Висок советник на новоизбраниот американски претседател Доналд Трамп вели дека новата администрација ќе се фокусира на постигнување мир во Украина, наместо да дозволи земјата да ја врати територијата окупирана од Русија.

Брајан Ланза, републикански стратег, изјави за Би-Би-Си дека администрацијата на Трамп ќе побара од украинскиот претседател Володимир Зеленски неговата верзија за „реална визија за мир“.

„И ако претседателот Зеленски дојде на маса и рече, добро, можеме да имаме мир само ако го имаме Крим, тогаш ни покажува дека е несериозен“, рече тој.

„Крим го нема веќе“, додаде тој.

Русија го анектира украинскиот полуостров Крим во 2014 година.

Осум години подоцна, таа започна инвазија на Украина и окупираше територии на истокот на земјата.

Реизбраниот американски претседател постојано вели дека негов приоритет е ставање крај на војната и запирање на, како што вели, трошење на ресурсите на американската воена помош за Украина.

Ланза, политички советник на поранешниот претседател откако Трамп ја започна кампањата во 2016 година, не ги спомна областите во источна Украина, но рече дека враќањето на Крим од Русија е нереално и „не е цел на САД“.

„Кога Зеленски ќе каже дека само ќе ги прекинеме овие борби и дека ќе има мир само кога ќе се врати Крим, имаме вести за претседателот Зеленски: Крим го нема“, изјави тој за Викенд програмата на Светскиот сервис на Би-Би-Си.

„И ако вашиот приоритет е да го вратите Крим и американските војници да се борат за да го вратат Крим, вие сте сами во тоа“.

САД никогаш не распоредиле американски војници да се борат во Украина, ниту Киев побарал од американските војници да се борат во нивно име.

Украина само побара воена помош од САД за вооружување на сопствените војници.

Ланза рече и дека има голема почит кон украинскиот народ, велејќи дека има лавовско срце.

Но, тој посочи дека приоритет на САД е „мирот и запирање на убиствата“.

„Она што ќе и кажеме на Украина е – знаете ли што гледате? Што гледате како реална визија за мир? Тоа не е визија за победа, туку е визија за мир. И да почнеме со искрен разговор“, рече тој.

Трамп разговарал со Зеленски по победата на изборите, а во разговорот учествувал и милијардерот Илон Маск.

Извор од украинскиот претседателски кабинет изјави за Би-Би-Си дека „добриот и долг разговор“ меѓу Зеленски и Трамп траел „околу половина час“.

„Тоа навистина не беше разговор да се зборува за многу важни работи, но генерално беше многу топол и пријатен“, вели изворот.

Демократските противници на Трамп го обвинија дека застанал на страната на рускиот претседател Владимир Путин и велат дека неговиот пристап кон војната претставува предавање на Украина и ќе ја загрози цела Европа.

Минатиот месец Зеленски претстави „план за победа“ на украинскиот парламент, кој вклучуваше одбивање да отстапи украински територии и суверенитет.

За време на предизборната кампања Трамп постојано повторуваше дека може да ја заврши војната меѓу Русија и Украина „за еден ден“, но никогаш не даде повеќе детали.

Во документот, напишан во мај од двајца негови поранешни шефови за национална безбедност, се наведува дека САД треба да продолжат да снабдуваат оружје, но поддршката да ја условат со влегувањето на Киев во мировни преговори со Русија.

Украина не треба да се откаже од надежта дека ќе ги врати сите свои територии од руската окупација, пишува весникот, туку треба да преговара врз основа на сегашните линии на фронтот.

Претходно оваа недела, Путин му честиташе на новоизбраниот претседател на САД за неговата изборна победа и рече дека тврдењето на Трамп дека може да помогне да се стави крај на војната во Украина „заслужува барем внимание“.

Ланза, исто така, ја критикуваше поддршката дадена на Украина од администрацијата на Бајден-Харис и европските земји од почетокот на целосната инвазија на Русија во февруари 2022 година.

„Реалноста на теренот е дека европските национални држави и претседателот Бајден не и дадоа на Украина способност и оружје да победи во оваа војна на самиот почеток и тие не успеаја да ги укинат ограничувањата за победата на Украина“, рече тој.

Претходно оваа година, Претставничкиот дом на САД одобри пакет воена помош од 61 милијарда долари (речиси 57 милијарди евра) за Украина за помош во борбата против руската инвазија.

САД беа најголемиот снабдувач на оружје на Украина – меѓу февруари 2022 година и крајот на јуни 2024 година, тие испорачале или предале оружје и опрема во вредност од 55,5 милијарди долари, според Институтот за светска економија, германска истражувачка организација.

Лекарите се уште се борат за животот на три лица, кои на 1 ноември беа тешко повредени на железничката станица во Нови Сад, кога се урна бетонската настрешница.

Состојбата на повредениот млад човек Ц.В.(18) и две девојки М.Т.(23) и понатаму е многу тешка.

– Сите пациенти се во многу тешка здравствена состојба. Секој ден, неколку пати во текот на денот, се среќава мултидисциплинарен консултативен тим од лекари за да донесе одлука за понатамошно лекување – велат за Дневник од УКЦ на Војводина.

За потсетување, во петокот при уривање на настрешницата на железничката станица во Нови Сад загинаа 14 лица, а тројца се тешко повредени. Погребани сите 14 жртви од тешката трагедија што ја погоди Србија.

Високиот претставник на Европската унија за надворешна политика и безбедност, Жозеп Борел, утрово пристигна во Киев, каде што ќе се обиде да ги увери украинските власти дека поддршката од Европската унија за Украина продолжува, јавуваат агенциите.

Борел е првиот европски функционер кој ја посетува украинската престолнина по победата на Доналд Трамп на претседателските избори во САД. Новиот американски претседател во кампањата најави можност за прекин на поддршката на Вашингтон за Украина во нејзината борба против руската инвазија.

„Од почетокот ја поддржуваме Украина и од мојата последна посета ја носам истата порака – ќе ве поддржиме колку што можеме“, изјави Борел, истакнувајќи дека Европската унија останува верна на својата поддршка за Украина.

Тој додаде дека никој не може точно да предвиди како ќе се однесува новата американска администрација, особено со оглед на тоа што претседателот Џозеф Бајден има уште два месеца на функција. Според проценките, Европската унија од почетокот на руската инвазија во Украина потрошила околу 125 милијарди долари на различни облици на поддршка, додека помошта од САД изнесува над 90 милијарди долари.