Турскиот претседател Реџеп Таип Ердоган најави олеснување на ограничувањата воведени за да се спречи ширењето на коронавирусот во неколку провинции кои се категоризираат како провинции со ниско или средно ниво на зараза.

Ердоган вчера рече дека кафулињата и рестораните ќе можат повторно да работат со половина капацитет помеѓу 7:00 и 19:30 часот, освен оние лоцирани во 17 региони кои се категоризираат како многу ризични, објави АП.

Полицискиот час во текот на работните денови ќе продолжи да важи низ цела Турција, како дел од владината програма за контролирана нормализација, рече тој.

Училиштата повторно ќе се отворат во региони со низок и среден ризик, рече Ердоган. Во другите региони, само учениците кои се подготвуваат за приемни испити во средните училишта или универзитети, повторно ќе седнат во училишните клупи.

Турција во последните денови забележа највисоко ниво на зараза од средината на јануари.

Од почетокот на пандемијата на коронавирусот во Турција се регистрирани повеќе од 2,7 милиони случаи на Ковид-19 и околу 28.500 смртни случаи.

Лидерот на Социјалдемократската партија на Германија, Норберт Валтер-Борјанс, ги обвини германската канцеларка Ангела Меркел и министрите од ЦДУ за „лошо управување“ со кризата од коронавирусот.

Валтер-Борјанс изјави дека Германија има шеф на владата кој има направено бројни пропусти во координирањето со кризата.

Тој рече дека министрите од коалицискиот партнер на СПД не ги исполнуваат своите обврски.

Во исто време, ги пофали социјалдемократските членови на владата, како што е вицеканцеларот Олаф Шолц, за кого Валтер-Борјанс тврди дека ги поправа сите проблеми.

Тој вели дека придонесот на членовите на владата од редовите на ЦДУ и ЦСУ е далеку зад оние од редовите на СПД.

Кина планира 40 проценти од своето население да вакцинира против коронавирус до крајот на јуни, изјави експертот за респираторни заболувања Џонг Наншан.

Тоа значи дека до јуни ќе бидат вакцинирани 548 милиони луѓе во Кина, која има 1,4 милијарда жители, објаснува „Си-ен-ен“.

Кина досега вакцинираше 3,56 проценти од своето население, што е околу 51 милион луѓе, додаде Џонг.