Во осмиот по ред напад за две седмици на американско беспилотно летало убиени се најмалку десет милитантни, соопштија пакистанските власти

Нападот се случил во пакистанската племенска област Северен Вазиристан крај границата со Авганистан, при што цел бил објект на исламско верско училиште за кои разузнавачите имале информации дека им служи како засолниште на исламистичките бунтовници. За дел од ликвидираните постојат сомневања дека биле вмешани во нападот на американската база во Авганистан од крајот на декември, кога беа убиени седум агенти на CIA.Идентитетот на загинатите во последниот напад на американско беспилотно летало, се’ уште не е соопштен.Американските медиуми забележуваат дека нападот доаѓа откако американскиот специјален претставник за Пакистан и Авганистан, Ричард Холбрук, посети региони на пакистанска територија.Вашингтон најчесто ги премолчува овие ракетирања, иако официјални претставнци во минатото јавно изјавија дека тоа го сметаат за успешна тактика напоменувајќи дека во нападите досега се ликвидирани неколку врвни оперативци на Ал Каеда, како и лидерот на пакистанските талибани, Бејтула Мехсуд. Исламабад, формално се противи на тајните операции во кои се вклучени американските беспилотни летала, протестирајќи дека со тоа се крши  неговиот суверенитет и дека тоа ќе го поттикне антиамериканско расположение во државата што ќе претставува голем притисок врз владата. Сепак, повеќето аналитичари сметаат дека пакистанските власти премолчено даваат одобрение за ваквите американски акции, бидејќи САД притиска заради страхувањата воениот нуклеарен потенцијал на државата да не падне во рацете на исламистичките бунтовници.Во средата, на заедничката прес-конференција со Холбрук, пакистанскиот министер за надворешни работи Шах Махмуд Куреш не ги отфрли сосема прашањата за одобрение на неговата влада за ракетни напади, но нагласи дека постојат „црвени линии“ кои Вашингтон не смее да мине.