Свет
Њујорк тајмс: Израел ја одложи копнената офанзива во Газа
Војската на Израел го одложи планираниот упад во Појасот Газа контролиран од Хамас за неколку дена поради лошите временски услови, се наведува во извештајот на Њујорк тајмс објавен доцна синоќа.
Копнената офанзива требаше да започне овој викенд, но делумно беше одложена поради облачното небо што би им отежнало на израелските пилоти и оператори на беспилотни летала да обезбедат воздушна поддршка за копнените сили, објави Њујорк тајмс, цитирајќи тројца неименувани високи израелски офицери.
Израелската војска синоќа соопшти дека подготовките за „интегриран и координиран напад од воздух, море и копно“ на Појасот Газа се при крај.
Целта на Израел е да го уништи политичкото и военото раководство на исламистичката организација Хамас, која истрела илјадници ракети врз Израел, додека стотици нејзини војници ја пробија границата во невиден ненадеен напад минатиот викенд, во кој загинаа повеќе од 1.300 луѓе, пишува Германската новинска агенција ДПА.
Израел одговори со одмазднички воздушни напади врз крајбрежната енклава во кои досега загинаа повеќе од 2.300 луѓе. Тајмс пишува дека копнената операција би можела да го вовлече Израел во повеќемесечна урбана војна.
Иран во саботата во објава на социјалните мрежи предупреди дека ситуацијата би можела да излезе од контрола со „далекосежни последици“ доколку не бидат запрени „воените злосторства и геноцидот“ на Израел. Се верува дека десетици илјади борци на Хамас се кријат во бункери и стотици километри подземни тунели во северниот дел на Појасот Газа, според извештајот на NYT.
Израелската војска очекува Хамас да се обиде да го спречи нивното напредување со минирање на тунелите додека се приближуваат копнените сили, се вели во извештајот. Хамас, исто така, планира да нападне зад израелските линии користејќи комплексен тунелен систем, објави Тајмс, додавајќи дека стратешката дилема е дека силите на организацијата можат да бидат особено ефикасни во спроведувањето на заложниците под земја.
Во израелската офанзива се очекува да учествуваат пешадиски единици, како и тенкови и инженеринг, пишува американскиот весник, повикувајќи се на официјални претставници. Се очекува копнените сили да добијат заштита од борбени авиони, хеликоптери, беспилотни летала и артилерија од копно и од море.
Израел ја затвори тесната палестинска територија на Средоземното Море и го запре влезот на храна, гориво, вода и лекови, пишува dpa.
Израелската закана од копнен напад, чија цел е да се уништи милитантната група Хамас, стана поблиска во петокот, кога Израел им даде на околу 1 милион жители од северна Газа околу 24 часа да се евакуираат во јужната половина на крајбрежната енклава.
Вчера Израел им кажа на жителите на Газа дека сега имаат време до 16 часот безбедно да поминат на југ преку одобрените рути. Хамас се обиде да ги спречи цивилите да го следат повикот на Израел за евакуација на северот, велејќи дека луѓето не треба да потпаѓаат на, како што ги опиша, „пропагандни пораки“.
Сведоците во Газа ја опишаа растечката паника додека луѓето бегаа со автомобили, камиони, колички со магариња и пеш по единствениот главен пат во областа. Хамас соопшти дека во тековните воздушни напади на израелските сили загинале 70 луѓе кои бегале на југ, а 200 други биле повредени.
Повеќето од жртвите се деца и жени, изјави во петокот вечерта портпаролот на исламистичката организација. Три конвои беа погодени во „масакрот“, рече тој. Нема потврда од израелската војска и извештаите се истражуваат, се вели во соопштението.
Вчера од Газа беа истрелани неколку ракети кон Тел Авив и центарот на земјата, но нема информации за повредени. Најмалку 265 израелски војници се меѓу загинатите во терористичките напади на Хамас, изјави во саботата воениот портпарол Ричард Хехт.
Огромното мнозинство од загинатите во нападите се цивили. Хехт рече дека 120 луѓе биле киднапирани од израелска територија. Според воениот огранок на Хамас, во израелските воздушни напади биле убиени вкупно повеќе од 20 заложници од Израел.
Израелската војска вели дека цели само на локации на милитантите со воздушни напади и го обвинува Хамас дека ги користи Газанците како жив штит. Имаше многу критики од целиот свет за барањето на Израел луѓето да го напуштат северниот дел на Газа, а Обединетите нации го повикаа Израел да ја отповика својата наредба, наведувајќи ја заканата од „катастрофална ситуација“.
