Американскиот претседател во заминување Џо Бајден ги повика Американците да размислуваат во тишина и да се обединат за Божиќ, а новоизбраниот претседател Доналд Трамп понуди празнична честитка и голем број политички фокусирани објави на социјалните мрежи, при што двајцата политичари уште еднаш ги покажаа своите разлики.

Во видеото од божиќната обиколка на божиќните украси на Белата куќа, објавено на Јутјуб, Бајден ги повикува Американците „да ја остават настрана сета врева и се што не дели“.

„Ние сме овде на Земјата да се грижиме еден за друг, да се сакаме“, вели Бајден додека камерата поминува покрај украсените новогодишни елки и камини во Белата куќа.

„Премногу често се гледаме едни со други како непријатели, а не како соседи, а не како сограѓани Американци“, рече тој.

Бајден ги повика Американците да најдат момент на „тивко размислување“ за да се охрабрат себеси да се однесуваат со другите со достоинство и почит, да „живеат во светлината“ и да не заборават дека има повеќе што ги обединува Американците отколку што ги дели. „Навистина сме благословени што живееме во оваа земја“, заклучи тој.

Трамп во средата наутро објави порака „Среќен Божиќ“ на својата социјална мрежа со фотографија од него и неговата сопруга Меланија. Потоа сподели дваесетина написи или други објави на социјалните мрежи кои ги поддржуваат неговите политички ставови за теми како што е контроверзната номинација на Пит Хегсет за секретар за одбрана или желбата на Трамп да го заземе Гренланд или Панамскиот канал.

Директорот на Мосад, Дејвид Барнеа, им рекол на високите израелски претставници дека Израел треба да го нападне Иран за да ги запре нападите на јеменските Хути, кои се поддржани од Техеран, но израелскиот премиер Бенјамин Нетанјаху и министерот за одбрана Израел Кац не се согласиле со таа оценка, објавија денеска израелските медиуми.

Според весникот Хаарец, Барнеа ја претставил оваа опција за време на серија дискусии поради немањето резултати од претходните израелски напади врз Јемен, но Нетанјаху и Кац биле на мислење дека Израел треба да продолжи со нападите врз Хутите.

„Мораме да одиме директно против Иран. Ако само ги нападнеме Хутите, не е сигурно дека ќе можеме да ги запреме“, им рекол Барнеа на безбедносните службеници, според извештајот на израелскиот „Канал 13“.

„Канал 13“ објави дека Нетанјаху се спротивставил, посочувајќи дека Иран е друго прашање, кое ќе се реши во соодветно време, со што се согласиле и безбедносните претставници.

Во средата, на првата ноќ на Ханука, Нетанјаху во своето обраќање вети дека Хутите, „како и другите непријатели на Израел“, ќе ги сносат последиците од нападите врз таа земја.

Во изминатите 10 дена, Хутите лансираа пет балистички ракети и најмалку пет беспилотни летала кон Израел во, како што тврдат, кампања за поддршка на палестинскиот народ за време на израелската војна во Појасот Газа.

Една од ракетите паднала во областа Тел Авив-Јафа, а здравствените власти соопштија дека во тој напад полесно се ранети 16 лица.

Кина ја одобри изградбата на најголемата хидроелектрична брана во светот, со што започнува амбициозен проект на источниот раб на Тибетската висорамнина што може да влијае на милиони луѓе низводно во Индија и Бангладеш.

Браната, која ќе се наоѓа во долниот тек на реката Јарлунг Зангбо, би можела да генерира 300 милијарди киловатчасови електрична енергија годишно, според проценката на „Power Construction Corp of China“ во 2020 година.

Ова би било три пати повеќе од проектираниот капацитет на браната Три клисури од 88,2 милијарди киловатчасови , моментално најголемата во светот, во централна Кина.

Проектот ќе игра голема улога во исполнувањето на целите на Кина за постигнување максимална јаглеродна неутралност, стимулирање на поврзаните индустрии како што е инженерството и создавање нови работни места во Тибет, објави во средата официјалната новинска агенција „Ксинхуа“.

Делот од реката Јарлунг Зангбо се спушта на драматични 2.000 метри на краток распон од 50 километри, нудејќи огромен хидроенергетски потенцијал, како и уникатни инженерски предизвици.