Данска разбира дека САД имаат безбедносни интереси на Арктикот и е подготвена да разговара за тоа со администрацијата на новоизбраниот претседател Доналд Трамп, изјави денеска данскиот министер за надворешни работи, Ларс Локе Расмусен.

Тој на прес-конференција во Ерусалим изјави дека Данска е подготвена да ги продолжи разговорите со Трамп во тесна соработка со Гренланд за да ги обезбеди легитимните американски интереси, пренесе „Ројтерс“.

Трамп во јануари рече дека САД ќе ја преземат контролата врз Гренланд, кој е автономна данска територија.

Британскиот министер за надворешни работи Дејвид Лами рече дека е уверен оти новоизбраниот американски претседател Доналд Трамп ќе признае оти Гренланд е дел од Кралството Данска, иако тој призна дека реториката на Трамп понекогаш може да биде дестабилизирачка.

Зборувајќи за радио Би-би-си, Лами рече дека од првиот мандат на Трамп било јасно дека интензитетот на неговата реторика и непредвидливоста на неговите изјави понекогаш може да предизвикаат нестабилност.

Рачно напишаните белешки пронајдени покрај телата на загинатите севернокорејски војници убиени на бојното поле во областа Курск во Русија откриваат ужасна тактика во која војниците на Пјонгјанг се користат како мамка за соборување на украинските беспилотни летала.

Украинските сили за специјални операции пронашле белешки во кои војниците опишале смртоносни тактики и ја изразиле својата љубов кон својот лидер Ким Џонг-ун и копнежот да се вратат во својата татковина, пишува британски „Телеграф“.

На еден од цртежите од пронајдената тетратка се гледа како војник излегува за да го привлече вниманието на дрон, а неговите двајца другари чекаат да го соборат.

„Кога мамката стои, дронот ќе застане и ќе биде соборен“, напишал војникот во своите белешки.

Детаљно е опишано како човечката мамка треба да стои на седум метри од украинскиот дрон, кој потоа ќе биде неутрализиран со прецизен удар.

Воените набљудувачи и украинските команданти велат дека севернокорејските војници не се обучени за модерно војување и дека Русите ги користат како топовско месо испраќајќи ги пеш преку отворени полиња, без артилериска поддршка, за да ја тестираат украинската одбрана, додека се придружувани од мали групи руски специјални сили.

Речиси 4.000 Севернокорејци веќе се убиени или повредени, изјави во четвртокот украинскиот претседател, Володимир Зеленски. Американските власти проценуваат дека само во последната недела од декември биле убиени повеќе од 1.000 војници од Пјонгјанг.

Рачно напишаниот дневник, кој беше пронајден на 21 декември, му припаѓал на млад војник што загинал на фронтот заедно со двајца сонародници, соопштија украинските специјални сили.

Неколку дена претходно украинските сили заробија двајца севернокорејски војници, кои рекоа дека мислеле оти биле испратени во Украина на обука, а не во вистинска борба.

Зеленски му ги понуди заробените војници на Пјонгјанг во замена за украинските воени затвореници, кои се држат во Русија, додавајќи дека Киев сигурно ќе зароби повеќе севернокорејски војници во иднина.

Многу од илјадниците севернокорејски регрути испратени во Русија во октомври сѐ уште биле тинејџери. Паднатиот војник, чиј дневник бил пронајден на бојното поле во руската област Курск, опишал како му недостигале родителите и како го прославил роденденот на својот колега.

„Копнеам по мојата татковина откога ја напуштив топлата прегратка на моите драги татко и мајка, а овде во Русија го славам роденденот на мојот најблизок другар Сонг Џи Мионг“, напишал војникот.

Неговиот дневник покажува и како младиот регрут бил длабоко индоктриниран и целосно лојален на севернокорејскиот диктатор Ким Џонг-Ун.

„Дури и по цена на мојот живот, без двоумење, ќе ги извршувам наредбите на врховниот командант“, напишал младиот човек.

Според договорот за заемна воена помош, потпишан со Владимир Путин минатиот јуни, Ким испрати речиси 12.000 регрути да им помогнат на руските сили да ги протераат украинските војници од регионот Курск.

Во замена за војници и резерви ракети и артилериски гранати Путин наводно ѝ испраќа гориво на Северна Кореја и му помага на Ким да лансира шпионски сателити.

Руските воени блогери велат дека војниците на Кремљ се обидуваат да ги истуркаат преостанатите украински воени единици од регионот Курск пред Доналд Трамп да положи заклетва како американски претседател на 20 јануари по што би можел да се обиде да наметне мировен договор.

Глобалните цени на нафтата се искачија на највисоко ниво во последните четири месеци бидејќи трговците се загрижени дека новиот бран американски санкции насочени кон рускиот енергетски сектор може да го наруши и намали снабдувањето на пазарот.

Според податоците на берзата, цената на нафтата „брент“ во еден момент порасна на 81 долар за барел, а цената на американската нафта WTI се движи речиси 78 долари.

Соединетите Американски Држави во петокот ги воведоа досега најагресивните и амбициозните санкции за руската нафтена индустрија насочени кон големите извозници, осигурителните компании и голем број танкери, од кои некои наводно се дел од таканаречената флота во сенка, која ги заобиколува постојните санкции против Москва.

Цените на нафтата се зголемија во последните недели поттикнати од постуденото време, падот на резервите во САД и шпекулациите дека претставниците на Трамп би можеле да ги заострат санкциите за иранската нафта во наредните месеци, пишува „Блумберг“.

Пакет-санкциите подготвени од администрацијата на Бајден во заминување може дополнително да го наруши пазарот и потенцијално да ја промени пазарната рамка за нафтениот картел ОПЕК +, кој планира постепено да го зголемува производството оваа година.