Свет
ДУИ и ДПА со најмногу путер на глава
Кај сите четири најголеми партии – СДСМ, ВМРО-ДПМНЕ, ДУИ и ДПА, државните ревизори утврдиле неправилности во финансиското работење во 2004 година.
РЕВИЗОРИТЕ ОТКРИЛЕ НЕПРАВИЛНОСТИ КАЈ ЧЕТИРИТЕ НАЈГОЛЕМИ ПАРТИИ
Кај сите четири најголеми партии – СДСМ, ВМРО-ДПМНЕ, ДУИ и ДПА, државните ревизори утврдиле неправилности во финансиското работење во 2004 година. Во извештајот, на кој партиите имаат еден месец рок за жалба, ревизорите се сомневаат дека партиите реално ги прикажале примените и потрошените пари за сите свои активности. Ревизијата ја критикува и регулативата за партиите и заклучила дека со неа не се воспоставуваат соодветни услови за поголема контрола на трансакциите, во сметководството и во финансирањето.
Најмногу пропусти имаат ДУИ и ДПА. Партијата на Али Ахмети воопшто не доставила сметка за финансиското работење во 2004 година до Државниот завод за ревизија. Таа партија, исто како и ДПА, не доставила ни попис на средствата и нивните извори. Двете најголеми партии на Албанците во Македонија не го воделе сметководството според Законот за непрофитните организации, односно приходите и расходите "ги евидентирале на пресметковен принцип, а не според паричното искажување на сметката на политичката партија". Поради тоа партиите прикажале нереална загуба во работењето. И ДУИ и ДПА не направиле ни извештаи за добиени донации.
За партијата на Ахмети е наведено дека користи градежни објекти кои не се во нивна сопственост, туку дека им припаѓаат на поединци, а тоа го потврдиле сопствениците на објектите.
Во извештајот се вели дека ДПА не води задолжителни помошни книги за набавка, за капитален имот и за влезни и излезни фактури. И ВМРО-ДПМНЕ не располага со потребните книги. Од оваа партија објасниле дека ги немаат бараните сметководствени книги поради разидувањата во ВМРО-ДПМНЕ и формирањето на ВМРО-Народна по претседателските избори, кога не било извршено примопредавање на целата партиска документација и на печатите.
Кај СДСМ проблематично било попишувањето на имотот. Според пописните листи и сметководствената евиденција, СДСМ има два објекта, додека според информации од Управата за јавни приходи во 2003 година, партијата остварила приходи од закупнина и од издавање други градежни објекти кои не се наведени во пописните листи.
Ревизијата во партиското седиште на ДПА во Тетово забележала дека тоа е опремено со канцелариска и друга опрема која не била евидентирана во сметководствената евиденција ниту во пописните листи. Од партијата им објасниле дека тоа не е во сопственост на ДПА, туку дека ги добила на користење.
Износите прикажани во финансискиот извештај за ВМРО-ДПМНЕ, според ревизорите, не даваат уверување дека сите активности се евидентирани, бидејќи биле забележани приходи од само 236.000 денари, а расходите се помали од 1.000 денари. Во извештајот на ревизијата се вели дека ги имале предвид внатрепартиските случувања, но бројките се премали бидејќи се работи за голема политичка партија со сопствено седиште и активности, особено во година на вонредни претседателски избори.
Државниот завод за ревизија се обратил и до Советот за радиодифузија за да провери колку пари потрошиле партиите за рекламирање во медиумите во изборната кампања, а податоците оттаму им ги потврдиле сомнежите дека пријавените суми се реални.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Свиркач од „Боинг“: Беше прашање на време кога ќе се случи нешто лошо, знаеа за дефектите, но чуваа во тајност
Сантијаго Паредес, свиркач од авиокомпанијата „Боинг“ каде што работеше како менаџер за квалитет, рече дека „прашање на време било кога ќе се случи нешто лошо“, мислејќи на серијата дефекти на авионите на компанијата во изминатиот период.
Паредес работел 10 години во фабриката „Spirit AeroSystems“ во американската сојузна држава Канзас, каде што ја проверил исправноста на трупот на Боинг 737, пренесува CBS News.
„Многу ретко се случуваше да не најдеме дефект“, рече Паредес, додавајќи дека квалитетните менаџери често наоѓале дефекти дури и на авионот од кој вратата падна сред лет во јануари.
