По индиските напади врз она што властите го опишаа како „терористичка инфраструктура“ во Пакистан и пакистанскиот дел на Кашмир, индискиот министер за надворешни работи Субрахманјам Џајшанкар изјави на платформата Икс дека „светот мора да покаже нулта толеранција кон тероризмот“.

The world must show zero tolerance for terrorism. #OperationSindoor pic.twitter.com/dmcCLfbMjN

— Dr. S. Jaishankar (@DrSJaishankar) May 7, 2025

Да потсетиме, Индија изврши воздушни напади врз цели во Пакистан и пакистански Кашмир, а Исламабад одговори со тврдење дека соборил пет индиски борбени авиони, во најсериозниот вооружен конфликт меѓу двете нуклеарно вооружени држави во последните дваесет години.

Индиската страна објави дека биле погодени девет цели поврзани со „терористичка инфраструктура“.

Пакистан, од друга страна, тврди дека биле нападнати шест локации, дека осум лица се убиени, а 35 се ранети, додека двајца се водат како исчезнати.

Индиски извор од одбраната за Ројтерс изјави дека целите биле штабовите на екстремистичките групи Џаиш-е-Мохамед и Лашкар-е-Таиба.

Индија ја бранеше својата воена операција во Пакистан, велејќи дека нападите биле „фокусирани и прецизни“ и дека не биле погодени цивилни, економски или воени цели во Пакистан.

„Акциите беа одмерени, одговорни и дизајнирани да не доведат до ескалација“, соопшти индиската амбасада, додавајќи: „Беа цел само познати терористички кампови“.

Од друга страна, пакистански извори тврдат дека во нападите загинале најмалку осум цивили, вклучувајќи жени и деца, и дека три индиски борбени авиони и еден дрон биле соборени на локации на индиска територија. Си-ен-ен не можеше независно да ги потврди овие тврдења.

Во соопштението на индиската амбасада се вели дека „јасно е дека терористите со седиште во Пакистан се одговорни за нападот од минатиот месец во Кашмир“, во кој загинаа 26 лица, претежно туристи. Наместо да дејствува против одговорните, Пакистан, тврди Индија, ја негираше одговорноста и го обвини Њу Делхи за организирање на нападите.

Пакистански безбедносни извори тврдат дека собориле пет борбени авиони на индиските воздухопловни сили и едно беспилотно летало за време на индискиот напад, објавија дописниците на Си-ен-ен Софија Саифи и Ник Робертсон во Исламабад.

Според соопштението доставено до новинарите, три француски авиони „Рафал“, еден МиГ-29 и еден СУ-30, како и индиско извидувачко беспилотно летало „Херон“, биле соборени во одбранбената акција.

Истата информација ја потврди и друг висок функционер на пакистанската влада.

Во извештајот не се наведува точната локација или начинот на кој авионите биле соборени. Претходно вечерта, пакистанските власти тврдеа дека собориле три авиони и едно беспилотно летало.

Си-ен-ен не беше во можност независно да ги потврди овие тврдења и ја контактираше индиската влада за коментар.

Постојат и други непотврдени извештаи за поголема штета нанесена од пакистанските сили, и копнени и воздушни, врз индиските сили.