Свет
Јапонија: По 56 години, ослободен човекот што најдолго во светот ја чекаше смртната казна

Човекот што најдолго беше осуден на смрт во светот беше ослободен по 56 години кога беше утврдено дека доказите против него се лажни.
Ивао Хакамада, кој сега има 88 години, беше осуден на смрт пред повеќе од половина век кога беше прогласен за виновен за убиство на својот работодавец и неговото семејство во фабрика за супа во Токио во 1966 година.
Пред една година почна повторното судење поради сомнежи дека истражителите можеби подметнале докази што доведоа до тоа да биде осуден на најтешката казна за четирикратното убиство.
Случајот „Хакамада“ е една од најдолгите и најпознати правни саги во Јапонија.
На повторното судење беше утврдено дека ДНК пронајдена на облеката на жртвите не е на Хакамадин.
Поранешниот професионален боксер го признал убиството во 1968 година по 20 дена испрашување за време на кое бил претепан, но подоцна за време на судењето го повлекол признанието.
Организациите за човекови права го критикуваа потпирањето на јапонското Обвинителство на признанијата во истрагата за кои велат дека се принудени од полицијата.
Последниот ден од судењето во четвртокот привлече огромно внимание на јавноста во Јапонија, при што приближно 500 луѓе чекаа во редици за да ги заземат своите места во судницата во Токио.
Кога беше објавена пресудата, поддржувачите на Хакамада пред судот скандираа „банзаи“, што на јапонски значи „ура“.
Тој е само петтиот осуденик на смрт кому му е одобрено повторно судење во Јапонија од Втората светска војна.
Хакамада не беше во судницата поради неговата долгорочно влошена психичка состојба.
Од 2014 година, кога излезе од затвор и му беше одобрено повторно судење, за него се грижеше неговата 91-годишна сестра.
Хакамада работел во фабриката во 1966 година кога телата на неговиот работодавец, неговата сопруга и двете деца биле извлечени од пожар во нивниот дом во Шизуока, западно од Токио.
Сите четворица претходно биле избодени до смрт.
Властите го обвинија Хакамада дека го убил семејството, ја запалил нивната куќа и украл пари.
Хакамада првично негира дека ги ограбил и ги убил жртвите, но подоцна го признал делото.
Се верува дека признанието било изнудено бидејќи сослушувањата, на кои му давале седативи, траеле по 12 часа дневно.
Тој беше осуден на смрт во 1968 година за повеќекратни убиства и подметнување пожар.
Обвинителите како главен доказ против него ја наведоа облеката со крв пронајдена во фабриката, но адвокатите на Хакамада го оспорија тоа.
Тие тврдеа дека ДНК пронајдена на облеката не се совпаѓа со Хакамадин и сугерираа дека полицијата можела да подметне докази против него.
Нивниот аргумент беше доволен да го убеди судијата Хироаки Мурајама да закаже ново судење.
„Неправедно е обвинетиот да се држи во притвор бидејќи во разумен степен стана јасна можноста за негова невиност“, рече тогаш судијата.
Хакамада беше ослободен од затвор во 2014 година и до сега ја чекаше правосилната судска пресуда.
Освен што го прогласи Хакамада невин, судијата заклучи и дека доказите биле фабрикувани.
Деценискиот притвор, главно во самица, со постојана закана од егзекуција, му го наруши менталното здравје на Хакамада.
Неговата 91-годишна сестра Хидеко долго време се залагаше за негово ослободување.
Минатата година, кога почна повторното судење, таа изрази олеснување.
„Го чекав овој ден 57 години и конечно е тука“, рече тогаш таа.
Таа повеќе од половина век бара правда за својот брат.
„Конечно, каменот падна од моето срце.
Јапонија е една од двете водечки високоразвиени демократии, кои не ја укинале смртната казна.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Калас: Во Пекинг се собра автократски сојуз кој го доведува во прашање меѓународниот поредок

Високиот претставник на Европската Унија за надворешна политика, Каја Калас, денес изјави дека претседателите на Кина, Шји Џјингпинг, Русија, Владимир Путин, Иран, Масуд Пезешкијан и Северна Кореја, Ким Џонг-ун, претставуваат „автократски сојуз“ кој го доведува во прашање меѓународниот поредок заснован на права.
„Додека западните лидери се собираат дипломатски, автократскиот сојуз бара брз пат кон нов светски поредок“, рече Калас, пренесува Ројтерс.
Таа го опиша погледот на лидерите кои присуствуваа на воената парада по повод Денот на победата во Втората светска војна во Пекинг, како директен предизвик за меѓународниот систем, пренесува Танјуг.
„Ова не е само антизападна оптика“, смета Калас.
Фото: принтскрин
Регион
Вучиќ најави летачки автомобили во Србија: „Доаѓаат следната година“

Претседателот на Србија, Александар Вучиќ, ја пофали воената моќ на Кина во Пекинг, најави средба со Шји Џинпинг и воена парада во Белград на 20 септември, а исто така коментираше и за односите со другите земји и критиките од опозицијата во Србија, пишува Blic.rs.
Вучиќ рече дека воената парада во Кина покажа „стратешка компаративна предност во однос на другите земји, па затоа многумина беа изненадени од она што го видоа“. Тој особено нагласи дека сите беа изненадени од „системите DH-5, стратешките нуклеарни ракети“, додаде Вучиќ.
Тој исто така рече дека разговарал со претставници на 11 кинески компании и најави дека „тестирањето на летачки автомобили ќе започне во Србија следната година“.
Свет
ОН: Најмалку 21.000 палестински деца имаат попреченост од почетокот на војната во Газа

Комитетот на ОН за правата на лицата со попреченост (CRPD) денес објави дека најмалку 21.000 деца во Појасот Газа имаат некаков вид попреченост како резултат на војната меѓу Израел и Хамас, која трае речиси две години.
„Околу 45.500 деца претрпеле повреди предизвикани од војната“, додаде експертскиот комитет на ОН, кој се состанува двапати годишно во Женева.
CRPD нагласува дека Израел мора да спроведе посебни мерки за заштита на децата со попреченост од напади и да спроведе протоколи за евакуација на населението имајќи ги предвид лицата со попреченост. Во спротивно, смета CRPD, израелските повици за евакуација во Газа „честопати не стигнуваат“ до луѓето кои страдаат од оштетување на слухот или видот, што ја прави евакуацијата невозможна.
Експертите посочуваат на друг проблем поврзан со евакуацијата, а тоа е дека лицата со попреченост се „принудени да бегаат во опасни и недостоинствени услови, како што е лазење по песок или кал без помагала за движење“.
Лицата со попреченост, исто така, страдаат непропорционално од недостаток на храна, вода за пиење и недостаток на санитација и се зависни од други за преживување. Комитетот соопшти дека бил информиран дека најмалку 157.114 лица биле повредени помеѓу почетокот на војната на 7 октомври 2023 година и 21 август 2025 година, од кои повеќе од 25 проценти би можеле да имаат доживотни попречености.