Ќе има ли или ќе нема втор круг од гласањето за градоначалник на Скопје е дилемата што остана отворена вчера до затворање на весникот поради „доцнењето“ со пребројување гласови во седум скопски општини.

Ќе има ли или ќе нема втор круг од гласањето за градоначалник на Скопје е дилемата што остана отворена вчера до затворање на весникот поради „доцнењето“ со пребројување гласови во седум скопски општини. Во штабот на независниот кандидат за градоначалник на Скопје Трифун Костовски, откако прексиноќа беше прогласена убедлива победа во првиот круг, вчера на прес-конференцијата изразија сомневање во процесот на пребројување и сумирање на резултатите. Тие реагираа на „доцнењето на резултатите“ откако во штабот на владејачката коалиција „За Македонија заедно“ вчера на прес-конференцијата соопштија дека изборите за Скопје не се завршени и дека на Костовски му недостигале околу 6.000 гласа за победа во првиот круг. Остана нејасно и во кој рок Изборната комисија на градот Скопје треба да ги објави резултатите.

– Секој обид да се оспори победата на Костовски во првиот круг е обид за фалсификување на изборите – рече Маја Мухиќ, портпаролка на Изборниот штаб на Костовски.

Во штабот оценија и дека е „смешно да се спорат вакви изборни резултати“ и дека со евентуално одење во втор круг, Костовски ќе добие уште повеќе гласови, бидејќи револтот на граѓаните ќе го зголеми одѕивот. Во штабот на Костовски и вчера останаа на прексиноќа објавениот резултат според кој Костовски освоил 58,29, а кандидатот на владејачката коалиција Ристо Пенов – 32,92 отсто гласа. Оттаму се повикуваат и на резултатите на НВО „Мост“ според кои 53,73 отсто скопјани гласале за Костовски, а 31,02 проценти за Пенов.

Стравувања дека ќе има обид за фалсификување на резултатот во Скопје вчера изразија и опозициските партии. Од штабот на здружената опозиција предупредија дека се „дебело пречекорени“ роковите за објавување резултати. Оттаму посочуваат на упатството за објавување изборни резултати што Државната изборна комисија (ДИК) го донесе на 1 март годинава. Според упатството на ДИК, избирачкиот одбор ги доставува записниците и другиот изборен материјал до општинската изборна комисија во рок од пет часа по завршувањето на гласањето и ги објавува и истакнува сумираните резултати од извршеното гласање на гласачкото место. Општинските изборни комисии имаат рок од пет часа да ги сумираат резултатите добиени од одборите, по што тие во рок од три часа треба да бидат доставени до Изборната комисија на градот Скопје.

Тоа, според правните служби, во штабот на опозицијата требало да се случи уште вчераутро. Но, во ДИК не се согласуваат.

– Упатството на важи. Според членот 71 од Законот за локални избори, имаме рок од 24 часа од затворањето на избирачките места за да ги објавиме резултатите – изјави Зоран Теневски, портпарол на ДИК.

Во членот 71 од Законот се вели дека Изборната комисија на градот Скопје првичните резултати ги објавува во рок од 24 часа по добивањето на изборниот материјал од избирачките одбори.

Анита Данаилова, претседателка на Изборната комисија на градот Скопје, вчера околу 16.30 часот уште ги немаше резултатите од општините Аеродром, Гази Баба, Кисела Вода, Центар и Чаир. Таа не можеше до прецизира кога истекува законскиот рок за објавување на резултатите.

– Ги чекаме записниците од општинските изборни комисии. Се надевам дека вечерва до 24 часот ќе ги имаме првичните резултати за Скопје – рече Данаилова. Д. М.

********

Панде Лазаревски: Се гласаше на начин што може само да се посака

Наспроти одредени неправилности што беа евидентирани, изборите генерално поминаа на начин што може само да се посака. Тоа е знак дека работите се раздвижуваат. Бројките се уште не би ги коментирал без увид во комплетните резултати и без сериозна анализа – изјави Панде Лазаревски, директор на Институт за социолошки и политичко-правни истражувања.

********

Ѓорѓи Кимов: Резултатите бавно пристигнуваат

Немам прецизна слика за резултатите бидејќи тие бавно пристигнуваат. Во основа, изборите беа фер и демократски иако, за жал, не успеавме да го постигнеме посакуваното ниво што во моментов ни е потребно за почнување на процесот на преговори за влез во ЕУ. Имаше доста инциденти што фрлаат сенка на изборите. Бројките се очекувани и наполно ја одразуваат состојбата на поделеноста во опозицијата – оцени Ѓорѓи Кимов, директор на „Брима-Галуп“.