Претседателот на долниот дом на Русија (Државната Дума) сугерираше дека британскиот имот во Русија би можел да бидат запленет, откако Обединетото Кралство претстави заем од 2,26 милијарди фунти за зајакнување на одбраната на Украина, кој ќе се финансира со профит од замрзнатите руски средства.

„Англискиот трансфер на средства во сопственост на Русија во Украина е грубо кршење на меѓународното право. Тие ќе мора да ѝ го вратат на Русија она што сега толку великодушно го споделуваат“, рече Вјачеслав Володин, преенесе новинската агенција Интерфакс.

Володин додава дека британските акции значат дека „довербата во британскиот финансиски систем засекогаш ќе биде поткопана“.

„Сега нашата земја има добри причини да одговори на сличен начин и да заплени британски имот во нашата земја“, заклучи Володин.

Г7 се согласи во јуни 2024 година да користи замрзнати руски средства за да собере 50 милијарди долари за Украина за да и помогне во борбата против инвазијата.

Американскиот претседател, Доналд Трамп, денеска изјави дека сака да преговара за нуклеарен договор со Иран и дека оваа недела испратил писмо до иранското раководство во кое предлага разговори, во време кога Западот стравува дека Исламската Република се приближува кон производство на нуклеарно оружје.

„Се надевам дека ќе преговараат бидејќи тоа би било многу подобро за Иран“, рече Трамп во интервју за „Фокс бизнис нетворк“.

Иранската мисија во Обединетите нации во Њујорк соопшти дека Иран сè уште не го добил писмото. Иранската агенција Нур, блиска до највисокото тело за национална безбедност, го отфрли писмото на Трамп, нарекувајќи го „повторување на веќе виденото шоу на Вашингтон“.

„Се приближуваме до последната фаза со Иран. Ќе биде интересен период. Ќе видиме што ќе се случи. Не можеме да им дозволиме да добијат нуклеарно оружје“, рече Трамп во Овалната соба.

„Ситуацијата со Иран може да се реши на два начина – воено или со договор. Повеќе би сакал да постигнеме договор затоа што немам намера да му наштетам на Иран. Иранците се одлични луѓе“, нагласи Трамп.

Тој потврди дека го испратил писмото до иранскиот врховен лидер, ајатолахот Али Хамнеи, познат по жестокото противење на Западот.

Трамп би можел да го искористи она што американските власти го гледаат како ослабен Иран. Милитантните групи на Блискиот исток поддржани од Иран, палестинскиот Хамас во Газа и Хезболах во Либан претрпеа големи загуби од израелските сили, а сирискиот претседател Башар ал Асад, близок сојузник на Техеран, беше соборен од бунтовниците.

Минатогодишните израелски напади врз иранските воени објекти, вклучително и ракетни фабрики и системи за противвоздушна одбрана, беа одговор на иранските ракетни и беспилотни напади врз Израел и, според американски извори и независни аналитичари, ги намалија конвенционалните воени капацитети на Техеран.

Канадскиот премиер, Џастин Трудо зборуваше за негирањето на Холокаустот и растечкиот бран на антисемитизам во Канада откако Хамас го нападна Израел на 7 октомври 2023 година.

„Она што ние, она што вие го доживувате, не е нормално. Антисемитите да пеат пофалби за Хамас и Хезболах додека веат знамиња по улиците на нашите градови не е нормално“, рече Трудо на Националниот форум за борба против антисемитизмот.

„Терминот ционист, кој се повеќе се фрла наоколу како омаловажувачки, и покрај фактот што тој едноставно значи верување во правото на еврејскиот народ, како и сите други луѓе, да си ја одредува сопствената иднина, не е нормален. Никој во Канада не треба да се плаши да се нарече ционист. Јас сум ционист“, рече тој со аплауз од публиката.

Зборот ционист означува поддржувач на ционизмот, политичко движење кое се појавило кон крајот на 19 век со цел да се создаде еврејска држава во областа на Палестина, односно територијата што Евреите ја сметаат за своја татковина на предците.

Критичарите на ционизмот често го поврзуваат со основањето на Израел во 1948 година, настан што значеше губење на земјата и почеток на егзил за Палестинците. Многу Палестинци и нивните поддржувачи го гледаат ционизмот како идеологијата што го овозможи и оправда одземањето на нивната татковина.