Свет
Шефот на НАТО во заминување: Можевме да направиме повеќе за да спречиме војна во Украина
НАТО можеше да стори повеќе за да ја вооружи Украина за да се обиде да спречи руска инвазија во 2022 година, рече шефот на НАТО во заминување Јенс Столтенберг во интервју објавено денеска.
„Сега обезбедуваме воена опрема за војна, а можевме да обезбедиме воена опрема за да спречиме војна“, изјави генералниот секретар на НАТО Столтенберг за германскиот неделник ФАС.
Столтенберг укажа на неподготвеноста на НАТО да го обезбеди оружјето што Киев го бараше пред руската инвазија поради страв од ескалација на тензиите со Русија.
По почетокот на војната, Украина, која не е членка на НАТО, по првично двоумење доби вооружени системи од своите сојузници.
Столтенберг, поранешниот премиер на Норвешка, во октомври ќе се повлече од функцијата шеф на НАТО, која ја извршува од 2014 година. Во јуни беше објавено дека следен шеф на НАТО ќе биде поранешниот холандски премиер Марк Руте.
Столтенберг во интервју рече дека крајот на војната во Украина ќе се постигне само со преговори.
„За да ставиме крај на оваа војна, ќе мораме повторно да воспоставиме дијалог со Русија во одредена фаза. Но, тој мора да се заснова на украинската сила“, рече тој.
Столтенберг не потврди дека по напуштањето на НАТО ќе ја преземе функцијата претседател на Конференцијата за безбедност во Минхен од германскиот дипломат Кристоф Хојсген. Тој за ФАС изјави дека има „многу опции“ и дека ќе живее во Осло.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Поранешната шефица во Мосад: Нападот со пејџери и воки-токи беше совршено извршен
Нападот врз оперативците на Хезболах со помош на пејџери успеа совршено, рече Сима Шајн, поранешен шеф на истражување и анализа на израелската разузнавачка агенција Мосад.
Шајн за „Скај њуз“ изјави дека детонацијата на пејџерот била „комбинација од три елементи, кои функционирале совршено“. Тие елементи, според неа, се „разузнавањето, технологијата и оперативните способности“. „Комбинацијата на тие три фактори ја направи оваа операција успешна“. Таа тврди дека операцијата била „насочена кон оперативци на Хезболах, а не кон цивили“.
„Мислам дека кога ќе го видите големиот број повредени, ќе сфатите дека операцијата била многу прецизна и дека целта била само оперативци на Хезболах, а не цивили. Жал ми е за она што се случи во двата случаја на смрт на деца, но тоа не беше целта“.
Главната причина за нападот беше да се осигури дека голем број членови на Хезболах „нема да може да учествуваат во борбата и ќе бидат зафатени во помагањето на повредените“, додаде таа.
Таа иницира и големо прашање зошто е повреден иранскиот амбасадор. „Се поставува прашањето зошто амбасадорот на една земја е вклучен во мрежата на терористичка организација во Либан“, заклучи таа.
Европа
Французинот што донел 50 мажи да ја силуваат сопругата; еден од нив призна: Не се согласи, жал ми е
Еден од 50-те мажи обвинети за силување на Французинката Жизел Пелико во случајот за масовно силување денеска пред судот ѝ кажа дека му е жал за тоа што го направил.
Лионел Родригез е еден од малиот број обвинети што признаа дека ја силувал Пелико, која била малтретирана од десетици непознати во текот на речиси една деценија додека била во несвест, дрогирана од сопругот Доминик, без нејзино знаење.
Доминик Пелико, кој поканувал непознати мажи преку интернет во семејната куќа за да ја силуваат неговата сопруга, во понеделникот пред судот ги призна своите злосторства. „Јас сум силувач, исто како и другите (обвинети) во оваа соба“, рече тој.
Родригез, 44-годишен татко на три деца, во четвртокот ѝ се извини на 72-годишната жртва. „Извинете, не можам да го замислам кошмарот низ кој сте поминале… И јас сум дел од него. Знам дека моето извинување нема да го промени она што се случи, но сакав да ви кажам“, рече тој.
Случајот предизвика протести во Франција за поддршка на Жизел Пелико, која побара судењето да не се одржува зад затворени врати за да се открие злоупотребата.
Родригез во текот на истрагата признал дека ја силувал Жизел Пелико. На суд денеска повтори дека немал намера да ја силува, но сфаќа дека ја силувал.
„Да знаев дека не е свесна, немаше да го сторам тоа. Не разговарав со неа, па не можев да добијам нејзина согласност. Се чувствувам виновен за она што го направив“, рекол тој.
Родригез исто така се обиде да префрли дел од вината на Доминик Пелико велејќи му на судот дека го направил она што му рекол нејзиниот сопруг.
Свет
Фон дер Лајен: ЕУ ќе ѝ даде на Украина 160 милиони евра од замрзнатите руски средства
Претседателката на Европската комисија, Урсула фон дер Лајен, денеска изјави дека сума од 160 милиони евра од замрзнатите руски средства ќе биде доделена за задоволување на итните хуманитарни потреби на Украина за оваа зима.
Таа додаде дека електраната на гориво се демонтира во Литванија и ќе биде повторно изградена во Украина, каде што се уништени 80 отсто од термоцентралите во земјата, пренесува „Ројтерс“.
„Нашата цел е да го вратиме капацитетот од 3,5 GV, што е 15 отсто од потребите на Украина“, рече Фон дер Лајен.