Турскиот претседател Реџеп Таип Ердоган изјави во петокот дека Турција нема да потклекне пред „уличниот терор“ на третиот ден од протестите што избија поради апсењето на опозицискиот градоначалник на Истанбул, Екрем Имамоглу, под обвинение за тероризам и корупција.

„Турција нема да потклекне пред уличниот терор“, рече Ердоган, оценувајќи дека протестите што ги свика опозицијата ќе завршат во „ќорсокак“.

„Нема да толерираме никакво нарушување на јавниот ред“, додаде тој.

Озгур Озел, лидер на Републиканската народна партија, најголемата опозициска партија во земјата на која и припаѓа Имамоглу, ги повика Турците да излезат на улица во петок во 20:30 часот по локално време, и покрај предупредувањата од властите.

„Од сега никој не треба да очекува Републиканската народна партија да води политика во сали или згради. Отсега ние сме на улиците и на плоштадите“, рече Озел во четвртокот вечерта пред градското собрание на Истанбул, каде илјадници луѓе се собраа втор ден по ред во поддршка на Имамоглу, главниот ривал на Ердоган.

Два моста и неколку главни патишта кои водат до Градското собрание беа затворени за сообраќај денеска на 24 часа.

Протести се одржуваат од средата во најмалку 32 од 81 провинција во Турција, според АФП.

Министерот за правда Јилмаз Тунч ги опиша повторените повици на опозицијата за протести како „нелегални и неприфатливи“.

Ваков бран протести во Турција не се памети од големите протести во 2013 година кои започнаа од плоштадот Таксим.

Екрем Имамоглу, кој истражителите почнаа да го испрашуваат во петокот попладне, требаше да биде именуван за кандидат на Републиканската народна партија за претседателските избори во недела.

Но, во вторникот вечерта, неговата универзитетска диплома беше одземена, само неколку часа пред да биде уапсен. Турскиот устав предвидува дека кандидатот за претседател мора да има високо образование.

Имамоглу беше реизбран за градоначалник на Истанбул во 2024 година, откако го одзеде градот од владејачката АКП во 2019 година.

Припадници на МВР во Лесковац уапсиле 16-годишник од околината на тој град, под сомнение дека со нож се обидел да убие врсник.

Тој е осомничен за кривично дело убиство во обид, информираат од Полициската управа во Лесковац, пренесува Танјуг.

Се сомничи дека вчера по кратка дискусија двапати со нож прободел шеснаесетгодишник во пределот на градите и стомакот и на улицата му нанел тешки повреди опасни по живот.

На повредениот најпрво му била укажана лекарска помош во Општата болница во Лесковац, а потоа е пренесен во Клиничкиот центар во Ниш.

Осомничениот со кривична пријава е приведен во Вишото јавно обвинителство Лесковац и по сослушувањето на судијата за претходна постапка му одреди мерка притвор во траење до 30 дена.

Ако посетите на членовите на британското кралско семејство служат за испраќање политички пораки, тогаш фотографијата на принцот од Велс во тенк во близина на руската граница е една од најдиректните, пренесува Би-би-си.

Имено, принцот Вилијам пристигна во Естонија за да ги поддржи британските војници во најголемото странско оперативно распоредување на британската армија, која ја брани оваа балтичка држава од потенцијална руска закана. Во петокот, на ледениот и каллив воен полигон, принцот набљудуваше војници и воена опрема кои го чуваа источното крило на НАТО, пренесува медиумот.

Би-Би-Си известува дека принцот Вилијам, во маскирна униформа, гледајќи од тенк Челинџер 2, а потоа од оклопно борбено возило, „јасно ја изрази решеноста на Британија да спречи каква било руска агресија“.

За време на дводневната посета на Естонија, принцот Вилијам направи обиколка на некои од 900 британски војници кои ја сочинуваат оваа мултинационална група, вклучително и членови на полкот Мерсиан, чиј почесен полковник е.

Тој го обиколи воениот полигон во кампот, каде што се спроведува операцијата Кабрит, придонес на Британија за „колективната безбедност и одбрана“ на НАТО на овој ранлив балтички регион. Принцот, носејќи ги ознаките на НАТО на својата униформа, ја набљудувал теренската обука на борбената група и разговарал со естонските и француските војници.

Тој ги праша војниците за нивното распоредување во контекст на „блискост со Русија“ и ги праша дали оваа ситуација им изгледа пореална од претходните вежби.

Посетата беше фокусирана и на добросостојбата на војниците стационирани таму. Принцот Вилијам праша дали сè уште постои стигма околу разговорите за менталното здравје во војската. „Тоа оди во вистинската насока“, му рече службеничката за социјална помош Ејми-Џејн Хејл.