Свет
Јајцата содржат коктел од опасни хемикалии: предупредување за жителите на француски град

Жителите на северниот француски град Вилер-Сен Пол добија вознемирувачко предупредување ова лето да не јадат пилешки јајца откога тестовите открија дека локалните јајца содржат коктел од потенцијално опасни хемикалии – PFAS.
Како што пренесува „Политико“, во јајцата се откриени неразградливи хемикалии, група вештачки материи, кои не се распаѓаат и може да предизвикаат сериозни здравствени проблеми, вклучувајќи рак, оштетување на црниот дроб и проблеми со плодноста.
Не е сосема јасно како хемикалиите влегле во јајцата, но сомнежот паднал во блиската фабрика на американскиот хемиски гигант „Чемурс“, кој произведува PFAS, а кој ги вршел тестовите во согласност со договорот со локалните власти, пренесува медиумот.
„Кога слушнавме дека ќе има огромни инвестиции во локалната фабрика, сите мислеа дека проектот е многу добра вест“, рече заменик-градоначалничката Александра Уизил во интервјуто посочувајќи на отворање нови работни места и поволности за борба против климатските промени.
Додаде дека расположението се променило откога вестите откриле „вечно загадување од PFAS“.
Регионалните власти рекоа дека не знаат дали контаминацијата доаѓа од фабриката, истакнувајќи дека некои од видовите хемикалии PFAS во јајцата, вклучително и оние со највисоки концентрации, не се поврзани со фабриката, иако други се поврзани. Најавено е дека ќе бидат спроведени дополнителни тестови за да се направат заклучоците поверодостојни.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Итен состанок на министрите за одбрана на ЕУ поради Украина, дознава Блумберг

Франција и Естонија свикаа итен состанок на министрите за одбрана на Европската унија в понеделник, 24 февруари, за да разговараат за начините за зајакнување на воената поддршка за Украина, дознава Блумберг, повикувајќи се на извори.
Според изворите, на состанокот преку видео-конференција ќе учествуваат десетина министри за одбрана на Европската унија, вклучително и оние од Велика Британија, Германија, Италија и Полска, како и претставници на ЕУ и НАТО.
Како што пренесува Укринформ, Украина се подготвува да организира состанок на лидерите на земјите-партнери во Киев на 24 февруари, на кој ќе се разговара за мирот, безбедносните гаранции и иднината на колективната одбрана. Тој ден во Брисел ќе се одржи и состанок на Советот за надворешни работи на ЕУ, а војната во Украина ќе биде прва точка на дневниот ред, велат оттаму.
На 24 февруари се одбележува третата годишнина од почетокот на целосната руска инвазија на Украина.
Свет
Џеј Ди Венс: Преговараме за крај на војната, тоа не е попуштање пред Русите

Американскиот потпретседател Џеј Ди Венс одговори на тврдењата дека администрацијата на Трамп попушта пред Русија.
„Ние преговараме за крај на конфликтот. Тоа е попуштање само ако мислите дека Украинците имаат веродостоен пат до победата. Тие немаат, така што тоа не е отстапка“, вели тој во објавата на Икс.
Тој продолжува дека ова произлегува од критиките упатени кон претседателот Трамп за неговите разговори со Русите.
„Па, претседателот верува дека за да се води дипломатија, всушност треба да се разговара со луѓето. Тоа порано се нарекуваше државничко однесување“, вели тој.
Тој, исто така, вели дека постои заблуда дека САД им дале на Русите сè што сакаат.
Венс додава дека со задоволство ги брани критиките на Трамп кон украинското раководство.
Во претходното интервју за Фокс њуз, Трамп го критикуваше украинскиот претседател Володимир Зеленски дека не преговарал за мировен договор во изминатите три години, велејќи дека го смета украинскиот претседател ирелевантен за мировните преговори.
Трамп неодамна го нарече Зеленски и диктатор.
Европа
Путин до руски банкар: Маск ќе и се врати на науката, здружете ги силите со него

Рускиот претседател Владимир Путин му предложи на заменик-извршниот директор на Гаспромбанк да соработува со американскиот мултимилијардер и близок сојузник на Трамп, Илон Маск.
Дмитриј Зауерс му кажа на рускиот претседател за руските батерии што се користат во неврочипови. „Тоа е нашиот одговор на Илон Маск“, изјави банкарот Зауерс.
„Здружете ги силите со Маск. Кога ќе заврши со реформите на административните агенции во САД, ќе се врати во науката. Треба да работите со него. Веќе преговараме за заедничка работа во вселената, можеме да соработуваме и во оваа сфера“, одговори рускиот претседател Владимир Путин.
Гаспромбанк е една од најголемите банки во Русија, основана во 1990 година. Таа е поврзана со енергетскиот гигант Гаспром, најголемиот руски производител на природен гас. Иако првично беше основана како банка за финансиските потреби на Гаспром, денес работи како универзална банка која обезбедува широк спектар на услуги – од корпоративно и инвестициско банкарство до банкарски услуги на мало.
Банката игра клучна улога во финансирањето на енергетскиот сектор на Русија и често е во фокусот на меѓународните санкции, особено по руските геополитички конфликти. И покрај санкциите, Гаспромбанк останува една од најважните финансиски институции во Русија.