Филипинската полиција убила еден од командантите на исламистичкото движење Абу Сајаф, поврзан со киднапирањето на активистите на Црвениот крст лани и уште двајца негови соборци во престрелката на југот на земјата, соопштија високи филипински функционери, пренесува Associated Press

Полицијата во целата држава е ставена во состојба на висока подготвеност со цел да се спречат евентуалните одмазднички напади, а во јужниот регион Минданао полицијата распореди посебна единица за спречување на можните напади. Според портпаролот на шефот на полицијата на островот Јоло, Џозеф Рамак, Гафур Џумдаил и неговите соборци биле убиени блиску до гратчето Маимбунг на Јоло, откако се судриле со специјалците кои биле во потрага по еден малезиски терорист и неговите локални соработници. Смртта на Џумдаил, кој е поврзан со неколку киднапирања на видни личности, вклучувајќи го она од јануари 2009 година на три активисти на Црвениот крст од Швајцарија, Италија и од Филипините, е најсилен удар до сега на организацијата „Абу Сајаф“ која има потврдени врски со Ал  Каеда. Оваа група, сепак и натаму останува главна закана за Филипините. Во последната пресметка, специјалците го нападнале скривалиштето со намера да го уапсат Џумдаил, неговиот брат, кој исто така е командант во „Аби Сајеф“ и Зулкифли бин Хир, малезиски терорист по кој трага и Вашингтон. САД ја стави Абу Сајеф на црната листа на терористички организации и испрати стотици војници на југот на Филипините за да ги обучат филипинските војници за борба со терористите. Оваа екстремистичка група, која има околу 400 борци на Јоло и на соседните острови е обвинета за најтешките бомбашки напади во земјата, за киднапирања и за сечење на главите на некои заложници. Меѓу обезглавените беше и еден американски турист, кој беше убиен во 2001 година.  Зулкифли бин Хир, пак, исто така познат Марван, е инженер кој се образувал во САД и кој е одговорен за повеќе бомбашки напади. САД за него нудат награда од пет милиони долари. За Марван се верува и дека е лидер на терористичката организација „Кумпулун Муџахедин Малезија“ и дека е член на командата на „Џемаа Исламија“, огранок на Ал-Каеда кој е одговорен за многу терористички напади, меѓу кои  е и нападот на ноќниот клуб на островот Бали во Малезија во 2002 година, во кој загинаа неколку стотици западни туристи.