Поранешниот американски претседател Доналд Трамп објави дека е обвинет за лошо ракување со документите што ги чувал по напуштањето на Белата куќа во јануари 2021 година.

Трамп исто така во четвртокот најави дека следниот вторник мора да се појави во судницата во Мајами. Тој исто така изјави: Јас сум невин човек“.

Ова е прво федерално обвинение во историјата на САД против поранешен претседател на САД, јавува „Гласот на Америка“.

Набргу по објавувањето на оваа информација, Доналд Трамп почна нова кампања за собирање пари за неговата кандидатура за претседателските избори во 2024 година.

Тој е фаворит меѓу републиканските кандидати за номинација.

Во последните денови Трамп и неговите соработници се подготвуваа за потенцијално обвинение имајќи предвид дека на неговите адвокати им било кажано дека тој е предмет на истрага.

Министерството за правда јавно не го потврди обвинението.

„Њујорк тајмс“ објави дека Трамп е обвинет за заговор за попречување на правдата, давање лажни изјави и свесно криење на националните одбранбени тајни, а сето тоа е прекршување на Законот за шпионажата.

Неговиот адвокат ги потврди овие наводи за Си-ен-ен.

Месечната истрага ја водеше специјалниот обвинител Џек Смит, а фокусот беше на тоа дали Трамп го прекршил законот со задржување доверливи документи без овластување или дали презел чекори да ги попречи напорите на владата да ги пронајде тие документи.

Пред тоа адвокатите на Трамп изјавија дека сите такви документи ѝ се вратени на владата.

Случајот претставува уште еден правен предизвик за Трамп, кој неодамна беше обвинет во Њујорк по 34 точки од обвинението за обид за прикривање вонбрачна афера за време на претседателската кампања.

Тој е под истрага и во Вашингтон и во Атланта, што може да резултира со кривични пријави.

Специјалниот советник Смит против Трамп истражува дали тој и неговите сојузници се обиделе да ја поништат победата на Џозеф Бајден на претседателските избори во 2020 година.