Германската канцеларка, Ангела Меркел, за време на состанок на раководството на Христијанско-демократската унија (ЦДУ) се заложила за можност за целосна забрана за патување со цел да се намали бројот на новозаразени, пренесуваат германските медиуми.

„Работата ни излегува надвор од контрола. Мора да ги заостриме мерките или за 14 дена ќе бидеме повторно таму каде што бевме. Не можеме ли да го забраниме патувањето?“, рекла Меркел за време на видеоконференција со водечките политичари на ЦДУ во сојузните покраини, известува дневникот „Билд“ повикувајќи се на информации од учесниците на состанокот.

Меркел го посочила фактот дека за време на божикните празници 50.000 Германци дневно патувале на Канарските Острови и Малдивите.

„Треба да го разредеме воздушниот сообраќај, така што ќе не може да се оди никаде“, рекла Меркел според учесниците на состанокот, а истовремено ја споменала можноста за затворање на границите, како што беше случај минатата пролет.

На истиот состанок таа го довела во прашање ублажувањето на мерките за зклучување по 15 февруари. Како причина за сè уште тешката состојба, и покрај падот на бројот на новозаболени, Меркел го навела појавувањето на новиот мутиран коронавирус, кој се шири со многу побрзо темпо.

Доколку дојде до олеснување на мерките по средината на февруари, Меркел смета дека првин треба да се отворат градинките и училиштата, па малопродажбата и на крајот угостителските објекти.

Строги мерки на затворање се на сила во Германија до средината на февруари, вклучително и забрана за работа на речиси сите малопродажни, угостителски, културни и спортски објекти.

Речиси 20 милиони дози вакцини наводно исчезнале за време на испораката до американските сојузни држави, кога бил претседател Доналд Трамп.

Лондон Индепендент ја цитира веб-страницата „Дејли Бист“ и извори од администрацијата на Бајден, кои наведуваат дека недостасуваатречиси 20 милиони дози откако биле испратени во САД, а Центрите за контрола и превенција на болести (ЦДЦ) прецизира дека 41,1 милион дози биле испратени низ Соединетите Држави од декември, но само 22,7 милиони Американци примиле вакцина.

Според податоците со кои располага новата администрација, некои земји објавија дека не можат да се следат одредени количини вакцини, односно дека не се достапни во магацините или на кои било други места.

Додека преодниот тим на Бајден се жали на брзината на вакцинирање, верувајќи дека е бавна, многу граѓани одбиваат да бидат вакцинирани.

Десетте најбогати луѓе во светот би можеле да купат вакцини за сите жители на планетата, покажуваат податоците од извештајот на меѓународната хуманитарна организација „Оксфам“.

Нивното вкупно богатство се зголеми за 540 милијарди долари за време на пандемијата на коронавирусот и сега изнесува 11,95 трилиони долари, се наведува во извештајот на организацијата под наслов „Вирус на нееднаквост“.

Тие пари се доволни за да се спречи речиси секој поединец да падне во сиромаштија за време на пандемија и да му обезбеди вакцина против коронавирусот, пресметале истражувачите од „Оксфам“, пренесува „Ројтерс“.

Количината на богатство што ја имаат овие 10 лица е еднаква на вкупното трошење на членките на Г20 за да закрепнат од пандемијата. Затоа „Оксфам“ ги повикува владите да размислат за оданочување на супер богатите.

Некои од нив дадоа значителен придонес за итен одговор на пандемијата.

Меѓу 10-те најбогати луѓе се наоѓаат лидерот на Амазон, Џеф Безос, лидерот на Тесла, Илон Маск и основачот на Фејсбук, Марк Закерберг.