"Случајот Орка" и натаму е актуелен. Сў уште нема конечен епилог од долгогодишниот спор меѓу државата и ова бизнис-семејство, за даночното затајување за кое властите ја обвинуваат компанијата за износ од над два милиона евра

Се уште нема разрешница од даночниот спор тежок над два милиона евра меѓу државата и семејството Камчеви

НИНА НИНЕСКА-ФИДАНОСКА

"Случајот Орка" и натаму е актуелен. Сў уште нема конечен епилог од долгогодишниот спор меѓу државата и ова бизнис-семејство, за даночното затајување за кое властите ја обвинуваат компанијата за износ од над два милиона евра. Најновата вест е дека холдингот "Орка" е во стечај, а на државата Ј се нуди стока од стечајната маса, со цел да се исплати даночниот долг спрема Управата за јавни приходи. Но, во УЈП се категорични дека тие не прифаќаат стока, туку единствено ќе инсистираат на кеш од оваа компанија.

Откако минатата недела, одговарајќи на пратеничко прашање, министерот за финансии, Никола Поповски, од собраниската говорница изјави дека државата, и покрај сите чекори што ги презема, не може да си ги наплати парите од фирмата, вчера од "Орка" изјавија дека тие се раздолжиле спрема државата и дека таа нема повеќе што да бара од оваа компанија.

Илија Камчев, сопственик на фирмата, вчера за "Утрински весник" потврди дека старата компанија "Орка холдинг" отишла во стечај, по што веднаш е регистрирана нова фирма. Камчев е категоричен дека од стечајната маса се намирени сите доверители, вклучувајќи и УЈП. Имено, кога врз "Орка" е отворен стечај пред околу три месеци, за оваа сума УЈП има пријавено побарување, кое било прифатено во целост. Но, од стечајната маса сега на УЈП Ј се нуди стока во противвредност.

Даночните власти со тоа воопшто не се согласуваат, туку бараат готовина. "УЈП не прифаќа стока. Доколку "Орка" мисли дека таа е квалитетна, нека ја продаде и нека и ги уплати парите на државата”, велат во УЈП, додавајќи дека компанијата на средствата ќе треба да плати и камата.  

Првиот финансиер Поповски неодамна рече дека Министерството за финансии против "Орка" поведе судски спор, во кој од оваа фирма се бара да ги врати двата милиона евра кои ги добила преку сомнителен поврат на ДДВ. Но, Апелацискиот суд – Скопје донел одлука во полза на компанијата, по што донел решение во експресно брза постапка за враќање на средствата на фирмата. Министерот алудираше на тогашната претседателка на Апелацискиот суд, па темата беше една од пожешките на собраниската седница. Министерството ја обжалило одлуката на Апелацискиот суд, кој го поништил решението и ја задолжил "Орка" да ги врати парите. 

"Но, компанијата беше експресно доведена во стечај, под сомнителни околности, по што беше формирана нова фирма. Министерството сега се обидува да ги наплати парите од новоформираната фирма, но досега сў уште не успеало во тоа”, нагласи Поповски.

Врз холдингот "Орка" бил отворен стечај на 18 ноември минатата година. Потоа била регистрирана нова фирма "Хоор", која продолжува со истата дејност. Министерството за финансии сега од неа ги бара парите, за што во тек е судска постапка.

Стечајниот управник на "Орка" тврди дека од стечајната маса се намирени сите доверители. Истото важело и за долгот спрема УЈП, која била намирена со 75,23 отсто. Меѓутоа, исплатата не била извршена во пари, туку во стока што, според стечајниот управник, е законски. Остатокот од долгот спрема УЈП нема да се намири, бидејќи повеќе нема средства во стечајната маса.

Во врска со стечајот, Илија Камчев го возвраќа ударот на Поповски. "Не ја втурнав јас компанијата во стечај, туку тие. Фирмата беше блокирана и мораше да се преземе нешто. Морав да мислам на оние над 1.000 луѓе што работат во фирмата, не можев да дозволам да останат на улица, па затоа се регистрира нова фирма”, вели Камчев. Тој објаснува дека откако компанијата ги добила средствата по судски пат, што значи дека УЈП го загубила првиот спор, таа потоа повела нов спор на иста сума, по што ја блокирала сметката на "Орка". "Се жалевме до Врховниот суд, но до денес од таму нема одговор", нагласува Камчев. Сопственикот на "Орка" порачува УЈП да си ја земе стоката, која сега се наоѓа во магацините на компанијата.