Се’ уште важaт последните информации за исчезнувањето на авионот на Air France „Ербас А330-200“ со 228 патници и членови на екипажот. Авионот западнал во бура и најверојатно бил погоден од гром над Атлантикот. Компанијата го објави списокот на патници, меѓу кои нема македонски државјани

Летот AF-447 кој требало да трае 11 часа, според бразилските воздухопловни власти започнал добро синоќа по средноевропско време, од Рио де Жанеиро кон парискиот аеродром „Роаси Шарл де Гол“. Но, по речиси четири часа лет, капетанот на авионот јавил дека леталото влетало во големи турбуленции, по што биле прекинати сите радиоконтакти со контролата на летањето и исчезнал од радарите. Во седиштето на компанијата, извршниот директор на Air Frence, Пјер-Анри Горжон, изјави дека авионот испратил автоматската порака за краток електричен спој, петнаесетина минути откако влегол во бурата и дека најверојатно бил погоден од молња. Нема надеж за преживеани Но дописникот на лондонски Times, кој е и пилот, изјавил сомневање дека авионот би можел да биде погоден од гром. Според новинарот и пилот Чарлс Бремнер, доколку станува збор за удар од гром тоа ќе ја доведе во прашање подобноста на дизајнот на самиот авион „Ербас А 330-200“, кој инаку е високо оценет од стручњаците. Според американските статистики, секој авион е најмалку еднаш погоден од гром во текот на годината. Во кризниот центар на аеродромот кој беше формиран уште утрината при првите информации за исчезнување на авионот, се појавил и францускиот претседател Николас Саркози. Тој за медиумите изјавил дека е мала шансата да има преживеани. Францускиот министер за екологија и транспорт Жан Луи Барло ја исклучил можноста дека авионот е киднапиран и дека нема сомневање дека се урнал во океанот. Најавено е дека ќе биде побарана помош од американскиот сателитски систем. Компанијата доцна попладнето при опсежни проверки на листата на патници соопшти дека во авионот имало 216 патници, од кои 126 мажи, 82 жени, седум деца и едно бебе, како и 12 членови на екипажот. Според националноста, пак, станува збор за 61 Французин, 58 Бразилци, 26 Германци, 9 Кинези, 6 Швајцарци, 5 Британци, 4 Унгарци, по тројца Ирци, Норвежани и Словаци, по двајца Американци, Шпанци, Мароканци и Полјаци и по еден Јужноафриканец, Аргентинец, Австриец, Белгиец, Канаѓанец, Данец, Естонец, Гамбиец, Исланѓанец, Холанѓанец, Филипинец, Романец, Русин, Швеѓанец, Турчин и Хрват. Технички карактеристики и најголеми несреќи Во моментов во употреба се 340 авиони од овој тип и досега нема загинати во трите инциденти на „Ербас А 330-200“ од 2005 г., а ова би било прво уривање со жртви на овој модел. Светските авиокомпании досега нарачале повеќе од илјада вакви авиони. Станува збор за двомоторен авион кој може да носи 256 патници и 12-член екипаж, а летачкиот век му изнесува 11 милиони часови. Конкретниот воздухоплов во употреба бил од 2005 г., а последниот ремонт бил извршен на 16 април о.г. и имал околу 2.500 летови со околу 18.800 часа лет. Авионот може да има долет од 10.500 километри, на височина од 10.700 метри со брзина од 880 километри на час. Air France ја доживеа најголемата несреќа на 6 март 1962 г. кога „Боинг 707“ се урнал при полетување кога загинале 130 лица, а во септември 1968 г. загинаа 95 луѓе. Последната катастрофа на француската компанија е забележана во 2000-та кога при полетување од Париз, се урна „Конкорд“, при што загинаа 109 патници и членови на екипажот и уште четири лица на земја. Во Бразил, пак, во 2006 и 2007 г. се случија две големи авионски катастрофи, што ја вброи најголемата латиноамериканска држава меѓу најнебезбедните за авиосообраќајот. Во септември 2006 г. во амазонските џунгли се урна авион во кој загинаа 154 лица, а во јули 2007 г. во Сао Паоло „Ербас 320“ ја промаши пистата при што загинаа 187 лица од авионот и 12 на земја.

Авионот на Air France најверојатно погоден од молња

Авион со 216 патници исчезнал над Атлантик