Највисокото тело на сунитскиот ислам Ал-Азхар, чие седиште се наоѓа во Каиро, објави денеска дека ја прекинува соработката со Светата Столица. Ваквата одлука е резултат на „нападот“ на исламот од страна на  папата Бенедикт XVI. Од Светата Столица изјавија дека имаат желба да го продолжат дијалогот со таа установа. „Причина за заладување на односите се нападите на папата Бенедикт XVI. Врз исламот… Папата во повеќе наврати изјави дека муслиманите на Блискиот исток ги угнетуваат не муслиманите со кои живеат“, се истакнува во соопштението на Ал-Азхар, кое го пренесува египетската државна агенција Мена. Портпаролот на Светата Столица, отец Федерико Ломбарди изјави дека „ што и да се случи, желбата за меѓурелигиски дијалог во Ватикан нема да се смени“. Ал-Азхар и Светата Столица годишно се среќаваат два пати и разговараат за меѓусебната соработка. Ал-Азхар одлуката ја донесе на вонредна седница на Исламската истражувачка академија, која ја предводи големиот имам шеикот Ахмед ал-Тајеб. Папата повеќе пати го осуди нападот на православната коптска црква во Александрија за време на новогодишната ноќ, во која животот го загуби 21 лице. Папата побара од светските лидери да ги заштити христијаните во Египет, додека Ахмед ал-Тајеб изјавите ги нарече „мешање во внатрешните работи“.  Коптите се најголема христијанска заедница во регионот, поголемиот дел се православни христијани, а помал дел католици. Коптите сочинуваат 6 до 10 отсто од 80-милионското население на Египет, најголем дел од нив се муслимани сунити. крај/хина/н.ц