Врвните дипломати на Турција и Египет вчера го повикаа Израел да дозволи безбедно поминување на хуманитарната помош во Газа. Низ Појасот Газа, повеќе од 2 милиони луѓе се загрозени бидејќи резервите на вода за пиење се при крај, а нема лекови или медицински материјали во преполните болници.
Базата на ОН во јужниот дел на Појасот Газа, каде што Агенцијата на Обединетите нации за помош и работа за палестинските бегалци на Блискиот Исток (UNRWA) ги пресели своите операции, исто така снема вода за пиење.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Израел: Демонстрантите бараат итен договор за заложниците, се обрати Хилари Клинтон
Илјадници активисти се собраа во центарот на Тел Авив барајќи предвремени избори и итен договор за ослободување на израелските заложници во Појасот Газа, а поранешната американска секретарка Хилари Клинтон им се обрати на демонстрантите преку видео врска. Треба да преземете итна акција за да ги вратите дома“, рече Клинтон, пренесува Танјуг.
Амбасадорот на САД во Израел, Џек Лу, рекол дека САД ги продолжуваат преговорите за враќање на заложниците, пишува The Times of Israel. Демонстрантите го блокираа автопатот Ајалон и запалија огнови, барајќи итен договор за ослободување на заложниците од Газа.
Бидејќи демонстрантите одбија да се разотидат по завршувањето на одобрениот митинг, полицијата го прогласи протестот за незаконски и интервенираше за деблокирање на автопатот.Полицијата соопшти дека уапсила осомничен за нарушување на редот на антивладините протести во Тел Авив.
Околу 200 демонстранти излегоа на одделни протести во Ерусалим, кои се одржаа во близина на Кнесетот.
Регион
Поставен рекорд во центарот на Белград: 1.000 гитаристи свиреа истовремено
Концертот на Guitar Art денеска собра 1.000 гитаристи на Трг Република во Белград, кои поставија национален рекорд во присуство на инструменталисти кои свират на гитара и слични инструменти на едно место во Србија свирејќи во рокенрол прослава со познати музичари, пренесе српска „Политика“.
Концертот „1.000 гитари“ ги привлече пред се во центарот на Белград најмладите гитаристи и нивните учители, но заедно свиреа цели семејства, составени од три генерации: дедо, татко и син…
Имаше мајки и ќерки кои „замавнаа“ со белградскиот блуз квартет и специјалните гости на концертот, меѓу кои Дејан Цукиќ, Ју групата, Кики Лесендриќ и Пилотите, Срѓан Гојковиќ Гиле, Бојана Стаменов, Никола Чутурило – Чутура. „Ова е конечно моментот кога барем на еден час ги заменуваме силиконите за витамини на Трг Република. Ова е сеќавање на мојата младост и почетоци во рокенролот. Среќен сум“, изјави Никола Чутурило Чутура за Танјуг.
За неколку минути неколку илјади љубопитни луѓе се собраа на Трг Република да уживаат во првокласен музички настан.
Свет
Сè уште се трага по хеликоптерот со кој леташе иранскиот претседател Раиси, објави ИРНА
Државната Иранска новинска агенција (ИРНА) објави дека во тек е опсежна операција за пребарување и спасување откако хеликоптерот со иранскиот претседател Ебрахим Раиси беше принуден да изврши „тешко слетување“ во планинскиот регион во северозападниот дел на Иран.
Инцидентот се случи денеска во шумата Дизмар помеѓу градовите Варзакан и Џолфа во иранската провинција Источен Азербејџан. Раиси се враќаше од Азербејџан, каде присуствуваше на отворање на брана со азербејџанскиот Илхам Алиев.
Неименуван ирански претставник за западните медиуми изјави дека хеликоптерот со кој се превезуваа иранскиот претседател Ебрахим Раиси и министерот за надворешни работи Хосеин Амирабдулахиан се урна додека летал над планинска област во иранската провинција Источен Азербејџан.
Тој истакна дека „животите на Раиси и Амирабдолахиан „се загрозени по хеликоптерската несреќа“.
„Сè уште се надеваме, но информациите кои ни доаѓаат од местото на несреќата се многу загрижувачки“, наведе неименуваниот ирански претставник.
Како што јави ИРНА, повеќе од дваесет целосно опремени тимови за пребарување и спасување, вклучително беспилотни летала и кучиња трагачи, се испратени во областа. Иранските вооружени сили распоредија командоси и специјални сили за да помогнат во операцијата за пребарување.
Поради нерамниот терен на регионот и тешките временски услови, особено густата магла во областа, операцијата за пребарување и спасување би можела да потрае некое време.
Портпаролот на Иранската служба за итни случаи изјави дека осум амбулантни возила се испратени во регионот.