Свет
Јапонскиот премиер го отпушти сопствениот син поради забава во службена резиденција

Најстариот син на Фумио Кишида, јапонскиот премиер, ќе се повлече од функцијата извршен секретар за политика поради јавните негодувања поради тоа што ја употребил официјалната резиденција за приватна забава. Фотографиите објавени од неделникот „Шукан Буншун“ го покажуваат Шотаро Кишида и десетина други луѓе како позираат или лежат на симболично важните скали на резиденцијата покриени со црвени тепих.
На други фотографии направени на забавата одржана на 30 декември минатата година се гледаат гости како стојат на подиумот како да одржуваат прес-конференција, пишува „Гардијан“.
Оставката на Шотаро Кишида, според медиумот, е удар за татко му, чиј рејтинг се подобри по самитот на Г7 овој месец во Хирошима и наводниот обид за атентат врз него. „Со оглед на тоа што тој е секретар за политички прашања на премиерот, што е јавна функција, неговите постапки беа несоодветни и решив да го сменам за да преземам одговорност. Се разбира, одговорноста за назначувањето е на мене“, изјави Фумио Кишида.
Тој најави дека неговиот син в четврток ќе биде заменет од долгогодишниот личен асистент Такајоши Јамамото. Главниот секретар на кабинетот, Хироказу Мацуно, претходно го опиша настанот како несоодветен и вети дека ќе се погрижи резиденцијата повторно да не биде злоупотребена.
Ова не беше првпат 32-годишниот Шотаро да биде критикуван за злоупотреба на службената положба.
Во јануари тој беше критикуван за користење на автомобилот на Амбасадата за приватни патувања во Велика Британија и Париз и за купување сувенири за членовите на кабинетот во луксузна стоковна куќа во Лондон.
Кишида рече дека жестоко го прекорил својот син, но тоа не успеало да ги смири критиките од јавноста и од опозициските пратеници, кои го обвинија за непотизам. Шотаро почна да работи за својот татко во март 2020 година откога ја напушти работата во трговска куќа.
Шотаро ја презеде функцијата секретар за политика во октомври минатата година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Медински: Ако Киев и НАТО се обидат да ги вратат новите руски региони, ќе следи нуклеарна војна

Помошникот на рускиот претседател Владимир Путин, Владимир Медински, денес изјави дека ако Киев и НАТО се обидат да ги вратат новите региони на Руската Федерација, ќе има нуклеарна војна.
Во интервју за Раша тудеј, Медински рече дека може да се случи нуклеарна војна ако конфликтот во Украина престане без да се склучи вистински мир, бидејќи, според него, Киев и НАТО ќе се обидат да ги вратат новите територии на Руската Федерација, пренесува ТАСС.
„Ако го запреме конфликтот по линијата на фронтот и не се договориме за вистински мир, туку само склучиме некаков вид примирје, тогаш ова ќе биде – знаете, имаше спорен регион меѓу Ерменија и Азербејџан, Карабах – тогаш овој регион ќе се претвори во огромен Карабах“, рече Медински, кој е шеф на руската делегација на разговорите со украинската страна.
Тој рече дека Москва не сака да создаде „џиновски Карабах, непризнаен од никого, поради кој може да избувне нуклеарна војна“.
„По некое време, Украина, заедно со НАТО, со своите сојузници, ќе се приклучи на НАТО, ќе се обиде да го врати, а тоа ќе биде крај на планетата, тоа ќе биде нуклеарна војна“, рече Медински.
Тој додаде дека Русија затоа сака да се склучи „целосен мир“.
„Затоа, сакаме да ја запреме војната, да склучиме целосен мир и да ги признаеме новите територии“, рече Медински, зборувајќи за териториите што Русија ги презеде од почетокот на војната во Украина, пренесува Танјуг.
Свет
Венс за Газа: Израел не врши геноцид, но тие слики ми го кршат срцето

Потпретседателот на САД, Џеј Ди Венс, ги отфрли обвинувањата дека Израел врши геноцид во Газа, но изрази жалење што на некои од неговите луѓе им недостасува човечност и не го гледаат сегашното страдање на Палестинците во енклавата разорена од војна, објавија денес израелските медиуми.
„Ги гледам тие видеа, тие слики и ми го кршат срцето“, рече Венс во подкастот на комичарот Тео Вон, кој ги опиша како „ужасни“ слики од Газа.
Потпретседателот на САД рече дека неговата земја се обидува да реши два проблема – од една страна, тука се невините Палестинци, а од друга страна, невините израелски заложници, кои, како што истакна, се вклучени во ужасното насилство што продолжува.
„Се обидуваме да им обезбедиме што е можно повеќе помош на луѓето“, рече Венс, објави „Тајмс оф Израел“.
Како што наведе, од друга страна, Израел е нападнат од ужасна терористичка организација, а луѓето понекогаш забораваат дека оваа војна започна по ужасен терористички напад во кој загинаа многу невини израелски цивили.
Венс нагласи дека администрацијата на претседателот Доналд Трамп се обидува да постигне мирно решение кое би го уверило Израел дека Хамас никогаш повеќе нема да го нападне и да убие маса цивили.
„Исто така, мора да им дадете што е можно повеќе хуманитарна помош и поддршка на Палестинците бидејќи тие се вклучени во сето ова“, рече американскиот функционер, кој не разговараше за политичко решение на поширокиот израелско-палестински конфликт, според „Тајмс оф Израел“.
Венс посочи дека не му се допаѓа фактот што целата дебата за Израел и Палестинците донекаде го деградирала човештвото, бидејќи има луѓе, претежно од левицата, кои целосно игнорираат дека толку многу невини Израелци биле убиени во терористички напад, додека други од десницата целосно го игнорираат фактот дека децата биле во средината на ова насилство. Потпретседателот на САД, исто така, ги критикуваше оние во произраелските и републиканските кругови кои тврдат дека специјалниот пратеник за Блискиот Исток, Стив Виткоф, не е доволно „произраелски ориентиран“.
Ванс тврди дека Израел не врши геноцид во Газа, додавајќи дека не мисли дека Израелците намерно се обидуваат да ги убијат сите Палестинци, туку дека им е нанесен тежок удар и се стремат да ја уништат терористичката организација Хамас што го нанесе. „Од друга страна, видов луѓе од мојата политичка средина кои гледаат видеа од невини палестински деца и велат „тие го заслужиле тоа“.
Не, не, ако имате душа, тогаш срцето ви се крши кога ќе видите како мало дете страда“, рече Ванс, додавајќи дека ова ја навело администрацијата на Трамп да се обиде да го запре конфликтот, пренесува Танјуг.
Регион
Драма во Црна Гора: две жени од Србија извлечени на брегот од силните морски струи и ветер

Две српски државјанки беа спасени денес во водите на Јадранското Море, откако силни морски струи ги одвлекоа далеку од брегот.
Како што соопшти Управата за поморска безбедност и управување со пристаништата во Црна Гора, двете жени од Србија биле однесени од брегот кај Сутоморе од силните морски струи и ветер.
Управата изјави дека центарот за поморски операции добил повик за помош утрово во 8:33 часот, по што спасувачкиот брод со екипажот испловил кон областа Сутоморе.
„На лице место пронашле две српски државјанки кои биле во морето. Тие веднаш биле извлечени од водата и безбедно транспортирани со брод на Управата за поморска безбедност и управување со пристаништата до брегот, каде што ги пречекала екипата за итни случаи“, се додава во соопштението.
Управата истакна дека акцијата била завршена брзо и ефикасно, а спасувачката екипа била поддржана од брод од Секторот за гранична полиција со екипаж.