Три лица загинаа во петокот навечер по локално време при акцијата на безбедносните сили за растурање на антивладините демонстрации во градот Аден во јужниот дел на Јемен, јави Agence France-Presse, повикувајќи се на извори од гратските болници

Според агенцијата, судирот на стотиците демонстранти кои бараат промена на режимот со полицијата продолжува и вечерва во различни делови на Аден. Групи демонстранти не се повлекле и покрај тоа што војската навлегла во градот по претходните антивладини протести. Во петокот навечер во судирите загинале тројца демонстранти, со што бројот загинати од почетокот на протестите во градот се зголеми на осум лица. Претходно во петокот беше потврдено дека две лица загинале откако непознати лица фрлиле граната во маса демонстранти во центарот на градот Таез, исто така во јужниот дел на Јемен. Немирите во Јемен започнаа минатата седмица кога јеменската опозицијата на 10-ти февруари го организираше ткн. „Ден на гневот“, на кој учествуваа околу 20 илјади луѓе. Јеменски претседател Али Абдула Салех, од кого оставка бараат демонстрантите, уште на почетокот на февруари изјави дека нема да ги прошири своите овластувања ниту дека ќе ја пренесе власта на својот син. Абдула Салех стана претседател на Северен Јемен во 1978 г., а по повторното обединување на Северен и Јужен Јемен во 1990 г., застана на чело на формираната Арапската Република Јемен. И овие немири што го зафатија Јемен, политичките аналитичари го гледаат во фонот на безредијата што ги зафатија неколкуте држави во регионот, како Тунис, Египет, Алжир и Бахреин. Под притисок на улични протести на 11-ти февруари поднесе оставка египетскиот претседател Хосни Мубарак, кој ја предаде власта на армијата. Овој домино ефект од масовни протести во арапските земји започна на 14-ти јануари во Тунис со кои беше соборен од власта претседателот Зине ел-Абидине бен-Али кој со поширокото семејство избега во Саудиска Арабија, а веќе следниот ден беше и официјално сменет од функцијата.