЕУ е замрзнато со години. Пристапните преговори почнаа во 2005 година кога Ердоган првпат беше премиер.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Зеленски пристигнува на погребот на папата

Украинскиот претседател Володимир Зеленски ќе присуствува на погребот на папата Франциско, пренесе АФП повикувајќи се на извор од украинскиот претседателски кабинет.
Според истиот извор, канцеларијата на Зеленски ја подготвува неговата посета на Рим за Зеленски лично да се прости од поглаварот на Католичката црква.
Како што претходно беше најавено, погребот на папата Франциско ќе се изврши в сабота, 26 април, во 10 часот по локално време. Досега Трамп и Макрон потврдија дека ќе бидат на погребот, но се очекува да присуствуваат многубројни светски лидери и стотици илјади верници.
Европа
Украина: Русите го зголемуваат военото присуство во Мариупол

Руските сили продолжуваат да го зголемуваат своето воено присуство во привремено окупираниот град Мариупол. Како што соопшти денеска на „Телеграм“ градскиот совет на Мариупол, во градот веќе се формирани две воени бази.
„Руските окупатори го прошируваат своето воено присуство во Мариупол“, се вели во соопштението.
Според Центарот за проучување на окупацијата, во текот на март и април 2025 година се појавиле две нови воени бази: една во областа Калмиус на северозапад од градот и логистичка база во областа Ливобережњи, во станбената зона Шхидни. Втората база, како што се наведува, главно се користи за сместување персонал и воена опрема.
„На овој начин руските окупатори постепено го зголемуваат своето присуство во Мариупол. Центарот за проучување на окупацијата нагласува дека ова е план за трансформирање на градот во главна и полноправна логистичка и воена база не само за стоки туку и за опрема и персонал, со широка мрежа на паркинзи, бази за поправка и точки на трајно и привремено распоредување персонал. Ова е олеснето и со развојот на железничките и пристанишните врски што ги спроведуваат окупаторските власти“, се вели во соопштението на градскиот совет на Мариупол.
Европа
Знамиња со кукасти крстови се појавија во Стокхолм на роденденот на Хитлер, полицијата почна истрага

Три нацистички знамиња со кукасти крстови беа поставени на влезот на автопат во областа Есингеледен во Стокхолм, главниот град на Шведска, на 20 април, на роденденот на Адолф Хитлер.
Портпаролот на полицијата во Стокхолм, Матс Ериксон, изјави дека започнале истрага за злосторство од омраза.
Ериксон нагласи дека не е соодветно да се случуваат такви работи во Шведска. Тој посочи дека на влезовите на автопатите често се појавуваат транспаренти со политички пораки.
„Конкретно активистите споделуваат политички пораки бидејќи тука има густ сообраќај. Не е убаво да се споделуваат такви пораки“, рече Ериксон.
Тој додаде дека нацистичкото знаме најверојатно било поставено за да го одбележи роденденот на нацистичкиот диктатор Адолф Хитлер, кој е роден на 20 април.