За време на техно забавата наречена „Rave The Planet“ во Берлин се случија голем број инциденти, во кои беа повредени 89 лица, соопшти градската противпожарна служба, додавајќи дека 69 учесници се хоспитализирани, додека неколку лица се здобиле со животозагрозувачки повреди.

Медицинските екипи им укажале помош на околу 400 лица за време на оваа масовна забава на дожд, а како што е наведено, повеќето од повредите биле предизвикани од прекумерна консумација на алкохол и дрога, објави денес германскиот весник „Билд“.

„Имало неколку сериозни повреди, а меѓу повредените имало и такви чиј живот бил во опасност“, изјавил портпарол на противпожарната служба, без точно да прецизира за какви повреди станува збор.

Извори од противпожарната служба во Берлин изјавиле за весникот „Билд“ дека за настанот се распоредени речиси сите достапни итни ресурси во градот.

„Не можете да се потпрете само на пожарникарите секоја вечер од 22 часот па натаму. Без помош на волонтерски единици, би било тешко да се справите со целата ситуација“, соопшти противпожарната служба.

Според организаторите, на настанот, кој траел до доцна навечер и покрај дождливото време, присуствувале околу 200.000 луѓе во берлинскиот Тиергартен.

Сепак, полицијата соопшти дека бројот на учесници надминал 100.000.

Според „Билд“, минатата година на оваа техно забава присуствувале околу 300.000 луѓе, а биле повикани околу 600 служби за итни случаи.

Шефовите на дипломатиите на Русија и Кина, Сергеј Лавров и Ванг Ји, денеска во Пекинг одржаа средба на која разговараа за перспективите за завршување на војната во Украина, како и за односите со САД, соопшти руското Министерство за надворешни работи.

Средбата се одржа во пресрет на учеството на Лавров на состанокот на министрите за надворешни работи на Шангајската организација за соработка (ШОС), каде Русија и Кина имаат клучна улога.

Според соопштението, двајцата министри ја потврдиле взаемната поддршка околу прашањата што се однесуваат на суверенитетот, територијалниот интегритет и националното единство на двете земји.

„Министрите изразија задоволство од позитивната динамика на руско-кинеската сеопфатна соработка и ја разгледаа билатералната агенда со фокус на спроведување на договорите од мајскиот самит во Москва“, информира руското МНР.

Во разговорот било опфатено и продлабочувањето на хуманитарната и практична соработка меѓу двете земји, како и деталите околу претстојниот самит на шефови на држави на земјите-членки на ШОС, како и проширениот формат „ШОС плус“.

Дополнително, Лавров и Ванг Ји разговарале и за односите со САД и решавањето на украинската криза, при што ја нагласиле важноста од тесна координација на глобалната сцена, особено преку Обединетите нации, Советот за безбедност, БРИКС, Г20 и АПЕК.

Кина и Русија во февруари 2022 година воспоставија стратешко партнерство без ограничувања, што беше официјализирано за време на посетата на Владимир Путин на Пекинг.

Црн џип се заби во градина на ресторан во населбата Колонаки во Атина со голема брзина доцна синоќа, од сè уште непознати причини, а според властите, во несреќата се повредени 11 лица.

Еден од повредените е задржан на интензивна нега на набљудување, додека две жени се оперирани поради сериозни скршеници, објавија грчките медиуми.

Според медиумските извештаи, возилото било паркирано на надолнина, а според првичните информации, 35-годишниот обезбедувач не ја активирал рачната сопирачка при паркирање.

Кога се обидел повторно да го паркира возилото на слободно паркинг место од другата страна на улицата, го оставил автомобилот без надзор, што му овозможило на џипот да се движи сам и да ја предизвика несреќата.

Возилото се урнало по скалите, се искачило на тротоарот, искорнало дрво, а потоа се забило во градината на ресторанот, повредувајќи неколку гости кои седеле на масите пред ресторанот.

Η στιγμή του τρομακτικού τροχαίου στο Κολωνάκι #tanea #taneagr #kolonaki #κολωνακι pic.twitter.com/96u3efOsvg

— TA NEA (@ta_nea) July 13, 2025

„Слушнав силен тресок. Некој извика кола! Пред да сфатам што се случува, бев на земја, покриен со крв. Имав среќа, дрвото го запре возилото пред целосно да стигне до масата каде што седев“, рече една од повредените гостинки во ресторанот, додавајќи дека имала скршена рака, повреди на главата и ребрата.

Очевидци рекоа дека слушнале силен тресок, кршење стакло и вресоци, а кога се приближиле до местото на несреќата, ги пронашле повредените на тротоарот, возилото се удрило во ѕид и маси расфрлани наоколу.

Веднаш по инцидентот, осомничениот обезбедувач бил уапсен, а против него е покрената постапка за нанесување тешки телесни повреди и кршење на прописите за безбедност во сообраќајот.

Сопственикот на возилото исто така бил приведен, но подоцна бил пуштен на слобода. Седум амбулантни возила биле веднаш испратени на местото на настанот, а сите повредени биле префрлени во болница.

Пет лица биле пуштени дома по добивањето на лекарска помош, додека шест биле задржани на лекување, соопшти грчкото Министерство за здравство, истакнувајќи дека сите пациенти во моментов се надвор од опасност, а нивната состојба е стабилна и под контрола.

Истрагата за точните околности што доведоа до несреќата е во тек.