Јездимир Васиљевиќ, обвинет за големи финансиски малверзации со неговата банка „Југоскандик“, бил уапсен во Холандија со фалсификуван српски пасош

Белградски Блиц пишува дека пасошот кој го користел Јездимир Васиљевиќ, бил на извесен Јањиќ, а Газда Језда бил идентификуван со споредување на отисоците од прстите во базата на Интерпол, кој по него има распишано потерница од април 2006 г. Според сознанијата на Блиц, Васиљевиќ бил откриен кога под лажно име поднесувал документи за азил во Холандија. На Васиљевиќ во Амстердам му е одреден екстрадициски притвор и е покрената постапка за негово предавање на српските власти. Се’ уште не е познато каде Језда се криел од 2006 г. Српските медиуми шпекулираа дека со неговата жена Сара која има потекло од Јужна Америка, побегнал во Еквадор, а дури и дека се крие во околината на Чачак. Адвокатот на Васиљевиќ, Драгољуб Ѓоргевиќ, за Блиц изјавил дека и тој е во Холандија, но не заради овој клент, туку заради друг случај кој се води пред Хашкиот трибунал за воени злосторства. Тој изјавил дека имал договор со својот клиент да не контактираат, и дека од 2006 г. ниту се слушнале ниту се виделе. Адвокатот смета дека екстрадициската постапка на Васиљевиќ може да потрае подолг период. Приведувањето пред суд на Газда Језда е главниот фактор да продолжи судењето за милионските малверзации во „Југоскандик“ банката, кое почна веднаш по неговото бегство од Србија, од што српските медиуми ја извлекуваат претпоставката дека тој бил известен. Васиљевиќ со неговите соработници Љубивое Шундиќ, Драган Антонијевиќ и адвокатот Стеван Протиќ, се обвинети за проневерување 58 милиони тогашни германски марки и дека оштетиле граѓани во вредност од 190 милиони германски марки. Во истата афера е обвинет и директорот на Банката на приватното стопанство на Црна Гора, Милорад Вукотиќ.Поради непојавување пред судот, на Васиљевиќ му е одземена куќата што ја положил како кауција уште во октомври 2001 г., која има 524 квадрати и се наоѓа во елитната белградска населба Дедиње, за која адвокатот Ѓорѓевиќ тврдел дека е сопственост на пријателот на неговиот клиент Никола Куталија. Вилата денес е проценета на најмалку милион евра, а во неа во деведесетите се собирале белградските т.н. жестоки момци кои работеле за Службата за државна безбедност на Србија.Инаку, Газда Језда првпат избега од Србија во 1993 г., а во 2001 г. Беше уапсен по враќањето од Кипар. Васиљевиќ тогаш изјавил пред судот дека не е виновен за пропаѓањето на пирамидалната банка „Југоскандик“, обвинувајќи го за тоа Слободан Милошевиќ. Језда тогаш за српските медиуми тврдеше дека доброволно не заминал од Србија, туку дека Радован Стоичиќ Баџа, тогашен шеф на Шестата управа во српската СДБ, подоцна ликвидиран, и Златко Радниќ, координатор на „Црвените беретки“, кои му дозволиле да земе само две торби, го однесле до границата со Унгарија. Васиљевиќ изјави и дека сега црногорските, а тогаш југословенски политичари Момир Булатовиќ, Мило Ѓукановиќ и српските безбедносни шефови меѓу кои Момчило Перишиќ и Јовица Станишиќ за кој сега се покажа дека бил соработник на американската CIA, барале од него 85 милиони марки за набавка на противавионски ракети. Васиљевиќ тврди дека од неговата банка српските служби извадиле меѓу 20 и 30 милиони германски марки за тајните полициски и воени служби, но и за некои политичари кои сега се дел од актуелната српска власт.