Се чини дека Шведска влегува во третиот бран на пандемијата, соопшти денеска здравствената агенција по воведувањето на новите ограничувања поради зголемувањето на бројот на заразени и многу брзото ширење на новите видови на вирусот кои се сметаат за позаразни.

Шведска регистрира 11.804 новоинфицирани од петокот до денеска, за разлика од 10.933 нови случаи минатата недела.

„Изгледа дека влегуваме во трет бран“, рече главниот епидемиолог Андерс Тегнел.

Шведска воведе нови мерки – го ограничи бројот на клиенти во продавниците, а кафулињата и рестораните работат со скратено работно време.

СAД ќе воведат санкции против седум претставници на руската влада поради ситуацијата со Алексеј Навални, изјави претставник на американската администрација.

Информацијата била соопштена за време на специјален телефонски состанок.

Како што се наведува, администрацијата на претседателот Џо Бајден сака односите меѓу Русија и САД да бидат стабилни и предвидливи, но нема да бара нивно ресетирање.

Американските власти усвоиле санкции против руски официјални лица и компании бидејќи заклучиле дека Русија се обидела да го убие опозицискиот лидер Алексеј Навални со нервен агенс, соопштија неименувани официјални лица од администрацијата на Бајден.

Зборувајќи пред новинарите преку конференциски повик, официјалните лица изјавиле дека потегот е направен во координација со Европската Унија, објави „Ројтерс“.

Тие исто така го повториле повикот на претседателот на САД, Русија да го ослободи Навални од затвор.

Претходно денеска, рускиот министер за надворешни работи, Сергеј Лавров, изјави дека Москва сигурно ќе одговори на евентуалните санкции што би ги вовеле Соединетите Американски Држави поради ситуацијата со осудениот Навални.

„Ние ќе одговориме без сомнение. Едно од основните правила во дипломатијата е реципроцитет. Нема смисла да се коментира ваков чекор. Ние неколкупати повторивме што мислиме за нелегитимните еднострани санкции што американските колеги планираат да ги користат. Тоа се случува секогаш, а потоа Европската Унија ги копира потезите на САД“, рече Лавров, а пренесе агенијата „Тасс“.

Лавров исто така додаде и дека САД немаат што конкретно да кажат во врска со наводите за наводното труење на Навални.

Речиси 237 милиони дози од вакцината на „Астра зенека“ против Ковид-19 се очекува да бидат доставени во 142 земји до крајот на мај во рамките на програмата „Ковакс“, изјави денеска генералниот директор на Светската здравствена организација, Тедрос Аданом Гебрејсус.

Тој рече дека е предвидена испорака на вакцини во Ангола, Камбоџа, Демократска Република Конго и во Нигерија, јави „Ројтерс“.

Претседателот на Гана, Нана Акуфо-Адо, изјави дека во неговата земја почнала имунизацијата со вакцини од програмата „Ковакс“.

Денес, преку програмата „Ковакс“ беше одобрена набавка на речиси 1,8 милијарда дози вакцини во 2021 година, што е речиси 500 милиони повеќе од планираното на крајот на минатата година, објави организацијата задолжена за координација на програмата „Ковакс“.

Првиот човек, Сет Беркли, рече дека се надева дека преку „Ковакс“ успешно ќе завршат преговорите за набавка на дополнителни 1,1 милион дози вакцини „новавакс“.

Тој објасни дека има доцнење во испораката на одреден број вакцини за „Ковакс“ од компанијата „Фајзер/ Бионтек“ поради дополнителни барања од производителите во врска со исплатата од обесштетување, објави „Ројтерс“.

Советникот на Светската здравствена организација, Брус Ејлворд, потврди дека планот за почнување на вакцинацијата во рамките на програмата „Ковакс“ во првите 100 дена од оваа година во сите земји што учествуваат во таа програма е сè уште валиден под услов производителите да се придржуваат до договорените рокови за испорака.