Свет
Шефот на украинската делегација: Подготвени сме да одржиме состанок меѓу Зеленски и Путин

Русија го одложува мировниот дијалог со Украина и создава впечаток на дипломатија, изјави шефот на украинската делегација на преговорите, украинскиот министер за одбрана Рустем Умеров, како што објави The Moscow Times.
Според него, Москва доставила меморандум за условите за решавање на конфликтот дури за време на состанокот во Истанбул, кој се одржа вчера. Како резултат на тоа, вели Умеров, состанокот, кој се подготвуваше повеќе од две недели, не ги донесе потребните резултати за завршување на војната.
„Се чини дека Русите повторно одолговлекуваат, обидувајќи се да создадат слика на дипломатија за Соединетите Американски Држави без вистински потези“, рече Умеров.
Единственото достигнување од втората рунда преговори, според шефот на украинската делегација, беше договорот за размена на сите тешко болни и тешко ранети воени заробеници и лица под 25 години, како и враќање на телата на загинатите во форматот „6000 за 6000“.
„Доставен е и целосно проверен список на киднапирани украински деца. Враќањето на барем дел од овие деца би бил хуманитарен чин ако Русија навистина сака да се движи кон мир“, нагласи Умеров.
Тој додаде дека Киев е подготвен да одржи состанок на ниво на лидерите на Украина и Русија до крајот на јуни, но ако за руската страна преговорите се обид за застој, тогаш „треба да има само еден одговор: заострување на меѓународните санкции“.
За потсетување, првите директни преговори меѓу Москва и Киев од пролетта 2022 година се одржаа на 16 мај во Истанбул, а резултатот беше најголемата размена на затвореници од почетокот на војната, според формулата „1000 за 1000“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Орбан до Европската комисија: Не се мешајте во внатрешните закони на земјите-членки

Унгарскиот премиер Виктор Орбан изјави дека Европската комисија (ЕК) треба да се воздржи од мешање во спроведувањето на законите во земјите-членки, реагирајќи на изјавата на претседателката на ЕК, Урсула фон дер Лајен, во врска со „Парадата на гордоста“ во Будимпешта.
Фон дер Лајен претходно ги повика унгарските власти да го овозможат настанот планиран за претстојниот викенд, објави МТИ.
Во одговор, Орбан рече дека ЕК „нема никаква улога“ во внатрешните работи на спроведувањето на законот во земјите-членки и побара наместо тоа да се фокусира на, како што наведе, „итните предизвици со кои се соочува ЕУ, како што се енергетската криза и падот на конкурентноста“, каде што Комисијата, според неговите зборови, има јасна одговорност и каде што „во изминатите години направи сериозни грешки“.
Свет
Фон дер Лајен: Ја повикувам унгарската влада да ја отфрли забраната за „Парадата на гордоста“

Претседателката на Европската комисија, Урсула фон дер Лајен, ги повика унгарските власти повторно да ја разгледаат забраната за „Парадата на гордоста“ најавена за сабота во Будимпешта и да се откажат од евентуалното казнување на нејзините учесници.
„Парадата на гордоста“ во унгарската престолнина мора „да се одржи без страв од кривично или административно гонење на организаторите или учесниците“, напиша Фон дер Лајен на X.
„Испраќам порака до LGBTIQ+ заедницата во Унгарија и на други места дека секогаш ќе бидам нивен сојузник“, додаде таа.
Во Будимпешта, од една страна, полицијата ја забрани „Парадата на гордоста“, додека градоначалникот Гергели Карачони, противник на десничарската влада на премиерот Виктор Орбан, одлучи да го одржи собирот.
Министерот за правда, Бенс Тусон, им пишал на амбасадорите од другите земји од ЕУ, велејќи дека ниту тие ниту нивните соработници не треба да имаат дозвола да учествуваат во маршот. „Правната ситуација е јасна, „Парадата на гордоста“ е забрането собирање“, напиша тој во писмо до кое увид има АФП.
И покрај забраната, голем број европратеници изјавија дека ќе дојдат во Будимпешта за да учествуваат на маршот во сабота.
Организаторите на маршот очекуваат рекордна посетеност, и покрај она што го велат Орбан и неговиот кабинет.
Премиерот им советуваше на организаторите „да не се мачат со подготовка на маршот оваа година“. „Тоа е губење пари и време“, рече тој пред да гласа за законските измени насочени кон забрана.
Властите, од друга страна, побараа поворката да се одржи на затворено место, како што е стадион или хиподром, подалеку од погледот на малолетници.
Свет
Кубилијус: На Европа ѝ е потребна армија од беспилотни летала за да се одбрани од можна руска агресија

Европскиот комесар за одбрана Андријус Кубилијус предупреди дека Европа мора итно да развие капацитети за масовно производство и употреба на беспилотни летала, за да биде подготвена да одговори на можен вооружен напад од страна на Русија.
Воените проценки покажуваат дека руските вооружени сили би можеле да бидат подготвени да нападнат една од членките на НАТО во рок од пет години, изјави комесарот Кубилијус денес за „Скај њуз“.
„Русија би можела да има на располагање околу пет милиони беспилотни летала. Ако сакаме да победиме, мора да имаме поголеми капацитети“, рече Кубилијус, нагласувајќи дека евентуалниот напад би го предводела руската армија „опремена на фронтот“, со можност за користење беспилотни летала во масовен размер.
Тој истакна дека војната во Украина предизвикала револуција во употребата на беспилотни летала во современото војување и дека според проценките, дури 80 проценти од загубите на руската армија на фронтовската линија се резултат на дејствијата на украинските беспилотни единици.
Зборувајќи за своето знаење од теренот во Украина, Кубилијус истакна дека во зоната долж линијата на фронтот, позната како „Долина на смртта“, ништо не може да се движи без да биде откриено и уништено од беспилотно летало, и дека конвенционалните тенкови во таа зона преживуваат само шест минути во просек.
Украина би можела да произведе повеќе од четири милиони дронови оваа година, а Кубилијус верува дека земји како Литванија, која има граница од 900 километри со Русија и Белорусија, би морале да произведуваат приближно три милиони дронови годишно во случај на конфликт.
Комесарот на ЕУ нагласува дека наместо да складираат дронови, кои брзо би станале застарени, европските земји треба да изградат индустриски капацитети, како и тимови од инженери и пилоти кои можат брзо да започнат со производство во случај на криза.
Комесарот предупреди дека земјите од НАТО сè уште не се подготвени да се одбранат од масовни напади со дронови, од какви што Украина страда секојдневно, и повика на забрзување на инвестициите и иновациите во оваа област.
Според претставници на Министерството за одбрана, Германија веќе потпишала договори за набавка на поголеми количини беспилотни летала и ги тестира со војниците, истакнувајќи дека приоритет е изградба на флексибилен производствен систем, а не акумулирање залихи што брзо застаруваат.
Во мај, Европската унија одобри план за инвестиции во одбранбената индустрија во вредност од 150 милијарди евра, со цел зајакнување на заедничкото производство во случај на идни безбедносни закани, пренесува Танјуг.