Американскиот претседател Џо Бајден во јануари ќе отпатува за Рим за да се сретне со папата Франциско и со италијанската премиерка, Џорџа Мелони, објави Белата куќа – патување кое се случува само неколку дена пред крајот на неговиот мандат.

Бајден ќе се сретне и со италијанскиот претседател Серџо Матарела за време на неговата посета на Рим од 9 до 12 јануари, изјави портпаролката на Белата куќа Карин Жан-Пјер.

„Претседателот Бајден ќе има аудиенција кај Папата и ќе разговара за напорите за унапредување на светскиот мир“, рече таа, додавајќи дека со Мелони ќе разговараат за важните предизвици со кои се соочува светот.

Бајден вчера телефонски разговараше со Папата.

„Претседателот му се заблагодари на Папата за неговата континуирана посветеност за ублажување на глобалното страдање, вклучувајќи ја и неговата работа за унапредување на човековите права и заштита на верските слободи“, се вели во одвоено соопштение од Белата куќа.

Мандатот на Бајден завршува на 20 јануари, кога ќе се одржи инаугурацијата на новоизбраниот претседател, Доналд Трамп.

Социјалната мрежа „Х“ (поранешен Твитер) повторно се соочува со оперативни проблеми, а голем број корисници ширум светот пријавуваат потешкотии.

Сајтот DownDetector сними повеќе од 500 извештаи за само неколку минути, околу 19 часот, во врска со функционалноста на платформата, која е во сопственост на милијардерот Илон Маск.

Корисниците се жалат дека апликацијата не се вчитува, без разлика кој интернет прелистувач го користат или колку пати се обидуваат да ја освежат страницата. Многу корисници исто така изјавија дека не можат да пристапат до нивните профили или да испраќаат нови објави.

Ова не е прв пат X да има технички проблеми, а неодамнешните проблеми со функционалноста доаѓаат бидејќи платформата продолжува да се бори со промените што Маск ги воведе во текот на изминатата година.

Засега X не објави ништо за овој проблем, па останува нејасно што ги предизвикува моменталните тешкотии.

Претседателот на Украина, Володимир Зеленски, во Брисел се сретна со лидерите на европските земји и рече дека Украина ќе направи се за да стане силна следната година и дека ќе биде подготвена за дипломатија.

„Правиме се за да ја направиме Украина силна, никој ништо да не ни наметнува и мислам дека ќе успееме во се“, рече Зеленски.

Како што е наведено на официјалната веб-страница на претседателот на Украина, клучна тема на средбата била како да се зајакне Украина и нејзината позиција на фронтот и во дипломатијата.

Тие разговараа и за зајакнување на украинската воздушна одбрана за заштита на градовите и критичната инфраструктура.