Свет
Јапонија: Ја следиме воената активност на Кина и ќе спречиме нарушување на нашиот воздушен простор

Јапонските власти рекоа дека внимателно ќе следат дали Кина го исполнила ветувањето оти ќе спречи понатамошно нарушување на воздушниот простор на Јапонија откога објаснија дека упадот на кинески воен авион пред речиси три месеци бил ненамерен.
Токио протестира и побара објаснување од Пекинг откога кинескиот извидувачки авион „И-9“ на 26 август накратко навлезе во воздушниот простор на Јапонија кај главниот остров Кјушу поради што јапонската војска подигна борбени авиони.
Кабинетот на премиерот објави дека Кина го признала прекршувањето на воздушниот простор и ја уверила Јапонија дека ќе направи напори да спречи повторување.
„Го земаме предвид кинеското објаснување и отсега внимателно ќе ја следиме кинеската воена активност“, изјавија тие.
Кина соопшти дека прекршувањето на воздушниот простор се случило кога пилотот на авионот презел итни мерки како одговор на турбуленциите во областа и дека тоа не било намерно, соопшти јапонското Министерство за надворешни работи. Јапонските власти не открија други детали.
Иако авионите може да се најдат во турбулентни услови, толку значително отстапување од патеката на летот е незамисливо, изјавија јапонските власти.
Телевизијата NHK објави дека јапонските одбранбени претставници рекле дека сè уште го сметаат нарушувањето на воздушниот простор за неприфатливо бидејќи тоа е сериозно нарушување на територијалниот суверенитет.
Претставниците на Токио се загрижени поради зголемената воена активност на Кина околу југозападните води и воздушниот простор на Јапонија. Ова доведе до тоа Токио значително да ја зајакне својата одбрана во областа, која се смета за клучна за стратегијата за одбрана на Јапонија.
Јапонија е загрижена и за воените активности на Кина, Русија и Северна Кореја, пренесуваат медиумите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Италија прогласи петдневна жалост за смртта на папата Францискo

Советот на министри на италијанската влада денес прогласи петдневна национална жалост за смртта на папата Францискo.
Периодот на жалост започнува денес, потврдија владини извори, пренесува Анса.
Советот на министри денес свика вонредна седница за да разгледа неколку прашања, вклучително и прогласување ден на жалост.
Папата Францискo почина во понеделникot во ватиканската резиденција Санта Марта во 7:35 часот наутро од мозочен удар, проследен со кома и неповратен кардиоваскуларен колапс.
Погребот на папата Францискo ќе се одржи во сабота, 26 април, во 10 часот наутро на плоштадот пред базиликата „Свети Петар“, објави Анса, повикувајќи се на соопштението од Ватикан.
Телото на папата Францискo моментално е изложено во капелата на резиденцијата Санта Марта каде што живеел во текот на 12-те години додека бил на чело на Римокатоличката црква, објави Ројтерс.
На плоштадот „Свети Петар“ во Рим денес во 19:30 часот, ќе се одржи молитва предводена од деканот на Колеџот на кардинали, кардиналот Џовани Батиста Ре.
Свет
Гор: „Администрацијата на Трамп е како нацистичка Германија“

Поранешниот потпретседател на Соединетите Американски Држави, Ал Гор, ја спореди администрацијата на Доналд Трамп со нацистичка Германија.
Зборувајќи на митингот по повод почетокот на Неделата на климата во Сан Франциско, тој рече дека администрацијата на Трамп се обидува да создаде своја преферирана верзија на реалноста со цел да ги постигне своите сеопфатни цели слични на нацистичката партија на Адолф Хитлер во 30-тите и 40-тите, објавува „Политико“.
„Многу добро разбирам зошто е погрешно да се споредува Третиот Рајх на Адолф Хитлер со кое било друго движење. Тоа беше уникатно зло, точка. Сфаќам. Но, постојат важни лекции од историјата на тоа зло што се појави“, рече Гор, кој беше потпретседател под Бил Клинтон.
Претставниците на Белата куќа не ги коментираа изјавите на Гор.
Свет
Путин нема да присуствува на погребот на папата

Руската државна агенција ТАСС објави дека претседателот Владимир Путин не планира да присуствува на погребот на папата Франциско повикувајќи се на портпаролот на Кремљ, Дмитриј Песков.
„Претседателот нема такви планови“, изјави Песков пред новинарите, според агенцијата, додавајќи дека сè уште не е донесена одлука за тоа кој ќе ја претставува Русија на испраќањето во Ватикан.
Путин последен пат го посети папата Франциско во Ватикан во јули 2019 година.
Телото на папата Франциско ќе биде префрлено во базиликата „Свети Петар“ в среда наутро во 9 часот, објави Ватикан.
Неговото тело моментно е положено во ковчег во капелата на Каса Санта Марта, каде што живеел за време на своето 12-годишно папство.
Ватикан денес објави дека погребот на папата Франциско ќе се одржи в сабота во 10 часот на плоштадот Свети Петар. Тој ќе биде погребан во базиликата „Света Марија Голема“ во Рим.
На последното збогување ќе присуствуваат стотици илјади верници, како и странски лидери, како што се американскиот претседател Доналд Трамп, францускиот претседател Емануел Макрон и украинскиот претседател Володимир Зеленски.