Свет
Џјинпинг: Конфликтот во Газа не може да продолжи бесконечно
Кина сака да работи со арапските земји за да ги реши проблемите на светските жаришта на начин што води кон одржување на правичност, правда и постигнување долгорочен мир и стабилност, рече претседателот Шји Џјинпинг во говорот на Кинеско-арапскиот форум за соработка во Пекинг.
Кина, рече Шји, а објавија и државните медиуми, се обидува да ги зајакне своите односи со арапските држави како модел за одржување на мирот и стабилноста во светот.
Зборувајќи за војната во Газа, кинескиот лидер рече дека војната не може да продолжи бесконечно, дека правдата не може трајно да отсуствува и дека треба цврсто да се поддржи „решението со две држави“.
„Се соочуваме со турбулентен свет, меѓусебното почитување е начин да се живее во хармонија, а правичноста и правдата се основата на трајната безбедност“, рече тој, цитиран од „Ксинхуа“.
Им се обрати на шефовите на државите на Бахреин, Египет, Обединетите Арапски Емирати и Тунис, како и на министрите за надворешни работи на другите земји од Арапската лига.
Пекинг постојано повикува на решение со две држави за палестинско-израелската криза, како и итен прекин на огнот и членство на Палестинците во Обединетите нации, што се позиции кои се тесно поврзани со оние на арапските нации.
Кинескиот претседател посочи дека е неопходно да се избегне прелевање на конфликтот во регионот на Блискиот Исток и да се спречи уште покатастрофална хуманитарна криза во Појасот Газа, пренесе „Ксинхуа“. Тој истакна дека Кина е длабоко тажна поради големиот број невини цивили убиени во Газа и повика на меѓународна мировна конференција.
„Од октомври минатата година, палестинско-израелскиот конфликт драстично ескалира, фрлајќи го народот во огромно страдање. Војната не треба да трае бесконечно. Правдата не треба да биде недостапна засекогаш“, рече Џјинпинг.
Тој најави дека Кина ќе продолжи да го поддржува олеснувањето на хуманитарната криза и повоената обнова на Газа, ветувајќи дека ќе обезбеди уште 500 милиони јуани (69 милиони долари) во итна хуманитарна помош. Кина ќе донира три милиони долари на Агенцијата на Обединетите нации за помош и работа за палестинските бегалци на Блискиот исток за поддршка на нејзината итна помош за регионот Газа, рече тој.
„Кина ја цени важната улога на Египет во смирувањето на ситуацијата и обезбедувањето хуманитарна помош и е подготвена да работи со Египет за да продолжи да дава помош за луѓето во Газа и да промовира целосно, праведно и трајно решение за палестинското прашање“, изјави египетскиот претседател Абдел Фатах ел-Сиси.
Тој ја повика меѓународната заедница да се погрижи Палестинците да не бидат насилно раселени од завојуваниот Појас Газа, пренесува „Ал Џезира“.
Во своето обраќање, Шји ја поздрави „заедничката желба за нова ера на кинеско-арапските односи“. Пекинг сè повеќе го зајакнува своето дипломатско влијание во регионот, јавува Си-Ен-Ен, потсетувајќи дека во април Кина беше домаќин на првите преговори на кинеска територија меѓу палестинските фракции Хамас и Фатах, кои се во конфликт долго време. Минатата година, Кина посредуваше во значаен договор за помирување меѓу Иран и Саудиска Арабија по долгогодишно непријателство меѓу двата големи ривали.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Хамас предаде тела, Израел порачува: „Борбата за нашите заложници не запира“
Израел ги презеде телата на двајца заложници кои ги држел Хамас во Газа, пренесе ЦНН. Посмртните останки биле предадени преку Црвениот крст и пренесени на идентификација во израелскиот форензички институт.
Од кабинетот на израелскиот премиер соопштија дека „напорите за враќање на сите заложници продолжуваат и нема да престанат додека не се вратат сите“.
Примопредавањето се случува два дена по израелските воздушни напади во Газа, во кои, според палестинското министерство за здравство, загинале повеќе од 100 лица. И покрај ескалацијата, и Израел и Хамас изјавиле дека остануваат посветени на прекинот на огнот посредуван од САД.
Американскиот претседател Доналд Трамп порача дека „ништо нема да го загрози примирјето“ и се закани дека ќе го „елиминира Хамас“.
Последното примопредавање, според медиумите, поминало без компликации, за разлика од претходните случаи кога Хамас ја повлекуваше одлуката за предавање поради израелски напади.
Свет
Медведев го нарече белгискиот министер „имбецил“, Франкен му возврати со песна на Селена Гомез
Белгискиот министер за одбрана Тео Франкен влезе во вербален судир со поранешниот руски претседател и сегашен заменик-претседател на Советот за безбедност на Русија, Дмитриј Медведев.
Се започнало кога Франкен изјавил дека, доколку Русија ја нападне Белгија, „НАТО би ја израмнил Москва со земја“. На тоа, Медведев остро реагирал, нарекувајќи го „имбецил“ и потсетувајќи дека оваа недела Русија го тестирала нуклеарното суперторпедо „Посејдон“, кое го опишал како „вистинско оружје на судниот ден“.
Франкен утрово возвратил преку Инстаграм: „Главниот руски насилник не престанува да се заканува и навредува. НАТО не е во војна со Русија, но принципот на одмазда е неприкосновен веќе 76 години. Не повлекувам ниту збор.“
На крајот, министерот ја споделил песната „Calm Down“ од Селена Гомез со порака до Медведев – да се „смири“.
Свет
Зеленски: Новите санкции ќе ѝ донесат на Русија загуби од најмалку 50 милијарди долари годишно
Украинскиот претседател Володимир Зеленски изјави дека новите санкции против Русија ќе ѝ предизвикаат годишни загуби од најмалку 50 милијарди долари, пренесе „Укринформ“.
Тој се повика на извештај на шефот на украинската надворешна разузнавачка служба Олег Ивашченко и рече дека санкциите против нафтените компании веќе создаваат сериозни финансиски последици за Москва.
Зеленски изрази надеж дека ќе следат и нови санкциски мерки, нагласувајќи дека арапските земји со своите испораки нафта можат да спречат какви било потреси на светскиот пазар.
Тој додаде дека Украина сојузниците редовно ги информира за лица и структури што заслужуваат санкции и дека „голем дел од нашите предлози се земаат предвид“.
На 23 октомври високата претставничка на ЕУ за надворешна политика Каја Калас објави дека е одобрен 19-от пакет санкции против Русија, а американското министерство за финансии веќе воведе мерки против „Росњефт“ и „Лукоил“. Зеленски претходно изјави дека американските санкции би можеле да ги намалат руските приходи за околу 5 милијарди долари месечно.

