Кабинетот на израелскиот премиер Бенјамин Нетанјаху соопшти дека утре ќе бидат ослободени осум заложници држени во Појасот Газа, пет Тајланѓани и тројца Израелци – две жени и еден маж.

Имињата на тројцата израелски заложници, се објавени со согласност на нивните семејства, се наведува во соопштението, пренесуваат светските агенции.

Идентитетот на петте тајландски државјани не е објавен.

Договорот за прекин на огнот стапи во сила на 19 јануари меѓу Израел и палестинското движење Хамас, со цел конечно да се стави крај на војната во Појасот Газа, предизвикана од нападот на Хамас врз Израел на 7 октомври 2023 година.

Момче кое се заразило со дифтерија починало во болница во Берлин и покрај повеќемесечното лекување, објави агенцијата ДПА.

Детето од Бранденбург не било вакцинирано, соопштија здравствените власти.

Во септември минатата година, десетгодишно момче било примено на детската клиника во Потсдам поради акутен тонзилитис. Подоцна била дијагностицирана дифтерија.

Детето било префрлено во клиника во Берлин, каде било ставено на вентилатор.

Институтот за здравје ги испита контактите на детето и откри дифтерија кај друг член на семејството. Меѓутоа, оваа личност доживеала само благ тек на болеста поради вакцинација.

Смртните случаи од дифтерија се ретки во Германија и во западниот свет, според агенцијата.

Бернхард Косак, раководител на педијатриската итна медицина на Клиниката во Западен Бранденбург, во интервју за весникот Märkische Allgemeine минатата година предупреди за опасностите од невакцинирањето.

Тој предупреди дека многу луѓе погрешно веруваат дека модерната медицина може целосно да ги лекува болестите што може да се спречат со вакцини.

Инфекциите како менингококна болест, пневмококна болест, сипаници, заушки, рубеола, дифтерија и тетанус често имаат ограничени опции за третман и носат ризик од тешки компликации, додаде тој.

Работната група на Кремљ чија цел е да се спречи надворешно мешање тврди дека Западот се подготвува да се меша во парламентарните избори во Русија во 2026 година.

„Комисијата ја забележува активната подготовка на западните земји да организираат обиди за мешање во изборите за Државната дума во 2026 година“, се вели во документот што го пренесе руската државна новинска агенција ТАСС, а на кој се повикува „Политико“.

„САД и нивните сателити веќе се обидоа да се мешаат во руските избори во 2024 година“.

Минатата година Москва се соочи со бројни критики од западните земји за обидот да се влијае на претседателските избори во Романија, како и на претседателските избори и референдумот за пристапување во ЕУ што Молдавија ги организираше во октомври.

Покрај тоа, на минатогодишните руски претседателски избори, одржани без автентична политичка опозиција, победи претседателот Владимир Путин со 87 отсто од гласовите, пренесува медиумот.

Владимир Путин е претседател или премиер на Русија од 2001 година.