„Зошто се случи тоа? Затоа што Спирит не обрнале внимание на пропустите поради притисокот што им бил наметнат на инспекторите. Да беше добра културата, ќе беа спомнати“, изјави Паредес.
Тој истакна дека Боинг со години знаел дека „Спирит“ испорачува трупови со дефекти и дека „само прашање на време било кога ќе се случи нешто лошо“.
Паредес бил под постојан притисок од претпоставените да пријави што помалку дефекти и дека притисоците нагло се зголемиле во 2018 година, кога производството на трупови се зголемило од 30 месечно на 50.
„Секогаш велеа дека немаат време да ги поправаат грешките. Бев во позиција каде што ако кажам не, ќе ме отпуштат. Ако кажам „да“, признавам дека нешто ќе згрешам“, изјави Паредес.
Во февруари 2022 година, претпоставените на Паредес, наводно, побарале од него да ги забрза инспекциите и да биде помалку детален за пропустите што ги наоѓа, што го натерало да испрати е-пошта велејќи дека нивното барање е „неетички“ и го ставиле „во многу непријатна ситуација“.
Потоа на Паредес му беше одземена менаџерската титула, по што тој се пожали до одделот за човечки ресурси, кој го врати на работа, но тој сигурно се повлече во летото 2022 година.
„Се изморив од борба. Се изморив од обидот да ја направам вистинската работа“, рече Паредес.
Свет
Протести во Тел Авив, Израелците бараат ослободување на заложниците
Илјадници Израелци излегоа синоќа на улиците барајќи владата на премиерот Бенјамин Нетанјаху да направи повеќе за да обезбеди ослободување на заложниците кои ги држеше исламистичката група Хамас во Појасот Газа.
Како што пренесува „Ројтерс“, членовите на семејствата на заложниците носеле слики од нивните најблиски кои се уште се во заробеништво и се приклучиле на толпата што протестира во Тел Авив.
Една од нив беше Наама Вајнберг, чиј братучед Итаи Свирски беше киднапиран за време на нападот на Хамас на израелските градови на 7 октомври и, според израелските власти, бил убиен во заробеништво.
Во говорот таа се осврна на видеото кое Хамас го објави вчера, тврдејќи дека уште еден од израелските затвореници починал.
„Наскоро дури и оние кои успеаја да преживеат толку долго нема да бидат меѓу живите. Тие мора да се спасат сега“, рече Вајнберг.
„Апсолутно е јасно дека израелската влада е целосно идеолошки банкротирана. Тие немаат поим што прават. Јасно е дека не се обидуваат да спасат ниту еден заложник или да ја прекинат војната. Владата всушност ја води најекстремниот фундаменталист , чија идеологија нема никаква врска со демократските идеали“.
Како што одминуваше вечерта, некои демонстранти го блокираа главниот автопат во градот пред полицијата да ги растера со водени топови, а некои директно се судрија со полицијата. Уапсени се најмалку три лица.
Свет
Трагедија во Индонезија: на автобус со матуранти му откажаа сопирачките, загинаа најмалку 11 лица
Најмалку 11 лица, претежно ученици, загинаа во тешка несреќа со училишен автобус во Индонезија, пренесува „АП“.
Според извештаите, на автобусот му откажале сопирачките, по што удрил во неколку автомобили и мотоцикли пред да удри во столб и да се преврти.
Автобусот со 61 ученик и професор се враќал доцна синоќа во средното училиште во Депок во близина на главниот град Џакарта, од туристичкиот град Бандунг по прославата на матурирањето, изјави портпаролот на полицијата во Западна Јава, Жил Абрахам Абаст.
„Автобусот изгубил контрола на удолницата и преминал на спротивната лента, удрил во неколку автомобили и мотоцикли пред да удри во столб за струја“, рече тој.
Девет лица загинаа на местото на несреќата, а уште две починаа подоцна во болница, меѓу кои и наставникот и возачот на автобус, потврди Абаст. Уште 53 лица се хоспитализирани со повреди, меѓу кои и некои во критична состојба.
„Се уште ги истражуваме причините за несреќата, но прелиминарната истрага покажа дека сопирачките на автобусот биле неисправни“, рече Абаст.
Тешките сообраќајни несреќи не се невообичаени во Индонезија, пред се поради лошите безбедносни стандарди и патната инфраструктура.