Македонија има лидерска позиција во борбата против нелегалната трговија со деца, е оценето во извештајот “Трговија со луѓе во Југоисточна Европа 2004: Фокус на превенција”

ИЗВЕШТАЈ НА УНИЦЕФ

Македонија има лидерска позиција во борбата против нелегалната трговија со деца, е оценето во извештајот “Трговија со луѓе во Југоисточна Европа 2004: Фокус на превенција”, објавен од УНИЦЕФ, Канцеларијата на високиот комесар за човекови права и Канцеларијата на ОБСЕ за демократски институции и човекови права, кој беше објавен вчера во Скопје.

Извештајот ја разгледува состојбата со трговијата со луѓе во Албанија, Босна и Херцеговина, Бугарија, Хрватска, Македонија, Молдавија, Романија, Србија и Црна Гора и покраината Косово, како и напорите на владите и меѓународните и домашните невладини организации да ја спречат трговијата со луѓе, да ја подигнат свеста и да им помогнат на жртвите.

– Македонија оди напред со заштитата од нелегалната трговија со луѓе и презеде повеќе акции на тоа поле – рече Џералдин Бјалстрстед од Канцеларијата на ОБСЕ за човекови права.

Според Хонвеј Гао, претставник на УНИЦЕФ, македонската Влада е посветена на заштитата на децата, законодавството е во согласност со меѓународните стандарди, но треба да се подобрат заштитата и превентивата.

Таа истакна дека во извештајот се разгледуваат две контрадикторни сценарија. Гао вели дека во првото, нелегалната трговија во регионот се намалува, бидејќи е намален бројот на жртвите на кои им е дадена помош. Второто покажува дека воопшто не се намалува, туку станува помалку видлива појава, затоа што жртвите не бараат помош поради страв од репатријација, депортирање и јавна осуда.

(Н.Ц.)