Војската на Русија составила детални списоци на цели за потенцијален конфликт со Јапонија и Јужна Кореја, вклучувајќи нуклеарни централи и друга цивилна инфраструктура, според тајните документи од 2013 и 2014 година што ги видел „Фајненшл тајмс“. Плановите за напад, сумирани во шверцувани руски воени документи, опфаќаат 160 локации, вклучувајќи патишта, мостови и фабрики. Овие цели беа избрани за да се спречи „прегрупирање на војниците во оперативно важни области“.

Документите, споделени од западни извори со Фајненшл тајмс, укажуваат на сериозната загриженост на Москва за безбедноста на нејзиното источно крило. Руските воени планери стравуваат дека источните граници на земјата би можеле да бидат загрозени во случај на војна со НАТО и ранливи на напади од американските сили и регионалните сојузници.

Материјалите потекнуваат од архива од 29 тајни руски воени досиеја кои првенствено биле наменети за обука на офицери за потенцијални конфликти на источните граници на земјата помеѓу 2008 и 2014 година, но сè уште се сметаат за важни за руската стратегија.

Азија стана клучен дел од стратегијата на рускиот претседател Владимир Путин за инвазијата на Украина и за поширокиот конфликт со НАТО. Покрај тоа што повеќе се потпира на кинеската економска поддршка, Москва ангажираше 12.000 војници од Северна Кореја да се борат во Украина, а за возврат го зајакнува Пјонгјанг економски и воено. По лансирањето на експериментална балистичка ракета во Украина во ноември, Путин изјави дека „регионалниот конфликт во Украина доби глобални размери“.

Вилијам Алберке, поранешен експерт за контрола на оружјето на НАТО сега во Центарот Стимсон, рече дека документите и неодамнешната распределба на севернокорејските трупи докажуваат „еднаш засекогаш дека европското и азиското боиште се нераскинливо поврзани“.

Списокот на цели за Јапонија и Јужна Кореја беше пронајден во презентација за можностите на ненуклеарната крстосувачка ракета Kh-101. Експертите кои го разгледаа документот за Фајненшл Тајмс сметаат дека содржината укажува на неговото создавање во текот на 2013 или 2014 година. Презентацијата го носи знакот на Академијата за комбинирани вооружени сили, школа за обука на високи офицери.

САД одржуваат значителни воени сили во Јужна Кореја и Јапонија. Од почетокот на руската инвазија на Украина во февруари 2022 година, двете земји се приклучија на коалицијата предводена од Вашингтон, чија цел е да го зголеми притисокот врз руската воена машина. Алберке рече дека документите ги покажуваат како Русија ги перцепира заканите од азиските сојузници на Западот, за кои Кремљ стравува дека би можеле или да го ограничат или да овозможат американски напад врз нејзините воени сили во регионот, вклучувајќи ги и ракетните бригади.

Првите 82 цели на списокот во Јапонија и Јужна Кореја се однесуваат на воени објекти, како што се командни пунктови, радарски инсталации, воздушни бази и поморски инсталации. Останатите цели вклучуваат цивилна инфраструктура, како што се тунели, електрани и индустриски комплекси, како што се челичарниците во Поханг и хемиските фабрики во Бусан.

Прецизните мерења и детали на целите сугерираат внимателно планирање, но перформансите на ракетата Kh-101 за време на инвазијата на Украина покажаа значителни недостатоци.

Друга презентација ја открива руската практика на редовно тестирање на противвоздушната одбрана на соседните земји. Извештајот дава детали за мисијата на пар бомбардери Ту-95 во февруари 2014 година, што се совпадна со анексијата на Крим. Мисијата вклучуваше 17-часовен лет околу Јужна Кореја и Јапонија за да го сними одговорот на нивната противвоздушна одбрана.

Според документот, бомбардерите полетале од базата на авијациската команда со долг дострел во Украинка, на рускиот Далечен Исток. Мисијата забележа 18 пресретнувања во кои учествуваа 39 авиони. Најдолгата придружба била 70 минути, од два јапонски Ф4 фантоми, кои според руските пилоти „биле невооружени“. Само седум пресретнувања биле извршени од борбени авиони со ракети воздух-воздух.

Маршрутата речиси точно се совпаѓа со онаа што претходно оваа година ја поминаа два поморски патролни авиони Ту-142 за време на стратешките вежби во Пацификот, вклучително и прелет над спорната територија во близина на Курилските острови.

Израелскиот премиер Бенјамин Нетанјаху излезе од болница за да ги повика своите коалициски партнери да го поддржат буџетот за 2025 година.

Нетанјаху, кој се опоравува од операцијата на простата, дојде во Кнесетот и покрај противењето на неговите лекари за да обезбеди усвојување на предлог-законот за буџет со кој се бара зголемување на државните приходи, откако десничарскиот министер за безбедност Итамар Бен Гвир и ултраортодоксните партии рекоа дека можат да гласаат против или да бидат воздржани.

„Денес е важен ден и голема победа за коалицијата“, рече Нетанјаху во изјавата, тврдејќи дека нацрт-законот усвоен од најтенкото мнозинство е клучен за економијата и безбедноста на Израел.

Премиерот ја напушти болничката соба против наредбите на лекарите и го даде, како што се покажа, одлучувачкиот глас во Кнесетот за законот, кој беше усвоен со 59 гласа „за“ и 58 „против“. „Очекувам сите членови на коалицијата, вклучително и министерот Бен-Гвир, да престанат да ја разнишуваат коалицијата и да се закануваат на постоењето на десничарската влада“, рече Нетанјаху во вторникот.

Во последните денови, глобалната воздухопловна заедница, како и одговорните за безбедноста, беа изненадени од видеата од кинеската провинција Ченгду. На нив е прикажан голем и досега непознат воен авион со триаголен облик кој лета речиси без звук, пренесува Ал Џезира.

Иако снимките прво се појавија на кинеските социјални мрежи, а малку подоцна и на западните, јасно е дека всушност Пекинг официјално дозволи снимките да се шират како јавна порака до Западот, пред се до Вашингтон.

Самиот авион најверојатно е продолжение на развојот на кинеските таканаречени стелт ловци – бомбардери со намалена радарска видливост, како што е веќе познатиот Shenyang J-35A. Експертите наведуваат дека новиот авион би можел дури и да има способност да лета во стратосферата на Земјата, на височини од повеќе од педесет илјади метри.

Она што може да се види од неколку кратки видеа е дека новиот авион нема вертикална опашка за стабилизација на летот и има интегрирано лежиште за оружје во внатрешноста на трупот.