Сообраќајната полиција и нивните колеги од неодамна во нивната работа го воведоа дрегер дрога-тестот за тестирање на на возачите дали возат под дејство на наркотици.

ВЕСТ ВО НОЌНА СМЕНА СО СООБРАЌАЈЦИТЕ И ИНСПЕКТОРИТЕ ЗА НЕДОЗВОЛЕНА ТРГОВИЈА ОД МВР

Сообраќајната полиција и нивните колеги од неодамна во нивната работа го воведоа дрегер дрога-тестот за тестирање на на возачите дали возат под дејство на наркотици.

Полноќ во Градскиот парк во Скопје. На кренатата светликава палка со знакот стоп црно такси “фиат типо” се паркира. Пред сообраќајците излезе крупно момче со портокалова коса и иста таква брада.

“Добровечер, вашите документи ве молам”, му се обраќа сообраќаецот на младиот таксист. Момчето ги дава документите. Додека двајца полицајци ги проверуваат документите, нивните колеги почнуваат да го подготвуваат новиот дрога-тест за да проверат дали момчето употребувало дрога. Во меѓувреме двајца момци од секторот за недозволена трговија, популарното НТШ, го претресоа момчето. Кај него немаше ништо, но во неговиот автомобил најдоа лист хартија – телефонска сметка, а во него дрога. Марихуана, некаде околу две дози, за два џоинта, и хартија за виткање цигари.

Новиот дрога-тест дрегер е подготвен. Додека полицајците му објаснуваат дека ќе му направат дрога тест се подготвува стапчето со кое треба да се земе плунка од неговата уста. Момчето почнува со стапчето да трие во устата за да собере доволно плунка. Откако насобра доволно примерок од плунката беше ставен во дрегерот. За резултатот требаа 15-тина минути. Додека чекавме полицијата разговараше со момчето од каде му е марихуаната. Ми ја донесе другар, одговара тој. Полицијата му ги зеде регистерските табличките и такси-таблата. Со момчето таксист беше и неговата девојка. Неа ја претресе полицајка и таа се врати да го чека момчето во автомобилот.

Дрегерот анализира, а останатите сообраќајци си ја тераат работата. Контрола на документите, алко-тест…

Додека екипата на “Вест” дежураше во трета смена заедно со сообраќајците возачите кои околу еден часот по полноќ се прибираа дома мораа да ја поминат старата добро позната процедура – дување за акло-тест. Оние кај кои беше утврдено недозволено присуство на алкохол во крвта заработуваа соодветни пријави. Не наидовме на познатото натегање: си пиел! Не, не сум пиел!

Со сообраќајците дежуравме четири часа. По полноќ возачи беа сопругите. Пијаните и поднапиените мажи им даваа на нивните сопруги или девојки да возат. Од кафеана до дома само во прва, ама тоа и не е толку важно. Работата е да се стаса безбедно дома и пијаниот да не седнува зад воланот.

На 10-тата контрола стаса дојавка. Последна 57-ка, да се однесе дрегерот за дрога тест.

Полициските патроли тргнуваат во Козле каде се наоѓа последната постојка на автобусот “57”.

Сообраќајците запреле два автомобила. Во едното возило неколкуте момчиња беа фатени пијани. Биле на свадба на братот на возачот. Процедурата запазена, дување во алкомерот, направен записник.

Во вториот автомобил две девојки по 22-23 години. Им нашле џоинт. Девојката што го возеше автомобилот требаше да даде плунка за дрога-тест. Нејзината другарка остана во автомобилот да заврши процедурата. За 20-тина минути излегоа резултатите. Тестот на плунката покажа дека употребувала марихуана, амфетамини, кокаин, метадон и опијати. Од 15-тината видови наркотици и опијати што дрегерот може да открие, девојката беше позитивна на дури пет дроги.

Полицајците се надеваат дека употребата на дрегерот ќе донесе резултати, дека ќе се намали возење под дејство на наркотици. Се надеваат и дека брзо ќе се расчуе за дрога-тестовите и дека онаа народната дека стравот лозјето го чува ќе се покаже точна во случајот. (Е.З.) Фото: О. Теофиловски

***

Дрегерот како превентива

Со новиот дрога-тест што МВР го вклучи во неговата работа полицијата се надева дека ќе се намали употребата на наркотици. Полицијата вели дека ова треба да дејствува како превентива, оти незамисливо е возење под дејство на наркотици, особено кај таксисти кои не само што треба да се грижат за себе туку и за нивните патници.

За сега бројот на дрога-тестовите не е доволен целосно да ги задоволи потребите и со него се работи во Скопје, но, како што најави Ајет Незири, помошник-директорот во Секторот за безбедност во сообраќајот, дрегерот ќе биде употребен и во другите градови во државата.

“Ваквите екипи се организирани и составени од колеги од разни служби за поголема ефикасност. Местата каде ќе вршиме контроли ги бираме според наши сознанија. Во Скопје има околу 3.500 зависници, а во Македонија околу 5.000 што значи дека треба работа”, појаснува Незири.

Пред да се набави дрегерот проверката за дрога се правеше во Клиничкиот центар, преку крв и урина, но сега процедурата е олеснета и забрзана. Дрегерот ја анализира не само плунката од контролираното лице, туку и прашкасти материи што ќе се пронајдат при проверките. Доволно е само малку од материјата да се раствори во вода, да се стави тоа во дрегерот и да се почека 10-тина минути за резултат.