Владата нема утврдено долен лимит под кој не може да ја продаде "Дистрибуција", но верува дека ќе добие добра цена

Се подготвува нацрт-верзијата на купопродажниот договор за ЕСМ "Дистрибуција"

Владата нема утврдено долен лимит под кој не може да ја продаде "Дистрибуција", но верува дека ќе добие добра цена

МАЈА ТОМИЌ

Владата не сака да обелодени што ќе содржи купопродажниот договор што ќе го потпише со идниот сопственик на "Дистрибуција", како и со која постигната цена би била задоволна, но е подготвена да направи извесни отстапки во документот за кои не кажува од каква важност се. Оваа Влада покажува подготвеност да го потпише договорот за продажба, но сў уште не е подготвена да даде одговор на прашањето, кој во иднина ќе ги сноси последиците од евентуално штетните клаузули во договорот, бидејќи оваа година е изборна.

До крајот на неделава, посебна владина комисија заедно со консултантот Мајнел банк треба да ја изготви нацрт-верзијата на купопродажниот договор, со сите забелешки и коментари на четирите странски компании што учествуваа во тендерот за "Дистрибуција": "Чез", "Енел", РВЕ и ЕВН, а кои минатата недела завршија со длабинското снимање на компанијата. "Купопродажниот договор нема да биде јавен документ, бидејќи тој е од доверлива природа. Сў што ќе биде оценето дека јавноста треба да го знае, ќе биде кажано. Нема причина сите одделни елементи на овој сложен, правен документ да бидат обелоденети, туку само она што е најбитното", изјави Симон Узунов, помошник-раководител на Секторот за енергетика во Министерството за економија, на вчерашната трибина "Тендерски процедури за приватизација на ЕСМ Дистрибуција" во организација на "Транспарентност".

Според него, јавноста нема причина да се плаши дека купопродажниот договор ќе биде сличен со оној на "Телеком", бидејќи "Дистрибуција" е природен монопол и нејзината услуга е од јавен карактер, што значи дека  нема да подлегнува на пазарни услови, а сў ќе биде регулирано од Комисијата за енергетика, согласно со Законот за енергетика. Узунов појасни дека дел од документот ќе има фиксни, а дел променливи клаузули, но во рамките на утврдените критериуми. Кои се тие, Узунов не сакаше да обелодени, велејќи дека станува збор за флексибилни промени во договорот, кои нема да бидат незаконски и сў со цел да се избегне ситуацијата на отфрлање на поповолниот понудувач. Она што со сигурност се знае е дека во фиксните клаузули за инвеститорот е веќе склучениот договор меѓу Владата и ЕБОР, со кој ЕБОР станува сопственик на 19,9 отсто од капиталот на "Дистрибуција" . "Во овој момент не може да се дискутира за содржината на договорот кој има 50 страници, а Владата сў уште нема одлука кои делови од него се подложни на натамошни преговори со инвеститорот. Доставените забелешки од страна на инвеститорите се во насока на дополнителни гаранции за нивниот капитал и на намалувањето на евентуалниот  ризик на инвестиции", рече Узунов.

Владата нема утврдено долен или максимален лимит под кој не може да ја продаде "Дистрибуција". Во секој случај, верува дека ќе добие добра цена. Според државниот советник за енергетика, Никола Черепналковски, доставените понуди ќе ја кажат цената на "Дистрибуција". "Лично очекувам дека ќе добиеме висока цена, бидејќи компаниите што учествуваат на тендерот се сериозни и реномирани во европски рамки. Во Бугарија, на пример, се очекуваше многу пониска цена од продажбата на дистрибуциите , но се доби за 70 отсто повеќе од очекуваното", изјави Черепналковски.

Инаку, во соседна Бугарија се доби цена од 200 евра по броило. Ако се претпостави дека по истата логика ќе се продаде и нашата "Дистрибуција", според извори во оваа компанија, тогаш ќе може да се смета дека државата ќе инкасира околу 160 милиони евра, бидејќи во Македонија има околу 70.000 броила. Некои експерти оваа бројка ја толкуваат како ниска, а повеќето мислат дека е превисока.      

Според изјавата на министерот за финансии, Никола Поповски, дадена пред два дена, вредноста на "Дистрибуција" нема да биде пониска од 80 до 100 милиони евра, но би можело поради протестите, странците да ја намалат висината на понудата. Тој рече дека Владата сў уште не разговарала за тоа која е прифатливата цена "Дистрибуција", но и дека не може да каже, бидејќи  неа ќе ја одреди пазарот.