Само на еден од големите узвозници на празни дискови во магацин му стојат околу 600.000 дискови кои се обидел да ги увезе откако почнала акцијата против пиратеријата ви која секој увезен диск мора да се декларира

БУЧКО ЗАБРАНИ ПИРАТЕРИЈА ДО ИЗБОРИ

Само на еден од големите узвозници на празни дискови во магацин му стојат околу 600.000 дискови кои се обидел да ги увезе откако почнала акцијата против пиратеријата ви која секој увезен диск мора да се декларира

Во акцијата за спречување на пиратеријата, што почна пред еден месец, околу еден милион празни компакт дискови се задржани на граница, затоа што немале декларација. Пазарната инспекција вели дека ги исчистила пазарите од пиратски снимени ЦД со филмови и музика токму затоа што не дозволува во земјата да влезат дискови на кои не е испишана фирмата и адресата на увозникот и извозникот.

"Акцијата почна од 24 февруари, по заклучок на Владата. Претходно, Пазарната инспекција, МВР и Царината направија анализа на состојбата. Сега, секој празен диск што се увезува мора да има декларација. Кога инспекторот ќе затекне пиратски снимено ЦД, а на него е напишан увозникот, тој ќе каже кому му го продал и ќе се открие кој го лиферувал пиратскиот материјал. Оттука потекнува и отпорот да се испечати увозникот на секое ЦД. Претходно, тие што ќе ги фатевме со пиратски копии, добиваа прекршочни пријави, но не се сузбиваше проблемот", вели директорот на Пазарната инспекција, Никола Колевски.

Инспекторите секојдневно ги контролирале ударните пунктови каде досега се продавале пиратски снимени дискови – на пазарите и на влезовите во трговските центри, пред Камен мост. Велат дека во помалите градови веќе е сузбиена продажбата на улица, а дека во Скопје можат да се најдат инцидентно. "Но, кога граѓаните ќе пријават, веднаш излегуваат инспектори на терен", велат во Пазарна инспекција.

Имало бројни реакции од увозниците. Само на еден од големите узвозници на празни дискови во магацин му стојат околу 600.000 дискови кои се обидел да ги увезе откако почнала акцијата против пиратеријата. Тој ни изјави: "Иста акција покренаа и Хрватска и Црна Гора, ова не е наша измислица. Нашите власти донесоа "инструкција" и почнаа да бараат декларации. Сега се најавува воведување на допонителна давачка од 3 денари по ЦД на увоз. Точно е, мене ми стојат во магацин голем број дискови, на дел испечатив декларации а дел ќе ги дадам за извоз", вели соговорникот.

Увозниците на празни дискови објаснуваат оти токму пред да стартува акцијата во Македонија влегле голема количина празни ддискови, преку две фирми, и дека сега на пазарот се трошат нивните. Кога ќе се потрошат, увозниците најавуваат дека ќе се зголеми шверцот на празни ЦД, посебно од Косово, зашто цената таму е пониска, а со дополнителната давачка, кај нас ќе бидат поскапи легално увезените празни ЦД.

(А.С.)

***

1.000 евра дневен ќар

Македонската влада доби забелешки од ЕУ за високото ниво на пиратерија. Пред неколки месеци, претставници на Унијата спиеле во хотелот покрај Камен мост, а карши нив, покрај мостот, си купиле пиратски снимени материјали од дисковите распослани на неколку маси на склопување. После никој од Владата не можел да ги убеди дека се бориме за заштита на авторски права.

Познавачите на состојбата велат дека токму на масите покрај Камен мост, со продажба на пиратски ЦД и ДВД може да се заработи дневно и до илјада евра. "Математиката е проста. Дневно продава и до 400 ЦД, по 1,5 евро заработка, тоа се 600 евра ќар. Кога на тоа ќе се додаде заработката од продадените ДВД, ете ти 1.000 евра", вели нашиот извор. набавната цена на еден диск е 7 денари а пакувањето чини 6 денари.