Атентатот врз иранскиот нуклеарен научник Мохсен Фахризад е терористички акт што претставува провокација за Иран, а Русија го осудува злосторството, изјави денеска директорот на Државната дума за надворешни работи, Леонид Слуцки.

„Убиството на иранскиот физичар Фахризад е терористички чин и провокација за Техеран. Многу е важно да се спречи ескалација на тензиите во регионот”, напиша рускиот пратеник на „Твитер“, а пренесе „Тасс“.

Слуцки истакна дека Русија го осудува убиството, „без разлика кој стои зад ова злосторство“.

„Изразуваме длабоко сочувство до Иран и семејството на Фахризад“, додаде тој.

Иранската агенција ИСНА објави дека началникот на иранскиот Генералштаб, Саид Абдолрахим Мусави, тврди оти Израел и САД стојат зад атентатот.

Иранскиот претседател Хасан Рохани уште вчера вети дека атентатот врз научникот нема да остане без одговор.

„Иран ќе даде одмерен и решителен одговор поради убиството на најдобриот државен нуклеарен научник Мохсен Фахризад“, изјави претходно советникот на Врховниот водач Али Хамнеи.

Некои весници во Техеран денес соопштија дека иранската одмазда „треба да вклучува напад врз израелскиот град Хаифа“.

Иранскиот министер за одбрана рече дека прво било пукано кон автомобилот на Фахризад, а кратко потоа експлодирал пикап-камион полн со експлозив на растојание од околу 15 до 20 метри. Набргу потоа, нуклеарниот физичар им подлегнал на повредите во болница.

Австриската министерка за одбрана Клаудија Танер денеска добила позитивен тест на коронавирус.

Министерката, како контакт на заразено лице, веќе десет дена е во самоизолација.

Танер е втор член на австриската влада, по министерот за надворешни работи Александар Шаленберг, кој е позитивно тестиран.

Министерот за надворешни работи исто така нема никакви симптоми, како и министерката, која од дома ги извршува сите државни работи.

Претседателот на Србија, Александар Вучиќ вечерва се сретна со премиерката Ана Брнабиќ и министерот за надворешни работи Никола Селаковиќ, за да разговараат за потезите на српската дипломатија откако Црна Гора го протера српскиот амбасадор.

„Вчера побаравме амбасадорот Тарзан Милошевиќ да ја напушти територијата на Република Србија. Тоа го сторивме откако нашиот амбасадор беше прогласен за персона нон грата“, рече премиерката Ана Брнабиќ, додавајќи:

„Претседателот не покани мене и министерот Селаковиќ да се консултираме за оваа одлука на Владата – тој ја разбира и ја поддржува одлуката, ние реагиравме во согласност со Виенската конвенција, сосема нормално и природно“.

Сепак, како што посочи српската премиерка, Вучиќ побарал консултации за оваа одлука, врз основа на што е донесена нова одлука Србија еднострано да се повлече од протерување на црногорскиот амбасадор.

„Не сакаме да имаме таков непријателски чин кон Црна Гора, затоа ја донесовме оваа одлука денес. Жалам што во Црна Гора се почесто се менува вистината и се вели дека Србија била окупатор во Првата светска војна“, вели Брнабиќ.

Таа исто така изрази надеж дека ова ќе биде сфатено како дело на добра волја и изјави дека одлуката ќе биде повлечена уште вечерва.

Претседателот Вучиќ, без оглед на мерките за реципроцитет, откако Црна Гора го протера српскиот амбасадор, бара смирување на страстите, не само поради големиот број Срби во таа земја, но и поради положбата на Србите во регионот, пишуваат тамошните медиуми.