Владеачката партија на францускиот претседател Никола Саркози претрпе тежок пораз на неделните регионални избори во земјата

Владеачката партија на францускиот претседател Никола Саркози претрпе тежок пораз на неделните регионални избори во земјата.

Опозициските партии и нивните сојузници од левицата собраа 56 проценти од гласовите ќе раководат со 21 од 22 региона во Франција, јавија агенциите, додавајќи дека владеачката Унија за народно движење на Саркози освои само 37 отсто од гласовите.

Десницата на Саркози успеа да ја задржи власта само во Алзас, а пораз доживеа и на Корзика. Социјалистите во претходниот мандат ја имаа власта во 20 региони во Франција.

Екстремно десничарскиот Национален фронт на Жан Мари Лепен, освои речиси 10 отсто од гласовите, а во некои региони за него гласаа и над 20 проценти од избирачите.

„Резултатите од изборите го потврдија успехот на левицата. Тоа е разочарување и подготвен сум го да преземам својот дел од одговорноста“, изјави францускиот премиер Франоса Фијон. На регионалните избори беа кандидирани дури 20 министри од неговата влада.

Се очекува Фијон на претседателот Саркози да му понуди оставка, а малку е веројатно дека тој ќе ја прифати, но не се исклучува можноста од помали промени во владата.

Социјалистите оценија дека Французите ја отфрлија политиката на Саркози, која делува во корист на привилегираните на сметка на вработувањето и животниот стандард.

„Да се послушаат Французите значи во корен да се промени политиката“, изјави по изборите лидерката на опозицијата Мартин Обри.

Овие избори претставуваат тест пред наредните претседателски избори во Франција, што треба да се одржат 2012 година. /крај/ста/мп