Свет
Јордански министер: Се плашам дека најлошото допрва доаѓа

Министерот за надворешни работи на Јордан, Ајман Сафади, рече дека неговата земја стравува дека најлошото допрва доаѓа во војната меѓу Израел и Хамас, во која сè уште нема знаци за намалување на тензиите.
По нападот на палестинската исламистичка организација Хамас на 7 октомври, во кој загинаа 1400 луѓе, Израел одговори со бомбардирање на Појасот Газа, при што илјадници луѓе ги загубија животите, а милиони од нив останаа без покрив над главата.
Јорданскиот министер предупреди дека војната меѓу Израел и Хамас, како и нејзиното проширување, може да има катастрофални последици.
„Сите индикации се дека најлошото допрва доаѓа. Оваа катастрофа ќе има болни последици во наредните периоди“, рече Сафади на прес-конференцијата со својот германски колега.
Сафади додава дека дипломатските напори не придонеле за завршување на конфликтот.
„Одлуката за завршување на војната не зависи од нас, туку од Израел и ние мора да вложиме максимални напори за да ја прекинеме“, рече тој.
Средбата меѓу јорданскиот крал Абдула и египетскиот претседател Абдел Фатах ал Сиси исто така се одржа во сенка на страв од ширење на војната.
Во изјавата по средбата и двајцата рекоа дека не прифаќаат присилно раселување на Палестинците или колективната казна што Израел ја нанесува на жителите на Газа со бомбардирање цивили по нападите на Хамас.
Сафади забележува дека Јордан ќе се спротивстави „со сите свои средства“ на масовното раселување на Палестинците што би резултирало со големи промени на Блискиот Исток.
„Ние нема да прифатиме такво решение. Ова е црвена линија, а нејзиното преминување би значело објавување војна“, рече тој.
Последниот конфликт повторно ги разгори долгогодишните стравови во Јордан, дом на значителен број палестински бегалци и нивни потомци, дека Израел ќе ја искористи можноста да ги протера Палестинците од Западниот Брег.
Јордан, кој дели граница со Западниот Брег, ги прими повеќето Палестинци кои избегаа или беа протерани од своите домови по создавањето на израелската држава.
„Нема да дозволиме Израел кризата што ја создаде, да ја извезе во Јордан“, нагласи министерот Сафади.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Тајван лут поради царините на Трамп: „Крајно неразумно“

Тајван ги нарече тарифите на Трамп „крајно неразумни“ и додаде дека тие „не ја одразуваат вистинската економска и трговска ситуација меѓу Тајван и САД“.
Тајванската влада одржа состанок за да договори одговор на царината од 32 отсто што ќе се применува на нивниот извоз во САД.
Премиерот Чо Јунг-таи, наводно, веќе поднел „сериозен приговор“ до САД.
Свет
Објавен документ, царините на САД за увоз на автомобили официјално стапија на сила

Во сила стапија царините од 25 отсто за автомобилите и лесните камиони од странско производство, а автоделовите ќе бидат покриени најдоцна до 3 мај, пренесува АФП повикувајќи се на известување објавено во Федералниот регистар.
Во известувањето се објаснува зошто се воведени царините.
„Оваа одлука следи по истрагата на американското Министерство за трговија од 2019 година, која заклучи дека зголемениот увоз на автомобили и автоделови ја загрозува националната безбедност на САД. Ситуацијата дополнително се влоши по пандемијата Ковид-19, која ги изложи слабостите во синџирите на снабдување“, се наведува во одлуката.
„Американската автомобилска индустрија се соочи со недостиг на делови, материјали и работна сила, додека странските индустрии пораснаа поради агресивните субвенции. Според наводите на одлуката на Трамп, денес само околу половина од автомобилите што се продаваат на тој пазар се произведуваат во САД“, се додава.
Царини за автоделови најдоцна до 3 мај
Царините ќе ги опфатат и автоделовите, но се очекува таа да стапи во сила најдоцна до 3 мај 2025 година. Царинската служба на САД строго ќе ја следи декларираната американска содржина на автомобилите за да обезбеди усогласеност со новите царини, се наведува во документот.
Администрацијата на Трамп вели дека царините ќе останат во сила додека не се утврди дека повеќе не се неопходни за заштита на националната безбедност.
Свет
(Видео) Трамп наметна царини од 20 отсто за ЕУ, се обрати Фон дер Лајен: „Последиците ќе бидат страшни“

Претседателката на Европската комисија, Урсула фон дер Лајен, ги коментираше царините на Трамп во видео обраќање на неколку јазици: на англиски, германски и француски.
Американските царини се „тежок удар“ за глобалната економија и Европската унија подготвува контрамерки доколку преговорите не успеат, изјави претседателката на Европската комисија Урсула фон дер Лајен.
„Веќе го финализираме првиот пакет контрамерки како одговор на царините за челик“, рече таа во изјавата прочитана пред Самитот на партнерството меѓу ЕУ и Централна Азија.
The universal tariffs announced by the US are a major blow to businesses and consumers worldwide.
Europe is prepared to respond.
We'll always protect our interests and values.
We're also ready to engage.And to go from confrontation to negotiation ↓ https://t.co/WbXqsN4ZX7
— Ursula von der Leyen (@vonderleyen) April 3, 2025
„Дополнително подготвуваме нови контрамерки за заштита на нашите интереси и нашите компании, доколку преговорите не успеат“, заклучи таа.
Фон дер Лајен вели дека последиците од американските царини ќе бидат „огромни“.
„Глобалната економија ќе претрпи голема штета, неизвесноста ќе се зголеми и ќе се поттикне понатамошен протекционизам. Последиците ќе бидат страшни за милиони луѓе ширум светот, особено за најранливите земји кои сега се предмет на највисоките американски царини“, рече Фон дер Лајен.
На прес-конференција, таа додаде дека сите компании, „големи и мали“ ќе страдаат „од првиот ден“, погодени од прекини во синџирот на снабдување, поголема неизвесност и „тешка бирократија“.
„Трошоците за водење бизнис со САД драстично ќе се зголемат“, рече таа.
„Покрај тоа, се чини дека нема ред во овој хаос. Нема јасен пат низ сложеноста и хаосот што ги погодува сите трговски партнери на САД“, истакна фон дер Лајен.
Трамп претходно најави минимална царина од 10% за повеќето стоки увезени во Соединетите Американски Држави, со повисока стапка од 20% за Европската унија, што дополнително ја интензивира глобалната трговска војна која се заканува да ја зголеми инфлацијата и да го забави економскиот раст во САД и во светот.