Владата и идниот газда на "ЕСМ дистрибуција" во четири очи ќе ги решаваат спорните прашања за приватизацијата на компанијата, а конечниот купопродажен договор нема да биде објавен.

ПРИВАТИЗАЦИЈАТА е СЃ ПОЗАМРСЕНА

Слободан Содиќ

Владата и идниот газда на "ЕСМ дистрибуција" во четири очи ќе ги решаваат спорните прашања за приватизацијата на компанијата, а конечниот купопродажен договор нема да биде објавен. Продажбата на ЕСМ, всушност, нема да заврши со изборот на најдобрата понуда на меѓународниот тендер, туку ќе продолжи со дополнителни непосредни преговори. Никој од членовите на тендерската комисија вчера не сакаше да коментира кои се спорните точки, за кои треба дополнително да се дискутира.

Прашањето беше отворено на четвртата трибина за продажбата на ЕСМ, која ја организира невладината организација "Транспарентност Македонија".

Според Симон Узунчев од Секторот за енергетика во Министерството за економија, кој е и член на тендерската комисија, ова не е ништо ново и не би требало да ја засега јавноста.

– Станува збор за технички прашања, кои ќе станат дел од купопродажниот договор за ЕСМ – изјави тој.

И Никола Черепналковски, претседател на тендерската комисија, смета дека е неблагодарно да се зборува за прашањата за кои Владата дополнително ќе се договара со новиот газда на ЕСМ. Двајцата потврдија дека купопродажниот договор за ЕСМ нема да биде објавен зашто така сакале странците.

Експертите предупредуваат дека Владата не смее сама да ги договара спорните прашања со купувачот на ЕСМ. Тие посочуваат дека на тој начин се направени штетните купопродажни договори за "Окта" и за "Македонски телекомуникации", поради кои граѓаните плаќаат високи цени, а државата казни. Според стручњаците, со ваквите најави од Владата се губи логиката на тендерската постапка.

Узунчев дополни дека Владата ќе инсистира продажбата да заврши со тендерот. Но тој не гледа причина Владата да не прифати преговори ако новиот сопственик на ЕСМ инсистира на нив.

Според експертите, во услови кога не се донесени куп законски и подзаконски акти, како што се, на пример, правилникот за мрежно поврзување и тарифниот модел, со кои целосно треба да се уредат правилата на игра на реформираниот енергетски пазар, нормално е странците да инсистираат на дополнителни гаранции, со кои ќе го намалат ризикот на вложувањето. Затоа стручњаците инсистираат договорот за купопродажбата на "Дистрибуција" да биде обелоденет.

Зоран Јачев, претседател на невладината организација "Транспарентност Македонија", досегашната постапка за продажба на ЕСМ ја оцени како недоволно отворена за јавноста, но го пофали Министерство за економија дека годинава се потрудило да го поправи впечатокот.

Советникот за енергетика во Министерството за економија Никола Черепналковски не сакаше да ги коментира зачестените лицитирања со цената на ЕСМ.

– Постои меѓународно утврден модел за пресметување на приближната цена на дистрибуцијата, а тоа е 250 евра за бројач. Но во практиката се покажа дека тој не функционира секогаш и затоа е најдобро да почекаме до 1 март, по што ќе ја знаеме и пазарната вредност на ЕСМ – изјави Черепналковски.