Свет
Шефот на рускиот Совет за безбедност: Америка го претвори Авганистан во глобална лабораторија за дрога
Во изминатите 20 години САД го претворија Авганистан во лабораторија за дрога на глобално ниво, а производството на дрога во таа земја се зголеми за 40 пати во тој период, изјави за руските медиуми шефот на Рускиот совет за безбедност, Николај Патрушев.
Сегашната ситуација во Авганистан делумно се должи на неспособноста на западните разузнавачки служби и другите делови на НАТО, рече Патрушев.
„Убедувањето на военото и политичкото раководство на САД и нивните сојузници дека целосно ја контролираат ситуацијата во Авганистан доведе до апсолутно незнаење и лоша проценка на реалната состојба во таа земја“, изјави тој.
Патрушев оцени дека се направени слични пропусти кога станува збор и за други земји на Блискиот Исток, како што се Сирија, Ирак и Либија.
Шефот на Советот за безбедност на Русија, исто така, оценува дека сега обичните граѓани на Авганистан се принудени да ги платат сметките за грешките направени од Вашингтон.
„Ова е уште еден пример за вербата на Англосаксонците во исправноста на донесување одлуки, обвинувајќи ги сите други за грешките. Тоа е токму она што Америка го прави сега. Тие ја обвинуваат поранешната авганистанска влада за неспособност, иако самите ја назначиле, а зборуваат и за недоволната подготовка на авганистанската војска, иако самите ја обучувале“, нагласи тој.
Патрушев додаде дека Американците и Европејците сега ги евакуираат своите луѓе и војска од Авганистан и ги оставаат на цедило сите оние Авганистанци кои соработувале со нив.
„Време е европските застапници за човекови права да се прашаат како сето ова сега се вклопува во тие познати западни вредности“, заклучи тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Германија сака да ги подготви децата за војна преку училишна програма: „Тоа е разумна подготовка“
Германскиот сојузен министер за внатрешни работи Александар Добриндт (CSU) предложи учениците во училиштата систематски да се учат како да реагираат во кризни ситуации и во случај на војна. Тој планира да го презентира својот план во ноември на конференција на државните министри за внатрешни работи, а тој би вклучувал воведување на специјални двочасовни предавања.
„Важно е младите луѓе да разберат какви закани може да постојат и како да се подготват за нив. Децата се важни пренесувачи на знаење во семејството“, изјави Добриндт за весникот Ханделсблат, објави DW.
Остри реакции во Бундестагот
Предлогот предизвика жестоки реакции во германскиот парламент. Опозициската левица верува дека ова „шири страв кај децата и младите“, додека десничарската радикална Алтернатива за Германија (AfD) го обвини министерот за „подбуцнување војна“. Пратеникот на AfD, Готфрид Курио, тврди дека Добриндт сака „да ја направи војната неизбежен дел од секојдневниот живот“.
Од друга страна, Зелените веруваат дека идејата има смисла, но дека не е доволна. Нивниот претставник, Леон Екерт, предлага постојниот „Ден на предупредување“ да се прошири во национален ден за вежбање со цел практично да се подготват граѓаните за кризни ситуации.
Ова не е прв пат слична идеја да се дискутира во Германија. Уште за време на мандатот на претходната влада, тогашната министерка за образование Бетина Старк-Вацингер (ФДП) презентираше сличен предлог, осврнувајќи се на практиката во Велика Британија, каде што вежбите за вонредни ситуации се дел од училишната програма.
Добриндт, исто така, најави нов „пакт за заштита на населението“, кој би вклучувал подобрување на системот за предупредување, означување на заштитни зони и обезбедување основни потреби во вонредни околности.
„Нема ништо лошо во тоа секој да има основна залиха од храна, батерии и радио дома. Тоа не е паника, тоа е разумна подготовка“, рече Добриндт. Тој додаде дека интересот на граѓаните за прирачниците за цивилна заштита е голем, што покажува дека луѓето „сакаат да бидат подготвени“ во случај на криза.
Фото: принтскрин
Свет
Зеленски: Украина и нејзините сојузници ќе работат на план за прекин на огнот во наредните денови
Украина и нејзините сојузници се согласија да работат на план за прекин на огнот во следните десет дена, изјави претседателот Володимир Зеленски за „Аксиос“ по предлогот на американскиот претседател да се запре војната на сегашните граници.
„Неколку брзи точки како план за прекин на огнот. Одлучивме дека ќе работиме на тоа во следната недела или десет дена“, изјави украинскиот лидер за „Аксиос“ во интервју објавено во понеделникот.
Зеленски додаде дека Украина, за да изврши притисок врз Русија за разговори, бара од американската администрација не само ракети „томахавк“ туку и слични работи што не бараат долгорочна обука, пренесува „Ројтерс“.
Фото: принтскрин
Свет
Трамп подложен на преглед со магнетна резонанција: „Беше совршено“
Претседателот на САД, Доналд Трамп, во понеделникот изјави дека бил подложен на магнетна резонанција, без да каже зошто.
„Беше совршено“, им рече тој на новинарите во авионот „ер форс уан“ на пат кон Токио.
Магнетната резонанција користи магнети и радиобранови за да создаде детаљни слики од внатрешноста на телото. Може да се користи за следење голем број состојби.
Порано овој месец, како што анализираат медиумите, лекарот на американскиот претседател изјави дека по медицинската процена, се утврдило дека Трамп е во „исклучителна здравствена состојба“.
Во јули Белата куќа откри дека Трамп имал оток во долниот дел на нозете и модринки на десната рака откога фотографиите го покажаа претседателот со отечени глуждови и шминка што го покрива засегнатиот дел од раката.
Фото: принтскрин

