Свет
Светска банка бара отчет како се трошеле парите во здравството
Претставници на Светската банка деновиве бараат од Владата да предложи акциски план со временски рокови и мерки за да се намалат трошоците и воедно да се зголеми ефикасноста од работата на државното здравство и на Фондот за здравство.
Претставници на Светската банка деновиве бараат од Владата да предложи акциски план со временски рокови и мерки за да се намалат трошоците и воедно да се зголеми ефикасноста од работата на државното здравство и на Фондот за здравство. Ова се услови што Светска банка и ги постави на Владата за да добива кредити со кои ќе ги намали социјалните тензии од реформите што треба да ги спроведе за да ја зголеми ефикасноста во здравствениот систем.
Дел реформски проекти, со кои ќе се намалат трошоците и ќе се зголеми ефикасноста, се приватизацијата на амбулантите, издавањето под закуп на државните стоматолошки ординации, како и приватизацијата на државните аптеки, која е во тек. Освен тоа, една од најважните новини е што државата ќе мора да им овозможи на повеќе приватни болници и ординации да користат државни пари од Фондот, за услугите што ги даваат на граѓаните.
Освен ова претставниците на Светската банка деновиве бараат отчет од Владата и за спроведувањето на реформата на јавната администрација, со која преку отпуштања од работа на буџетари, треба да се зголеми ефикасноста и да се намалат трошоците. За оваа намена Македонија користи повеќе од 20 милиони долари кредит од Светската банка. Начелно, кредитниот аранжман предвидуваше од 2003 година до 2008 година Владата да го намали бројот на државни чиновници за околу 15.000 лица. Што значи дека секоја година требаше да отпушта и да пензионира по околу 3.000 лица. Преговорите меѓу Владо Димов, министерот за здравство, Никола Поповски, министерот за финансии и претставниците на Светската банка завршуваат утре, кога најверојатно ќе бидат соопштени реформските чекори.
Кон крајот на месецов претставници на банката уште еднаш ќе дојдат на преговори кога треба да се дефинираат мерките и роковите за спроведување на реформата на судскиот систем. Меѓу реформите кои ќе се направат под покровителство на банката се создавање единствен електронски судски регистар, потоа создавање единствен трговски регистар со поврзување на трговскиот и судскиот регистар за фирми.
Целосната компјутеризација на судскиот систем и негово поврзување со регистрите и со Централниот депозитар, заедно со измени и дополнувања на законите од таа сфера, треба да ги исчисти сите досегашни фактори кои ги забавуваа судските стопански и кривични постапки.
На крајот на април, владини претставници, ќе преговараат на два фронта. Тогаш се очекува да дојдат и претставниците на Меѓународниот монетарен фонд (ММФ) , со кои ќе се разговара за нов реформски аранжман со кој Владата ќе добие кредит ако успее да го обнови договорот со Светската банка.
Н. С.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Лидерот на Хезболах: Непријателот ги премина сите црвени линии, сакаа да убијат 4.000 луѓе одеднаш
За време на телевизиско обраќање, лидерот на Хезболах, Хасан Насралах, детонирањето на пејџери и воки-токи низ Либан го нарече „терористички чин“ и изјави дека „непријателот на Израел ги преминал сите црвени линии“ со намера да убие 4.000 луѓе во еден момент.
Тој призна дека на Хезболах му бил зададен тежок удар, но подвлече дека тоа „нема да го скрши“ отпорот и дека операциите во јужен Либан нема да престанат додека не заврши војната во Газа.
Насралах на почетокот рече дека настаните во изминатите два дена го навеле да го одржи говорот. Тој објасни дека планирал да ја претстави својата анализа и извештај за борбите во изминатата година на 7 октомври, но дека она што се случило во изминатите 48 часа „ја барало оваа порака“.
Тој им изрази сочувство на паднатите на фронтот во јужен Либан и на загинатите како последица на експлозиите, а на повредените им посака брзо закрепнување. Тој им се заблагодари на лекарите, официјалните лица и на сите кои помогнаа во лекувањето на жртвите од нападот и на луѓето кои даруваа крв за повредените и ја поздрави солидарноста и единството на народот во земјата.
Тој подвлече дека експлозиите се случиле во болниците бидејќи пејџерите ги користеле и медицинските работници, како и во аптеките, маркетите, продавниците, куќите, автомобилите и на улиците каде што имало многу цивили.
