Свет
Јужнокорејскиот брод потона близу до границата со Северна Кореја

Јужнокорејскиот воен брод, по експлозија од засега непознати причини, потона денеска во близина на границата со Северна Корејa
Јужнокорејскиот воен брод, по експлозија од засега непознати причини, потона денеска во близина на границата со Северна Кореја
Ова го соопштија јужнокорејски воени извори, додавајќи дека се спасени 58 од 104 морнари колку што имало на бродот.
Владата во Сеул веднаш свика вонредна седница, а портпаролот на претседателството рече дека се уште не е јасно дали тонењето на бродот е последица на поморски инцидент со севернокорејските сили.
Јужнокорејската агенција Јонхап прво објави дека еден јужнокорејски брод отворил оган на неидентификуван објект на местото на инцидентот, а претставник на главниот штаб соопшти дека мета всушност било јато птици.
Засега не е утврдено дали Северна Кореја е вмешана, рече портпаролот на јужнокорејското претседателство Ким Еун Хие, додавајќи дека е шефот на државата Ли Мјунг Бак наредил да се направи се што е можно за спасување на екипажот.
Агенцијата Јонхап, повикувајќи се на владини извори, рече дека со истрагата се опфатени неколку можни извори на тонење на бродот и тоа севернокорејски торпеден чамец, подметната бомба и експлозија на оружениот арсенал на бродот.
Бродот со тежина од 1.400 тони потона во близина на островот Беангнеонг во Жолтото море.
Односите меѓу двете Кореи значително се влошија во 2008 година кога на власт дојде јужнокорејскиот претседател Бак.
Северна и Јужна Кореја по војната на Корејскиот полуостров пред 60-тина година се уште не склучиле мировен договор, туку само примирје./крај/хи/мп
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Русија и Украина утре ќе разменат 175 воени заробеници

Русија и Украина утре ќе разменат 175 воени заробеници од двете страни, изјави претседателот Владимир Путин за време на телефонскиот разговор со неговиот американски колега Доналд Трамп.
-Путин објави дека на 19 март руската и украинската страна ќе разменат по 175 затвореници, се вели во соопштението на Кремљ.
Белата куќа, од своја страна, објави дека Трамп и Путин се договориле за 30-дневен прекин на огнот во енергетскиот и инфраструктурниот сектор на Украина и дека преговорите за ставање крај на конфликтот ќе започнат „веднаш“.
Тие разговори ќе бидат на Блискиот Исток, соопшти Белата куќа, пофалувајќи ги „огромните придобивки од подобрените односи“ меѓу САД и Русија
Свет
Трамп: Со Путин е договорен прекин на огнот за енергетските и инфраструктурните објекти

Американскиот претседател Доналд Трамп изјави дека во денешниот телефонски разговор со неговиот руски колега Владимир Путин се договорил за итен прекин на огнот меѓу Русија и Украина во сите енергетски и инфраструктурни објекти.
„Се согласивме на итен прекин на огнот на сите енергетски и инфраструктурни објекти, со разбирање дека ќе работиме брзо за да постигнеме целосен прекин на огнот и, на крајот, да ставиме крај на оваа многу страшна војна меѓу Русија и Украина. Оваа војна никогаш немаше да започне ако јас бев претседател“, рече Трамп на Truth Social.
Тој додаде дека имал „многу добар и продуктивен“ разговор со Путин и дека разговарале за „многу елементи од мировниот договор, вклучувајќи го и фактот дека илјадници војници умираат“.
„Тој процес сега е во полна сила и ефект, и се надеваме, заради човештвото, дека ќе ја завршиме работата“, рече Трамп.
Свет
Гутереш ги повика Израел и Хамас целосно да го почитуваат прекинот на огнот во Газа

Генералниот секретар на Обединетите нации Антонио Гутереш денеска ги повика Израел и палестинската милитантна група Хамас целосно да го почитуваат прекинот на огнот во Појасот Газа.
Тој рече дека Палестинците во Појасот Газа се подложени на „неподносливо страдање“ додека израелските напади продолжуваат немилосрдно.
Гутереш им рече на новинарите во Женева дека улогата на ОН е меѓународната заедница да изврши притисок врз Израел и Хамас целосно да го почитуваат прекинот на огнот во Појасот Газа, пренесе Ал Џезира.
Министерството за здравство на Хамас објави дека повеќе од 400 луѓе, главно палестински деца и жени, биле убиени во текот на ноќта во израелските напади врз Појасот Газа.