Насралах изјави дека Израел имал за цел да убие „4.000 луѓе одеднаш“.
„Тоа беше намерата на непријателот и ова е обемот на нивниот криминал. Како да го наречеме овој вид криминална активност? Дали е тоа голема операција? Дали е тоа геноцид? Дали е тоа масакр?“, рече тој.
Тој призна дека на Хезболах му бил зададен „многу тежок“ удар, опишувајќи ги нападите како „невидени“ во Либан. Тој рече дека се формирани истражни комисии кои ќе проучат како се случиле експлозиите и дека ќе ги чекаат резултатите од истрагата.
„Претрпевме многу тежок удар. Но, ова е воена состојба“, рече тој.
Тој рече дека неговата група е свесна дека Израел има технолошка предност бидејќи е поддржан од САД и други технолошки суперсили, но храбро ќе се соочи со овој предизвикувачки момент со крената глава.
„Не може да бидеме скршени од овој удар, колку и да е силен. И можам верно и самоуверено да ве уверам дека овој тежок и невиден удар не нè клекна – и нема“, подвлече тој.
„Јасно велам: без разлика какви се последиците, без разлика на жртвите, без разлика на сценаријата, отпорот во Либан нема да престане да го поддржува отпорот во Газа и Западниот Брег и сите повредени на окупираните територии“, рече Насралах.
Тој изјави дека нападите низ Либан биле насочени кон инфраструктурата на Хезболах и дека тоа е обид да се предизвикаат поделби во неа.
„Нека знае непријателот дека тоа што се случи не ја разниша нашата вера, верба, решителност, подготвеност или инфраструктура. Напротив, нè направи порешителни, поробусни и истрајни. Ако целта на Израелците беше да не разделат од она што се случува во Газа, тоа не успеа“, подвлече тој.
Свет
По расправија извадил нож и солзавец, има повредени: тепачка во трговски центар во Германија
Неколку лица се повредени во тепачка што се случила денеска во трговски центар во Ерфурт, Германија, кога еден маж по расправија извадил нож и го расекол мажот.
Полицијата брзо пристигнала на местото на настанот и го евакуирала трговскиот центар, а според полицијата дошло до вербална, а потоа и физичка пресметка меѓу група лица, кои не се по потекло од Германија, пренесуваат германските медиуми.
Се се случило околу 15 часот и 30 минути, а еден од учесниците во тепачката извадил нож. Како што објави „Билд“, мажот (27) бил пренесен во болница поради сериозни повреди на раката, но неговиот живот не е во животна опасност.
Во трговскиот центар бил употребен и солзавец, па лекарска помош побарале и посетителите на центарот. Се пожалиле дека им горат очите и дека имаат проблеми со дишењето.
Полицијата соопшти дека е приведен маж (26), кој е осомничен дека извадил нож и ранил најмалку едно лице.
„Ве уверуваме дека не се работи за напад, немало опасност за граѓаните“, соопштија од полицијата.
Според написите,не се знае зошто дошло до тепачката, ниту точно колку лица се повредени во инцидентот.
Свет
Велика Британија ги повика граѓаните веднаш да го напуштат Либан
Британскиот министер за надворешни работи Дејвид Лами изрази длабока загриженост за зголемените тензии во Либан, повикувајќи ги британските граѓани да ја напуштат земјата.
Во телефонски разговор со либанскиот премиер Наџиб Микати, Лами ја изрази својата длабока загриженост поради растечките тензии и цивилните жртви во Либан.
Британскиот министер за надворешни работи рече дека разговарале за потребата од преговори за изнаоѓање решение за враќање на стабилноста и безбедноста преку Сината линија.
Лами исто така ги повика британските граѓани да го напуштат Либан, наведувајќи ги како причина зголемените тензии во регионот.
„Тензиите се високи и ситуацијата може брзо да се влоши“, напиша Лами на платформата X.
Во вторникот и средата во различни делови на Либан се случија експлозии на пејџери и радио уреди (воки-токи).
Во експлозиите загинаа најмалку 37 лица, а неколку илјади беа повредени.
Либанската влада и Хезболах го обвинија Израел дека го извршил нападот, а Хезболах вети одмазда.